မတ်မလီု ၊ သိပ်တမ်ပါ ၂၄
တွဵုးရးဍုၚ်မန် လ္တူဍုၚ်မတ်မလီု နူကဵုကိုန်အစဳဇန်ထမံက်ပတိတ် ဍုၚ်တၟိလှိုၚ်ရတနာဝွံ ဒၞာဲဂအာၚ်သ္ၚိ ညးတာလျိုၚ်ပၞာန်တံဂွံလဝ်ၚုဟ်တန်န်တံဂှ် ပတိုန်ၚုဟ်မးပြံၚ်သၠောဲတဲ သွံပတိတ်မံၚ်ရောၚ်ဂှ် ညးရေၚ်တၠုၚ်ဖဵုဂအာၚ်သ္ၚိတံ ဟီုလဴကဵုဌာန်ပရိုၚ်သြၚ်လောန်တိုၚ်မ်ရ။
ထ္ၜးလဝ်ဟိုတ် ဒၞာဲတိၜက်ၜေတ်ဂးတုဲ နူကဵုအလဵုအသဳတွဵုရးမန်ကဝ်မယှေန်ပၞာန်သီအဝဵု သီကေတ်လဝ်တံဂှ် ကၠောန်သ္ပလဝ်ကိုန်အစဳဇန် ခၞံထမံက်ပတိတ်ဍုၚ်တၟိလှိုၚ်ရတနာတုဲ ဒၞာဲဂအာၚ်သ္ၚိတံဂှ် နကဵုၚုဟ်မးတန်န် ဖျေံလဝ်ကဵု ညးတာလျိုၚ်ပၞာန်တံကဵု ညးတာလျိုၚ်ဌာနအလဵုအသဳတံရ။
နူကဵုကိုန်အစဳဇန် ထမံက်ပတိတ်ဍုၚ်တၟိလှိုၚ်ရတနာဏံ သွက်ညးတာလျိုၚ်ပၞာန်တံဂှ် ဂအာၚ်သ္ၚိ ၄၀/၆၀ ပေ မွဲဂအာၚ်မ္ဂး ၃၀၀ ဒကေဝ် ဒးဟပၠုပ်ကဵုအလဵုအသဳတုဲ ပတိုန်လဝ်ၚုဟ်မး မွဲဂအာၚ် နူ ၁၃၀၀ ကိုတ် စိုပ်ဒဵု ၁၅၀၀ ကိုတ်နွံရ။
ဂအာၚ်သ္ၚိ နူကဵုကိုန်အစဳဇန် ထမံက်ပတိတ်ဍုၚ်တၟိလှိုၚ်ရတနာဏံ ညးတာလျိုၚ်ဒပ်တံ ပြံၚ်တဲသွံပတိတ်မံၚ်တုဲ ပရေၚ်သွံရာန်ဂၠိုၚ်အိုတ် ကမၠောန်ဒှ်မံၚ်ကွေံကွေံရောၚ် ညးရေၚ်တၠုၚ်ဖဵုဂအာၚ်သ္ၚိမွဲတၠ ဟီုရ။
“လပါ်လှိုၚ်တေံ ပရေၚ်သွံရာန်တံ ဒှ်ကမၠောန်ဂၠိုၚ်ကွေံကွေံဏောၚ်၊ နူကဵုအမိၚ်ကဵုတိဂှ်တုဲ ဂွံတိဂရာန်ဏောၚ် တံၚ်ဂြဲတုဲ သွံရာန်မံၚ်၊ ပေ ၄၀/၆၀ ကော်လဝ် ၁၅၀၀ ကိုတ်၊ ပေ ၂၀/၆၀ ဂှ် ကော်လဝ် ၜိုတ် ၇၀၀ ကိုတ်ရ” သာ်ဝွံ သ္ဂးရ။
နူကဵုအလဵုအသဳတွဵုရးမန် ကဝ်မယှေန်ပၞာန်သီအဝဵုတံ ကၠာတေံဟီုမံၚ်ကိုန်အစဳဇန်ဏံ ရန်လဝ်ကဵု သွက်သ္ဂံၚ်ပြဟ်လလုဲတံကီုလေဝ် ပြဟ်ဟ်ဏံ ညးတာလျိုၚ်ဒပ်ပၞာန်တံကဵု ညးတာလျိုၚ်သၞာဲဒါ ဌာနဆေၚ်စပ်တံသၟးရ ဂွံလဝ်ဂအာၚ်သ္ၚိတံဂှ်ရ ။
ဒၞာဲဂအာၚ်ညးဍုၚ်ကွာန်တံ တန်တဴမံၚ်စံၚ်ကၠုၚ်လဝ် သ္ၚိဌာန်ဟွံအောန်နူကဵု ၅၀၀ မတံဂှ် တိဂအာၚ်ၜက်ၜေတ်လဝ်ဒၞာဲ ဂးတုဲ နူကဵုအလဵုအသဳတွဵုရးမန်ကဝ်မယှေန်ပၞာန်သီအဝဵုတံ နနဲအဓ္ဓမ ထဍေၚ်ပတိတ်ထောံအတၚ် ပလီုထောံတုဲ ဒှ်တိကလေၚ်တက်လဝ်ဂအာၚ်သ္ၚိတၟိရောၚ် ညးဒေသတံဟီုရ။
ပ္ဍဲကဵုတိ ၁၁ ဒဿမ ၂၃၉ ဧက ဂွံလဝ် လ/န (၃၉) နကဵုယၟု သ္ကိုပ်အုပ်ဓုပ် နူကဵုဂကောံပရေၚ်ဗဂဵုလဟဵုသာယာ ပွိုၚ်ဍုၚ်မတ်မလီုဝွံ ဟွံဂွံလဝ်အခေါၚ်မွဲသာ် ဟိုတ်နူၜက်ၜေတ်သိုၚ်ခၞံလဝ် စမြိုၚ်သ္ၚိဌာန်ဂးတုဲ အလဵုအသဳတွဵုရး သီကေတ်လဝ်ဒၞာဲဂအာၚ်သ္ၚိညးဒေသ ဒၞာဲတံဏံမဒှ်ကီုရ။
ထ္ၜးဟိုတ် ပရေၚ်ၜက်ၜေတ်ဒၞာဲဂးတုဲ သီကေတ်လဝ်တံဂှ် ထမံက်ပတိတ် ကိုန်အစဳဇန် ဍုၚ်တၟိလှိုၚ်ရတနာတုဲ ဂကောံအလဵုအသဳတွဵုရးမန်ဂှ် ၆၀%၊ ဂကောံတၠပိုန်ဒြပ် မတ်မလီု ခရိုနဳ ဥူမိုဝ်ကျဝ်တံ ၄၀% ကေတ်လဝ်နွံမံၚ်ရောၚ် ဟီုဂးမံၚ်အိုတ်ရ။
ပရိုၚ်-သြၚ်လောန်တိုၚ်မ်
Photo – CJ