ကြုၚ်ဒဵု၊ သိပ်တမ်ပါ ၂၆
ပ္ဍဲတွဵုရးကရေၚ် ပွိုၚ်ဍုၚ်ကအ်ကြိက် ကရပ်ဍုၚ်ကြုၚ်ဒဵု ဗ္ဒိုပ်ကုန်စေတဳ ဗျက္ခသီဟ နွံမံၚ်လ္တူဒဵု ကြုၚ်ဗိုၚ် ပ္ဍဲကဵုဂိတုသိပ်တမ်ပါ ၂၃ ဂှ် ဒပ်ကဝ်မယှေန်ပၞာန်ဗမာ ကလေၚ်သီကေတ်တုဲ ဂၠံၚ်ဇၞော် ကြုၚ်ဒဵု-မြပတိုၚ်-နဗူဂှ် ခြာဟွံလံ ကလေၚ်ပံက်အာမာန်ရောၚ် အတိုၚ်လဝ်ဗဳပၞာန်တံဟီုလဝ် ဂွံတီရ။
သ္ကုတ်ဂၠံၚ်ဇၞော် ကြုၚ်ဒဵု-ကအ်ကြိက်ဂှ် နူကဵုဂိတုဂျူလိုင်တေံ ဒပ်ကဝ်မယှေန်ပၞာန်ကလေၚ်ထိၚ်ချုက် သီကေတ်မာန်အာတုဲဗွဲကြဴဏံ ဂၠံၚ်ဇၞော် ကြုၚ်ဒဵု-နဗူ၊ ကအ်ကြိက်-လှာဒကှ် ကေုာံ အကြာပွဳပွူ ကွာန်ကရပ်ဇိုၚ်ဍုၚ်ကြုၚ်ဒဵုတံဂှ် ဆက်ထပက်မံၚ် ကရေၚ်ပၞာန်ဖိုအ်ရ။
သွက်ဂွံကလေၚ်သီကေတ်အာ ဗ္ဒိုပ်ကုန်စေတဳ ဗျက္ခသီဟ နွံမံၚ်လ္တူဒဵု ကြုၚ်ဗိုၚ် ပ္ဍဲဂၠံၚ်ဇၞော် ကြုၚ်ဒဵု-မြပတိုၚ်-နဗူဂှ် နူကဵုဒပ်ကဝ်မယှေန်ပၞာန် ပွိုၚ်မွဲဂိတုပြၚ်ၚ် ထပက်မံၚ်ကရောၚ်ပၞာန်ဂှ်ရ ဒှ်မံၚ်ပေါဲဗတိုက်ကဵု ဒပ်ပၠန်ဂတးပံၚ်တောဲ KNLA တံတုဲ ရဲလပါ်ဒပ်ကဝ်မယှေန်ပၞာန်တံ ဒးဘဲဝပ်ချိုတ်ဂၠိုၚ်မံၚ်ရောၚ် နူတမ်ရိုဟ်ကၞက်ပရိုၚ်ဒေသတံ သ္ဂးရ။
ညံၚ်ဂွံကလေၚ်သီကေတ်မာန် စကာဇြဟတ်ပၞာန် နကဵုကၠမ်တံတုဲ ထပက်ကၠုၚ်ပၞာန် ဗ္ဒိုပ်ကုန်စေတဳဗျက္ခသီဟ နွံမံၚ်လ္တူဒဵု ကြုၚ်ဗိုၚ်ဆက်က်ဂှ်ရ ပ္ဍဲသိပ်တမ်ပါ ၂၃ ဂှ် သီဂွံဏာတုဲ ဒပ်ပၠန်ဂတးပံၚ်တောဲတံ ဒးကလေၚ်ဆုတ်တိတ်အာရဂှ် နူတမ်ရိုဟ်ကၞက်ပရိုၚ်ဒေသတံ ဟီုလဴရ။
ဗ္ဒိုပ်ကုန်စေတဳ ဗျက္ခသီဟဂှ် ဒပ်ကဝ်မယှေန်ပၞာန် ၜိုန်ရကလေၚ်သီဂွံကီုလေဝ် ပ္ဍဲသ္ကုတ်ဂၠံၚ်ဇၞော် ကြုၚ်ဒဵု-မြပတိုၚ်-နဗူ ကေုာံ ဗ္ဒိုပ်ဒဵုသြိဟ်ပါ်(ရၚ်ကွဲတောၚ်) တံဂှ် ကလေၚ်သီကေတ်လဝ်ဟွံမာန်ဏီတုဲ ပ္ဍဲလပါ် ဒဵုသြိဟ်ပါ်တံဂှ် ဒပ်ကဝ်မယှေန်ပၞာန် ကလေၚ်ထပက်ပၞာန်ပၠန်ရောၚ် ညးဒေသတံဟီုဂးမံၚ်ရ။
ပ္ဍဲကဵုပေါဲဗတိုက် သ္ကုတ်ဂၠံၚ်ဇၞော် ကြုၚ်ဒဵု-မြပတိုၚ်-နဗူဂှ်တှ်ေ နူကဵုဒပ်ကဝ်မယှေန်ပၞာန် နကဵုလွဟ်ဇၞော်၊ သီုကဵုဒရုၚ် ၜၚ်ကျာပၞာန် ကြဳဗုမ်ဗတိုက်မံၚ် အကြာကွာန်ဂမၠိုၚ်တံတုဲ စမြိုၚ်ဒၞာဲဌာန်ဒတန်သာသနာတံကဵု သ္ၚိဌာန်ညးဍုၚ်ကွာန်တံ ဗွဲမဂၠိုၚ် ဒးအာဘဲလွဟ်မကမ်ဂှ်ရ နူကွာန်ကရပ်ဗ္ဒာဲဗ္ဒာဲ ကြုၚ်ဗိုၚ်၊ ကၞောတ်ကြုၚ်၊ ကအ်ဒဵုဇြိုၚ်၊ ကျာအေန်သုတံ ညးဒေသဂမၠိုၚ် ဒးဂြိပ်ပါဲအာ ဒၞာဲကဵုဗၠးဘဲဒဏ်တံရ။
ဒပ်ကဝ်မယှေန်ပၞာန်တံ ၜိုန်ရထိၚ်ချုက်ဂွံလဝ် သ္ကုတ်ဂၠံၚ် ကြုၚ်ဒဵု-ကအ်ကြိက်ကီုလေဝ် အကြာကွာန် ပွဳပွူဍုၚ်ကြုၚ်ဒဵုတံဂှ် ထိၚ်ချုက်ဟွံမာန်ဏီ ကရောၚ်ပၞာန်တံဆက်ထပက်မံၚ်တုဲ ပေါဲဗတိုက်ဆက်ဒှ်မံၚ်ဂှ်ရ ညးဒေသတံဟွံဂံၚ်ကလေၚ်စဴ သ္ၚိဌာန်ညးတံဏီ ဂွံလဝ်ပရိုၚ်ရ။
ပရိုၚ်-သြၚ်လောန်တိုၚ်မ်
Photo – SAC