မတ်မလီု ၊ သိပ်တမ်ပါ ၂၅
ဗော်ညဳသၟဟ်မန် ဖျေံလဝ်သ္ဇိုၚ်တွဵုရးမန်ဂှ် ပ္ဍဲကဵုပေါဲရုဲမာဲကဝ်မယှေန်ပၞာန်ကၠောန်အာဏံညးစၞး ၃၇ ဒၞာဲ သွက်ဂွံလုပ်ပြိုၚ်အာပတိုန်လဝ်စရၚ်တုဲအာယျရောၚ် ညးအခေါၚ်ဟီုဂးနွံ နာဲတာန်ယှိုဲ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
သွက်စၠတ်ထဝ်ညးဍုၚ်ကွာန်ဂှ် ၆ တၠ၊ သွက်စၠတ်ထဝ်ကောန်ဂကူ သၞောတ်သ္ပစၞး PR ၆ တၠကဵု သၞောတ်ညးဂွံဂၠိုၚ်ဇၞး FPTP ၆ တၠတံဂှ် နူကဵု ဗော်ညဳသၟဟ်မန် ပတိုန်လဝ်စရၚ်ရ။
တုဲပၠန် သွက်စၠတ်ထဝ်တွဵုရး သၞောတ်သ္ပစၞး PR ဂှ် ၁၀ တၠ၊ သၞောတ်ညးဂွံဂၠိုၚ်ဇၞး FPTP ၉ တၠ အပံၚ်ဖအိုတ် ၃၇ တၠ ပတိုန်လဝ်စရၚ်နွံရ။
အပ္ဍဲကဵုရုဲစှ်အလံၚ်ညးစၞးတံဝွံ ညးကေၚ်လုပ်လဝ်ပေါဲရုဲမာဲ ၂၀၂၀ တံကီု ညးပါလုပ်ဂကောံကေၚ်ကာဗဟဵုတံကီု ကေုာံ ကမ်မတဳဗဟဵုတံဂှ်ကဵုဖျုန်တုဲ ရုဲစှ်ကၠုၚ်လဝ်ရောၚ် နာဲတာန်ယှိုဲ ဟီုရ။
“အဓိက ပ္ဍဲကဵုပေါဲရုဲမာဲ ၂၀၂၀ တေံ စွံအဓိကကဵု ညးစၞးစၠတ်ထဝ်တံတုဲ ကဵုလဝ်ဖျုန်ရ၊ မွဲပၠန်ဂှ် ကဵုလဝ်ဖျုန်ကဵု ကမ်မတဳကေၚ်ကာဗဟဵု CEC တံရ၊ တုဲပၠန် ကမ်မတဳဗဟဵု အဆံၚ်ၚ်တံ၊ ကဵုလဝ်ဖျုန်ရုဲစှ်လဝ် ဗီုတံဏံနွံ” သာ်ဝွံ သ္ဂးရ။
တုဲပၠန် ညးစၞးအလံၚ်အမာတ်တံဂှ် မူဝါဒဗော်ဟွံက ဍာ်ဒကေဝ်အစောန်စရာဲအတိုၚ်ကဝ်မယှေန်ပၞာန် ခုတ်စၟတ်လဝ်တံ မ္ဒးကိတ်ညဳကီုရောၚ်ညးဆက်ဟီုရ။
ပေါဲရုဲမာဲကဝ်မယှေန်ပၞာန် ကၠောန်အာပ္ဍဲကဵုတွဵုရးမန်ဂှ် သွက်စၠတ်ထဝ် ညးဍုၚ် ၁၀ ဒၞာဲ၊ သွက်စၠတ်ထဝ်ကောန်ဂကူ ၁၂ ဒၞာဲ၊ သွက်စၠတ်ထဝ် တွဵုရး ၂၀ ဒၞာဲ၊ သွက်ဒၞာဲဆန္ဒမာဲ ကောန်ဍုၚ်အရၚ် ၃ ဒၞာဲ အပံၚ်ဖအိုတ်ခုတ်စွံလဝ် ဒၞာဲဆန္ဒမာဲ ၄၅ ဒၞာဲနွံရ။
နကဵုဗော်ညဳသၟဟ်မန်ဂှ် ပ္ဍဲပေါဲရုဲမာဲ ၂၀၂၀ တေံ အလုံဒၞာဲဆန္ဒမာဲ ၄၅ ဒၞာဲကေၚ်လုပ်ပြိုၚ်လဝ်တုဲ ဂွံလဝ်ဇၞး ၁၂ ဒၞာဲရ။
ပရိုၚ်-သြၚ်လောန်တိုၚ်မ်
Photo – MUP