နေပျဳတဝ် ၊ သိပ်တမ်ပါ ၂၅
ပ္ဍဲကဵုဂိတုအံက်တဝ်ပါ ၁၅ တ္ၚဲသဘၚ်ကၞာ ထပက်စၟတ်တဲလိက်ကသုက် ပရေၚ်ဒေါအ်ပန်ပၞော် အလုံဍုၚ်မွဲ NCA ပေၚ်ကၠောံသၞာံဂှ် သွက်ဂွံကၠောန်ဗ္ဒျ်အာပေါဲသဳကၠဳရုၚ်ကမၠောန် စပ်ကဵုပရေၚ်ၜိုဟ်လလမ် နွံမံၚ်ရောၚ်ဂွံတီရ။
ဂကောံမဟာမိတ်ကောန်ဍုၚ်အရၚ်ရပ်လွဟ် ၇ ဂကောံ ထပက်လဝ်စၟတ်တဲဒေါအ်ပန်ပှော်တံ ပ္ဍဲသိပ်တမ်ပါ ၂၃ ဂှ် သ္ကိုပ်သ္ကကၠောန်ဗ္ဒျ်လဝ်ကောံဓရီုတုဲ သွက်သဘၚ်ကၞာ NCA ပေၚ်ကၠောံသၞာံကဵု ကိစ္စပေါဲသဳကၠဳ ရုၚ်ကမၠောန်တံဂှ် သဳကၠဳလဝ်ရောၚ် လလောၚ်ပတိတ်လဝ်ပရိုၚ်ရ။
ပ္ဍဲကဵုတ္ၚဲ NCA ပေၚ်ကၠောံ ၁၀ သၞာံဏံ စပ်ကဵုပရေၚ်ၜိုဟ်လလမ်တုဲ သွက်ဂွံကၠောန်အာပေါဲသဳကၠဳရုၚ်ကမၠောန် အစဳဇန်နွံမံၚ်ရောၚ် ညးအခေါၚ်ဟီုဂးနွံ ဂကောံမဟာမိတ်ဒေါအ်ပန်ပှော် ၇ ဂကောံ သ္ကိုပ်ဗိုလ်ဇၞော် သဝ်ကျဝ်ညောအ် ဟီုကဵု ဌာန်ပရိုၚ် သြၚ်လောန်တိုၚ်မ်ရ။
“ပြဟ်ဟ်ဏံ အရာပကတိ ပိုဲဒးဆဵုဂဗမံၚ် အကာဲအရာပရေၚ်ဍုၚ်ကွာန်တံဂှ် ဗွိုၚ်ပၞာန်သၠဲလးမံၚ် ဗွဲမလောန်ကွေံရောၚ်။ အကာဲအရာ ပရေၚ်ဆဵုဂဗသဳကၠဳဟီုတှ်ေ မုက်ဍောတ်မတ်သဝ် ကွေံကွေံ။ အပ္ဍဲကဵုအကာဲအရာ ကြပ်စိုပ်မံၚ်ကၠေံအာဏံ ပိုဲသ္ပအစာံကဵု တ္ၚဲ NCA ပေၚ်ကၠောံသၞာံတုဲ ဗါ်မွဲလတဲ ပိုတ်ၜါသ္ကုတ် ညံၚ်ပၟာဏံ သွက်သ္ဂောံအာ လညာတ်ညးမဆေၚ်စပ်ဇၟာပ်ပ်ဒိုဟ်တံ ညံၚ်ဂွံသၠာဲဂတးအာမာန် ပရေၚ်ဂိုတ်ဂစာန်ရေၚ်တၠုၚ်အာ” သာ်ဝွံ သ္ဂးရ။
အပ္ဍဲကဵုဍုၚ်ဗမာ ဟိုတ်နူကဵု ဗွိုၚ်ပၞာန်သၠဲလးကၠုၚ်မံၚ်တုဲ သၟဝ်အကာဲအရာအကြာတၚ်ဝါတ်ဂါတ်နာနာကဵု တၚ်ကော်ဆောဗွဲမဂၠိုၚ်ဏံ နူကဵုပေါဲသဳကၠဳရုၚ်ကမၠောန်ဏံ ကသပ်လညာတ်တၟိတၟိတံမံက်တိုန်ကၠုၚ်မာန်ဟာ အရာသွက်ဂွံစၟဳစတံ နွံမံၚ်ရောၚ်ညးဆက်ဟီုရ။
တုဲပၠန် ဝိုၚ်သဳကၠဳဆဵုဂဗတက်ကျာတံ ညံၚ်ဂွံကလေၚ်မံက်တိုန်ပၠန် ပကောံအာလညာတ်သဘဴလစွံစိုတ် နူကဵုဇၟာပ်ပ်ဒိုဟ်တံဂှ်ဒုၚ်သ္ဇိုၚ်တုဲ သွက်ဂွံသၠာဲဂတးအာလညာတ် တၠပညာဂၠးကဝ်ကဵုအပ္ဍဲဍုၚ်တံကီု သီုကဵုက္ဍိုပ်သ္ကိုပ် ဂစာန်လဝ် ပရေၚ်ၜိုဟ်လလမ်တံကီုရောၚ် သ္ဂးရ။
အပ္ဍဲကဵု ပေါဲသဳကၠဳရုၚ်ကမၠောန်ဏံဝွံ နကဵုဂကောံမဟာမိတ် ကောန်ဍုၚ်အရၚ်ရပ်လွဟ် ၇ ဂကောံဏံ သွက်ဂွံပတိုန်ထ္ၜး သဳကၠဳအာ ပရူပရာတၞဟ်ဟၟဲကီုလေဝ် သွက်ဂွံပညဳပညပ်အာကဵု ကမ်မတဳ ထမံက်ရုပ်ရဴ ပရေၚ်ညဳသၟဟ်ကောန်ဂကူကဵု ပရေၚ်ၜိုဟ်လလမ် NSPNC နွံရောၚ် ဂွံတီရ။
တုဲပၠန် စပ်ကဵု ပရေၚ်ကၠောန်ဗ္ဒျ်သဘၚ်ကၞာ တ္ၚဲ NCA ပေၚ်ကၠောံ ၁၀ သၞာံ အကြာၜါလပါ်မ္ဒးပညဳပညပ်လဝ်မဒှ်တုဲ စနူကဵုဖိုရာမ်ပရေၚ်ၜိုဟ်လလမ်တုဲအာဂှ်လေဝ် အလန်ကဵုအလန် ကေၚ်သဳကၠဳကၠုၚ်လဝ်တုဲမံၚ်ရောၚ် သ္ကိုပ်ဗိုလ်ဇၞော်သဝ်ကျဝ်ညောအ် သောၚ်ကလးရ။
ဂကောံမဟာမိတ် ၇ ဂကောံ သ္ကိုပ်သ္ကကၠောန်ဗ္ဒျ်လဝ်ကောံဓရီု ဂှ်လေဝ် စပ်ကဵုပရေၚ်သဘၚ်ကၞာ NCA ကဵု အစဳဇန်တိုန်စိုပ် ပေါဲရုၚ်ကမၠောန် NCA တံကီု ပရေၚ်အာကၠုၚ်မံၚ်စံၚ်ကဵု ကိစ္စဒၞာဲဇူဒီုတံဂှ်လေဝ် ပညဳပညပ်သဳကၠဳလဝ်ကီုရောၚ် သ္ဂးရ။
လောန်ကၠုၚ်အကြာသတ္တဟဂှ်လေဝ် ဂကောံအလဵုအသဳကဝ်မယှေန်ပၞာန်တံကီု အကြာ NSPNC ကဵု ကမ်မတဳသ္ကိုပ်သ္ကကၠောန်ဗ္ဒျ်တံ စပ်ကဵုသဘၚ်ကၞာ NCA ပေၚ်ကၠောံသၞာံတုဲ သွက်လၟေၚ်ကမၠောန်ပံၚ်တောဲပညဳပညပ် ပေါဲသဳကၠဳတံဂှ်ကၠောန်လဝ်ကောံဓရီုနွံရ။
ပ္ဍဲကဵုကောံဓရီုဏံ NCA ညံၚ်ဂွံဒှ် ညးမဂိုတ်ဂစာန်လဝ်တံကီု ညးထပက်လဝ်စၟတ်သမ္တီတံကီု သက်သဳတံကီု ဂကောံ ကောန်ဍုၚ်အရၚ်ရပ်လွဟ်ဂမၠိုၚ်ကီု ညးစၞးဗော်ပရေၚ်ဍုၚ်ကွာန် တၠပညာအပ္ဍဲဍုၚ်မ္ၚးဍုၚ်၊ ကွးဘာတက္ကသိုလ်ဂမၠိုၚ်ကဵု ကော်ဘိက်အာ ညးလ္ၚတ်နာနာတံကီုရောၚ် ကဵုလဝ်သမ္တီနွံရ။
တုဲပၠန် နကဵုညးမတိုန်စိုပ်တံပၠန်ဂှ် အပ္ဍဲကဵုပွိုၚ် ၁၀ သၞာံဏံ ဗီုပြၚ်ထမံက်ကၠုၚ် NCA ကီု၊ လ္တူတင်အံၚ်ဇၞးလဝ်ကီု ခန်လ္ၚတ်နာနာတံဂှ် ဗီုဂွံလဝ်လညာတ်သဘဴလစွံစိုတ် သွက်ဂွံသၠာဲဂတးအာ ပရေၚ်ဆဵုဂဗတံ ဗွဲမ္ၚးဝိုၚ်သဳကၠဳအာမာန်ရောၚ် ကဝ်မယှေန်ပၞာန်လလောၚ်ပတိတ်လဝ်ပရိုၚ်နွံရ။
ပရိုၚ်-သြၚ်လောန်တိုၚ်မ်
Photo – MOI