မတ်မလီု ၊ သိပ်တမ်ပါ ၂၄
အပ္ဍဲကဵုဒပ်စဵုဒၞာဍုၚ်မန် MSDF ညံၚ်ရဴဒှ်မံၚ် ဗီုပြၚ်ၜါလွး ပြဿနာပ္ဍဲကဵု က္ဍိုပ်သ္ကိုပ်ၜါတၠတံဂှ် ပွိုၚ်ပိဂိတုဏံ ညးမွဲကဵုညးမွဲ ညံၚ်ဂွံသောၚ်ကလး ပ္ညဳပ္ညပ်ဂၠာဲအာသွဟ်ၜိုဟ်ဟ်သြိုဟ်ဟ်မာန် ကံၚ်သဳဖိတ်ဒရေဝ်ဍုၚ်မန် MSFC ဖျေံသ္ဂုတ်သွာတ် ဗတိုက်ဖအောဝ်ဏာရ။
လောန်ကၠုၚ်အပ္ဍဲဂျူလိုင် ဒုတိယသတ္တဟတေံ ပဋိပက္ခက္တဵုဒှ်အာ အပ္ဍဲကဵုဒပ်စဵုဒၞာဍုၚ်မန် MSDF ဂှ် ပရေၚ်ဒဒှ်ဍာံ ညံၚ်ဂွံမံက်ဂတဝ်ကေုာံ ရန်တၟံကဵုပရေၚ်ညဳသၟဟ်တုဲ ပ္ဍဲကဵုဂိတုဂျူလိုၚ် ၁၂ ဂှ်ပံက်လဝ် ကဝ်မတဳပရေၚ်စၟဳစၟတ် ပ္ညဳပ္ညပ်ဂၠိုက်ဂၠာဲမွဲဂကောံ မဒှ်ရ။
နကဵု ကဝ်မတဳပရေၚ်စၟဳစၟတ် ပ္ညဳပ္ညပ်ဂၠိုက်ဂၠာဲဏံဝွံ အပ္ဍဲ MSDF အဃောဒက်ပတန်ပရေၚ်ညဳသၟဟ်တံ အခိၚ်ကာလ ရေၚ်တၠုၚ်အာမံၚ်ဂှ် ဒှ်အာဗီုပြၚ်ၜါလွးတုဲ အရာသ္ပစၞးတံအကာဲအရာဟွံကၠးမးတိုန် ဒှ်ကၠုၚ်မံၚ်ရဂှ် ပ္ဍဲလိက်လလောၚ်တြး ပတိတ်လဝ်ဂိတုသိပ်တမ်ပါ ၂၂ ချူလဝ်နွံရ။
နူကဵုလပါ် ဒံက်တာသဳရိမန်ဆာန် ဟီုဂှ် နကဵုယၟု MSDF Central ထပ်ဒက်ပတန်ဏာ ကမ်မတဳတၟိ ကဝ်မတဳပၠတရဴ ပရေၚ်ဍုၚ်ကွာန် ပရေၚ်ပၞာန်မွဲတုဲ ပရေၚ်သ္ကိုပ်သ္က ကဝ်မတဳက္ဍိုက်ပ်ပရေၚ်ဍုၚ်ကွာန် ပရေၚ်ပၞာန် MSDF ဝွံ အတိုၚ်မူလ ပွမဒက်ပ္တန်လဝ်ဟွံသေၚ်ရဂှ် ဂွံဆဵုညာတ်လဝ် သ္ဂးရ။
ဟိုတ်ဂှ်ရ နကဵုကဝ်မတဳပရေၚ်စၟဳစၟတ် ပ္ညဳပ္ညပ်ဂၠိုက်ဂၠာဲဏံဝွံ အပ္ဍဲကဵု ပရေၚ်ပဋိပက္ခဏံ ညးပါလုပ်လဝ် သီုဖအိုတ်တံဂှ် ဆဵုဂဗလဝ်၊ ဒုၚ်သ္ဇိုၚ်ကဵု လ္တူတၚ်နၚ် ပွမဂၠိုက်ဂၠာဲစၟဳစၟတ်ဂွံလဝ် ပ္ဍဲကဵုဂိတုဂျူလိုၚ်ကဵု အဝ်ဂတ်တံဂှ်တုဲ ဖျေံဏာသ္ဂုတ်သွာတ်ၜါတၚ်ဏံ မဒှ်ရောၚ်။
ပြဟ်ဟ်ဏံညးပါလုပ်မံၚ် အပ္ဍဲကဵုပြဿနာဏံ ဒံက်တာသဳရိမန်ဆာန်ကဵု နာဲကိုတူတံဝွံ နူကောန်ဂကောံ ကံၚ်သဳဏံဂှ် ဗွဲယာယဳဗဒေါအ်ထောံလဝ်တုဲ တာလျိုၚ်မအပ်ပြာပ်ကဵုလဝ် သီုဖအိုတ်တံဂှ်လေဝ် ဒေါအ်စွံလဝ်ရောၚ် ကဵုလဝ်သမ္တီရ။ ဆဂး ဒပ်စဵုဒၞာဍုၚ်မန် MSDF ဂှ် နဒဒှ်ကောန်ဂကောံ ကံၚ်သဳဖိတ်ဒရေဝ်ဍုၚ်မန် ဆက်နွံအာရောၚ်။
တုဲပၠန် နကဵု MSDF ဝွံ သၞောတ်တၠအဝဵုပၞာန်ညံၚ်ဂွံပြဟ်စှ်ေအာကဵု ဍုၚ်မန်ညံၚ်ဂွံဗၠးၜးဂှ် ပတဝ်ဏာက္ဍိုပ်တုဲ ပဋိပက္ခတံညံၚ်ဟွံဂွံဒှ် နကဵုနဲကဲ ၜိုဟ်ဟ်သြိုဟ်ဟ်တံကီု ညးမွဲကုညးမွဲ ဗွဲမယဵုလ္ဂူ ညံၚ်ဂွံ ကလေၚ်သ္ပအာစၟတ်သမ္တီကီု မွဲလပါ်ကဵုမွဲလပါ် ညံၚ်ဂွံစွံအဲပရဲပရေၚ်ရှ်ေသှ်ေညးသ္ကံကီု ကေတ်ခန်ဗတောန်တုဲ အပ္ဍဲကဵုပွိုၚ်ပိဂိတုဏံ ညံၚ်ဂွံပ္ညဳပ္ညပ်ဂၠာဲအာသွဟ်မာန်ဂှ် MSCF ဗတိုက်ဖအောဝ်လဝ် မဒှ်ရ။
ပ္ဍဲကဵုအခိၚ်ကာလစၟဳစၟတ်မံၚ် အမှု MSDF ဏံ လ္တူထပ်ဒကးအာ နကဵုယၟု MSDF Central ဂှ် ညးတံကဵုညးတံ ညံၚ်ဂွံကလေၚ်ပညဳအာ ကဵုလဝ်အခိၚ်ရောၚ် ညးအခေါၚ်ဟီုဂးနွံ ကဝ်မတဳစၟဳစၟတ်ပ္ညဳပ္ညပ်ဂၠိုက်ဂၠာဲ နာဲဖုၚ်မျာတ် ဟီုကဵုဌာန်ပရိုၚ် သြၚ်လောန်တိုၚ်မ်ရ။
“ပ္ဍဲကဵုအခိၚ်ကာလ ပိုဲစၟဳစၟတ်မံၚ်အမှုဏံရ၊ အကာဲအရာ MSDF ဒှ်အာ ၜါလွး ဒှ်အာ၊ မွဲဂှ် တမ်မူလ MSDF မွဲပၠန်ဂှ် MSDF Central ဂးတုဲ မံက်တိုန်မွဲဂကောံပၠန် အကာဲအရာဒှ်ကၠုၚ်။ ပ္ဍဲအကာဲအရာဏံဟီုတှ်ေ MSDF Central ဂှ် ဟွံဆေၚ်ကဵုပိုဲပုဟ်။ အခိၚ် MSDF ဒှ်အာမံၚ် ဗီုပြၚ်ၜါလွးဏံဂှ် ညးတံကဵုညးတံ ကေတ်အခိၚ်ပွိုၚ်ပိဂိတုတုဲ ကလေၚ်ပညဳအာတုဲမ္ဂး နဒဒှ်လုပ်ကံၚ်သဳပိုဲ ကလေၚ်လုပ်ဂွံ သဘဴဗီုပြၚ်ဏံဒှ်မံၚ်” သာ်ဝွံ သ္ဂးရ။
အခိၚ် ကံၚ်သဳဖိတ်ဒရေဝ်ဍုၚ်မန် MSFC ဒက်ပတန်လဝ်ဂှ် နကဵုဂကောံမဟာမိတ်ဥက္ကဌ ဒံက်တာသဳရိမန်ဆာန် ကဵု ညးအုပ်ကာနာဲကိုတူ နကဵုကမ်မတဳညးအာက္ဍိုပ် ပရေၚ်ဍုၚ်ကွာန် ပရေၚ်ပၞာန် MSDF တံပါလုပ်ကၠုၚ်လဝ် နဒဒှ်ကောန်ဂကောံတံကီုရ။
ဒံက်တာသဳရိမန်ဆာန် ညးအာက္ဍိုပ် ပ္ဍဲကဵုကမ်မတဳဗတိုက်သရိုဟ်ဒစဵုဒစးပေါဲရုဲမာဲအလီဂှ် ပြဟ်ဟ်ဏံ နဒဒှ် ဒုဥက္ကဌ ဆက်တုဲသ္ကိုပ်သ္ကမံၚ်ရောၚ် နာဲဖုၚ်မျာတ် သောၚ်ကလးလဝ်ရ။
လောန်ကၠုၚ်ဂိတုဂျူလိုၚ် ၁၀ တေံဂှ် နူကဵု ကဝ်မတဳက္ဍိုက်ပ်ပရေၚ်ဍုၚ်ကွာန်၊ ပရေၚ်ပၞာန် MSDF မအပ်ပြာပ်လဝ်ကဵု ဥက္ကဌ ဒံက်တာသဳရိမန်ဆာန်ဂှ် နုတ်ပတိတ်ထောံကီု ကေုာံ လ္တူကဵုလဝ်အမိၚ် သွက်ဂွံရပ်ထိၚ် နာဲကိုတူ၊ ယဝ်ရ ဟွံဒုၚ်တဲမ္ဂး ညံၚ်ဂွံပန်ထောံတံဂှ် MSDF ဂွံဒုၚ်လဝ်တဲ လိက်တေၚ်စိုပ် မဒှ်ရ။
နဒဒှ် ဥက္ကဌ ကဝ်မတဳက္ဍိုက်ပ် ပရေၚ်ဍုၚ်ကွာန်၊ ပရေၚ်ပၞာန် လ္တူဇကုကေတ်လဝ်တာလျိုၚ်ဂှ် နူကဵုဒပ် ဟွံပညဳပညပ်ကဵု ဥက္ကဌ မွဲသာ် ပတိတ်လဝ်လိက်လလောၚ်တြးဟီုဂှ် နကဵုတၚ်သ္ဂုတ်သွာတ် ညးပါလုပ်ကမ်မတီတံသၟး ဖျေံလဝ်သ္ဂုတ်သွာတ်ကေတ်တ်ရောၚ် ဒံက်တာသဳရိမန်ဆာန် ကလေၚ်သှ်ခၠေဝ်လဝ် သ္ဂးရ။
တုဲပၠန် ညးအုပ်ကာ MSDF နာဲကိုတူ လွဟ်သီကေတ်ဏာလဝ် လွဟ်တံဂှ် ညံၚ်ဂွံကလေၚ်သီကေတ်ထောံကီု ယဝ်ရ ကလေၚ်ပလန်မ္ဂး ညံၚ်ဂွံပန်ဂစိုတ်ထောံ ဒံက်တာသဳရိမန်ဆာန်ကဵုလဝ်စၞောန်တုဲ ပရူပရာဏံ စဒှ်ကၠုၚ်လဝ်ရောၚ် ပ္ဍဲလိက်လလောၚ်တြး MSDF ဂှ် ချူထမံက်လဝ်နွံရ။
အပ္ဍဲကဵု တၚ်နၚ်မူသ္ဇိုၚ် ကဝ်မတဳက္ဍိုက်ပ် ပရေၚ်ဍုၚ်ကွာန်၊ ပရေၚ်ပၞာန် ပိုဒ်(၄) ဂှ် စပ်ကဵုကၠောန်သ္ပကောံဓရီုတုဲ ဥက္ကဌ၊ ဒုဥက္ကဌ တိုန်စိုပ်ဟွံမာန်မ္ဂး ညးပါလုပ်ကမ်မတဳမွဲတၠဂှ် ကၠောန်သ္ပမာန်ရောၚ် ကမ်မတီကဝက်ပြၚ် တိုန်စိုပ်မ္ဂး ကၠောန်သ္ပကောံဓရီုမာန်တံ ပါလုပ်ရ။
လ္တူဒံက်တာသဳရိမန်ဆာန် ကဵုလဝ်အမိၚ်ပန်ဂစိုတ်ဂှ် နာဲကိုသူ တေၚ်စိုပ်တုဲ အတိုၚ်ကမ်မတဳစၟဳစၟတ် ပညဳပညပ်ဂၠိုက်ဂၠာဲသၟာန်သၟုက်လဝ်ဂှ်မ္ဂး ကဵုလဝ်အမိၚ်ကီုလေဝ် ကၠောန်သ္ပလဝ်ပရေၚ်ပန်ဂစိုတ်ဟၟဲကၠုၚ် သ္ဂးရ။
မွဲလပါ်ပၠန် နာဲကိုတူ သီကေတ်လွဟ်တုဲ ပါ်တိတ်အာနူဒပ် အတိုၚ်ဒံက်တာသဳရိမန်ဆာန် ဟီုဂးမံၚ်ဂှ်လေဝ် အတိုၚ်ကမ်မတဳစၟဳစၟတ်ပညဳပညပ်ဂၠိုက်ဂၠာဲ သၟာန်သၟုက်လဝ်ဂှ်မ္ဂး ပရေၚ်ပါ်တိတ်နူဒပ်ဟွံဆဵုလဝ်ရောၚ် ပ္ဍဲလိက်လလောၚ်တြးဂှ် ချူလဝ်ရ။
ဟိုတ်ဂှ်ရ အရာကလေၚ်ပံၚ်ဗစပ် ဒပ်ပၞာန်စဵုဒၞာဍုၚ်မန် MSDF တံဂှ် ဒှ်ပရေၚ်ကိစ္စအပ္ဍဲဒပ်ညးတံရတုဲ ဆေၚ်စပ်မံၚ်ကဵု ကဝ်မတဳက္ဍိုက်ပ်ပရေၚ်ဍုၚ်ကွာန်၊ ပရေၚ်ပၞာန် MSDF ဟေၚ် နူကဵုကမ်မတဳစၟဳစၟတ်ပညဳပညပ် ဂၠိုက်ဂၠာဲ ထံက်ထ္ၜးလဝ်နွံရ။
ပရိုၚ်-သြၚ်လောန်တိုၚ်မ်
Photo – MSFC