တနင်သဳ၊ သိပ်တမ်ပါ ၂၅
ဒၞာဲပေါဲဗတိုက် အကာဲအရာကြံၚ်မ္ၚိုဟ်က္တဵုဒှ်မံၚ် ပ္ဍဲကဵုခရိုၚ်ဗိက် ပွိုၚ်ဍုၚ်တနၚ်သဳ ဂၠံၚ်ဇၞော်ကၟိုန်ဍုၚ်စၟတ် ၈ ဝွံ စနူကဵု ဂိတုသိပ်တမ်ပါ ၂၂ တုဲ အခိၚ်ဗ္တံ ညံၚ်ဟွံဂွံအာကၠုၚ်လ္တူဂၠံၚ်ဂှ် ဒပ်စဵုဒၞာညးဍုၚ်ကွာန် ပွိုၚ်ဍုၚ်တနၚ်သဳ လလောၚ်ပတိတ်ကဵုလဝ်သတိရ။
စနူကဵုအခိၚ်သၞာံမံက်ဏံရ သွက်ဂွံကလေၚ်ထိၚ်အာ ဂၠံၚ်ဒေသပယျဵုသေံ- မဝ်တံၚ်ဂှ် ဒပ်ကဝ်မယှေန်ပၞာန် စကာဇြဟတ် ဗွဲမဂၠိုၚ်တုဲ ထပက်မံၚ်ကရောၚ်ပၞာန်ဂှ်တှ်ေ ဒဵုကဵုလၟုဟ်ဏံ အကြာၜါ်လပါ် ပေါဲပၞာန်ကြပ်အရိုဟ်တ္ၚဲ ဒှ်မံၚ်ဖိုအ်ရောၚ်။
ပြဟ်ဟ်ဏံ ပ္ဍဲပွိုၚ်ဍုၚ်တနၚ်သဳ သ္ကုတ်ဂၠံၚ်ကၟိန်ဍုၚ် ဗိက်-တနၚ်သဳဂှ် အကြာဒပ်ကဝ်မယှေန်ပၞာန်ကဵု ဂကောံပၠန်ဂတးတံ နကဵု မါၚ်တံၚ် ဟတိုဟ်မံၚ်တုဲ ပေါဲဗတိုက်အရိုဟ်တ္ၚဲဒှ်မံၚ်ဂှ်ကီု နူကဵုၜၚ်ကျာ ဒပ်ကဝ်မယှေန်ပၞာန်ဂှ်လေဝ် ကြဳဖျေံဗုမ်ဗတိုက်မံၚ်ဆက်ဆက်ကီုရ။
ဟိုတ်ဂှ်ရ နကဵုမိမညးဍုၚ်ကွာန်အာတရဴတံဝွံ လ္တူဂၠံၚ်ဇၞော်ကၟိန်ဍုၚ် စၟတ် ၈ ဂှ် အခိၚ်အကြာဗ္တံ ၆ နာဍဳကဵု စဵုကဵုနူဂယး ၆ နာဍဳ ညံၚ်ဟွံဂွံအာတရဴဂှ် လလောၚ်ပတိတ်လဝ်ပရိုၚ် သ္ဂးရ။
လောန်ကၠုၚ်ဂိတုသိပ်တမ်ပါ ၂၂ ဂှ်လေဝ် နူကဵုသိၚ်ခေါန် ကွဳစက်ဖ္ဍိုက်နၚ်မၞိဟ်ယဲဒပ်ကဝ်မယှေန်ပၞာန်တံဂှ် ဒပ်ပံၚ်တောဲဂကောံဇြဟတ်ပၠန်ဂတးတံ ပန်ဗတိုက်ဏာလဝ် ပ္ဍဲကရပ်ၜါန်လမောတ်ရဂှ် ညးတာလျိုၚ် လလောၚ်ပရိုၚ် ဒပ်စဵုဒၞာညးဍုၚ်ကွာန်ပွိုၚ်ဍုၚ်တနၚ်သဳ ဟီုကဵုဌာန်ပရိုၚ်သြၚ်လောန်တိုၚ်မ်ရ။
မွဲလပါ်ပၠန် ပ္ဍဲပွိုၚ်ဍုၚ်တနၚ်သဳ အကြာကရပ် ကွာန်ၜါန်လမောတ်၊ မဝ်တုၚ်၊ သိၚ်ခေါန်တံဂှ် နူကဵုဒပ်ကဝ်မယှေန်ပၞာန်ပန်မံၚ်ကဵုလွဟ်ဇၞော်ကီု နူကဵုပၞာန်ကျာလေဝ် ကြဳဖျေံဗုမ်ဗတိုက်မံၚ်ကီုတုဲ ညးဒေသ သီုအလုံကွာန်ဖအိုတ်တံ ဒးဂြိပ်ပါဲမံၚ်အိုတ်ရောၚ်ဂွံတီလဝ်ရ။
ပရိုၚ်-သြၚ်လောန်တိုၚ်မ်
Photo – PDF