လေကေကဝ်၊ သိပ်တမ်ပါ ၂၅
ပ္ဍဲကဵုတွဵုရးကရေၚ် ပွိုၚ်ဍုၚ်ဗြဝတဳ ကရောၚ်ပၞာန် ဒပ်ကဝ်မယှေန်ပၞာန်ထပက်ကၠုၚ်မံၚ် ဍုၚ်လေကေကဝ်ဂှ် ဒးဘဲလွဟ်ချိုတ်ဂၠိုၚ်မံၚ်ကီုလေဝ် ကလေၚ်ထပေၚ်ဇြဟတ်တုဲ ထပ်ဗတိုက်မံၚ်ရဂှ် တမ်ရိုဟ်ကၞက်ပရိုၚ်ဒေသတံ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
စနူကဵု သိပ်တမ်ပါ ၂၁ ဂှ်တုဲ ဒပ်ကဝ်မယှေန်ပၞာန် နူကဵုဍုၚ်ဗြဝတဳ မွဲအဆံၚ် ဘိုၚ်ပန်ကဵုလွဟ်ဇၞော်ကီု နူကဵုဗလးတိ နကဵုဇြဟတ်ဒပ် ဗွဲမဂၠိုၚ် ဍိုက်ဗတိုက်ကၠုၚ်ဂှ်ရ နူကဵုဒပ်ပၞာန်ဗၠးၜးကောန်ဂကူကရေၚ် KNLA မဟာဒပ် ၆ သ္ကိုပ်သ္ကလဝ် ဂကောံဇြဟတ်ပၠန်ဂတးတံ ဒုၚ်ဒဝ်ဗတိုက်လဝ်ဂှ်တုဲ အကြာၜါလပါ်ပေါဲဗတိုက်ဇၞော်ကဵုဇြဟတ် ဒှ်ကၠုၚ်ရ။
ပ္ဍဲကဵုသိပ်တမ်ပါ ၂၃ ဂှ်ပၠန် ဍုၚ်ဗြဝတဳ နူကဵုမေတ္တာလေၚ်မျာၚ် ပတဝ်လဝ်ကဵုလပါ်လေဝ်ကေကဝ် ကရောၚ်ပၞာန်ထပက်ကၠုၚ်လဝ် အကြာဂကောံဇြဟတ်ပၠန်ဂတး KNLAတံဂှ် ပ္ဍဲကရပ်လေဝ်ကေကဝ် ဒၞာဲကွာန်ထဳမေဝ်ခဳဝါ ပွိုၚ်မွဲတ္ၚဲပေၚ်ၚ် ပေါဲဗတိုက်ဇၞော်ကဵုဇြဟတ်ဒှ်တုဲ နူကဵုဒပ်ကဝ်မယှေန်ပၞာန်တံ ဘိုၚ်ပန်ရီုလဝ်လွဟ်ဇၞော်တံ ဗွဲမဂၠိုၚ်ရ။
အပ္ဍဲပေါ်ဗတိုက်ဏံ နူလပါ်ဒပ်ကဝ်မယှေန်ပၞာန် ဒးလဝ်ဘဲဝပ် ဗွဲမဂၠိုၚ်တုဲ ဒပ်ကလေၚ်ဂ္ၚာစှ်ေအာလဝ်ဂှ်ရ ပ္ဍဲကဵုသိပ်တမ်ပါ ၂၄ဂှ် နူကဵုဒပ်ကဝ်မယှေန်ပၞာန် စကာဇြဟတ်လွဟ်ဇၞော်တုဲ ကလေၚ်ထပက်မံၚ်ပၞာန်၊ ပေါဲဗတိုက်ဆက်ဒှ်အာရဂှ် တမ်ရိုဟ်ကၞက်ပရိုၚ်ဒေသတံ သ္ဂးရ။
ဒပ်ကဝ်မယှေန်ပၞာန် ရဲဒးလဝ်ဘဲဝပ်အပ္ဍဲပေါဲဗတိုက်တံဂှ် ကောန်ပၞာန်တၟိ စှ်ေနူတန်ဗတောန်ယိုက်ဝန်ပၞာန် ဗွဲမဂၠိုၚ်ပါလုပ်မံၚ်တုဲ ကောန်ပၞာန်စှ်ေလဝ်ဘာတၟိတၟိတံဏံဝွံ ဒပ်ကဝ်မယှေန်ပၞာန်စွံလဝ်ဂတအိုတ် ကဵုဇက်အာပၞာန်ကၠာအိုတ်ဂှ်ကီု ဗစလဝ်ဂဥုဲၜူမာဲလောန်ကာဲတုဲ ကဵုဍေံတံဗတိုက်မံၚ်ပၞာန်ရောၚ် တမ်ရိုဟ်ကၞက်ပရိုၚ်ပၠန်ဂတးတံ သ္ဂးရ။
ဟိုတ်နူ ပ္ဍဲကရပ်ဍုၚ်လေဝ်ကေကဝ်ပေါဲဗတိုက်ဒှ်တုဲ ဒၞာဲဗၠးဘဲပၞာန်မာန်ဂှ်ညးဍုၚ်ကွာန်တံ ဒစးဒုၚ်ပါဲလဝ်အိုတ်ကီု ပြဟ်ဟ်ဏံ နွံမံၚ်ပၟိက်ကဵုပရေၚ်ရီုဗၚ်ဟံၚ်ပြာ်နာနာကီု ဟိုတ်နူပေါဲဗတိုက် ကောန်ပၞာန်သေံတံလေဝ် သၠုၚ်လဝ်ပရေၚ်ဂီုကၠီု ဒေသတုဲ မၚ်မွဲရံၚ်စံၚ်မံၚ်ရောၚ် ညးဒေသတံဟီုရ။
ဒပ်ကဝ်မယှေန်ပၞာန်တံဂှ် ဒေသတေန်ဂါန်ညဳနံၚ်ကဵု သ္ကုတ်ဂၠံၚ်အာယှ ဗြဝတဳ-ကအ်ကြိက်ဂှ် နူကဵုသိပ်တမ်ပါ ၆ တေံ ကလေၚ်သီဏာမာန်တုဲ ဗွဲကြဴဏံ ဒဵုလက်ဟိုတ်လပါ်သၠုၚ်ကျာဗြဝတဳကဵု ဍုၚ်တၟိ လေဝ်ကေကဝ်တံဂှ် ဒပ်ကဝ်မယှေန်ပၞာန်ထပက်ကရောၚ်ပၞာန် သီဂွံဏာဒဵုလက်ဟိုတ်ကီုရ။
ဒပ်ကဝ်မယှေန်ပၞာန်ဝွံ ဍုၚ်လေဝ်ကေကဝ် သၟးဟွံက အပ္ဍဲကဵု တိဍာ်မဟာဒပ် ၆ ဂၠံၚ်ကအ်ကြိက်-လှာဒကှ်၊ ကျာ်မြဟ်-လှာဒကှ်ကဵု ပ္ဍဲသ္ကုတ်ဇြပ်ဗု-ကျာ်ပိတံဂှ် ချဳဒရာၚ်မံၚ်ပရေၚ်ပၞာန်တုဲ ပေါဲဗတိုက်ဆက်ဒှ်မံၚ်ကဵု ဂကောံဇြဟတ်ပၠန်ဂတး KNLA တံရဂှ် ဂွံတီလဝ်ရ။
ပရိုၚ်-သြၚ်လောန်တိုၚ်မ်
Photo – Social Media