နေပျဳတဝ် ၊ သိပ်တမ်ပါ ၂၆
ပေါဲရုဲမာဲညံၚ်ဂွံလီုအာ တွံဟီုဂး ပလာတ်ပထုဲမံၚ်ဂးတုဲ ကဝ်မယှေန်ပၞာန် ပံက်အမှုကဵု KNU၊ AA၊ ကံၚ်သဳဍုၚ်ချေၚ်တံ နကဵုဥပဒေ ပွမစဵုဒၞာပေါဲရုဲမာဲရဂှ် နူကဵုဌာနဝန်ဇၞော် ကေၚ်ကာအပ္ဍဲဍုၚ်သၟဝ်တဲကဝ်မယှေန်ပၞာန် လလောၚ်တြးရ။
ပေါဲရုဲမာဲကဝ်မယှေန်ပၞာန်ကၠောန်အာဏံဂှ် နူကဵုဂကောံကောန်ဍုၚ်အရၚ်ရပ်လွဟ်တံကီု ဂကောံဇြဟတ်ပၠန်ဂတးတံကဵု ဒပ်ပၞာန်စဵုဒၞာညးဍုၚ်ကွာန် PDF တံ နူအခိၚ်ကၠာကၠာတေံရ ဗတိုက်သရိုဟ်အာရောၚ် ဟီုဂးလဝ်နွံရ။
လောန်ကၠုၚ် နူကဵုဂိတုအဝ်ဂတ် ၁၂ တေံဂှ်ရ သွက်လၟေၚ်ကမၠောန်ပေါဲရုဲမာဲ ညံၚ်ဂွံလီုလာ်အာ လ္တူမုက်လိက် Kayin National Union Facebook ပွမဟီုဂးဟီုတွံလဝ်တံဂှ် စောဲစပ်တုဲပံက်လဝ်အမှုကဵု ဥက္ကဌဗော်သွးကောန်ဂကူကရေၚ် KNU ပဒိုသဝ်ကွေဝ်ထူဝေန်ရ။
မွဲကရောံဓဝ် ကုဍိုပ်သ္ကိုပ် KNU ၁၁ တံကီုလေဝ် ပ္ဍဲဂိတုအဝ်ဂတ် ၃၀ ကဵု ဂိတုသိပ်တမ်ပါ ၉ တံဂှ် ပ္ဍဲကဵုဗဒိုပ်ဗၠာဲသၟိၚ် ၝောံဍုၚ်လိုၚ်ဗၠဲကဵု ဗဒိုပ်ဗၠာဲသၟိၚ်ကွာန်ပိုၚ်ကြုၚ်တံ နကဵုမဂၞန်အမှု (ပ) တံ ပံက်လဝ်အမှုမဒှ်ရ။
လပါ်ကဝ်မယှေန်ပၞာန် နကဵုဥပဒေပွမစဵုဒၞာပေါဲရုဲမာဲ လ္တူပံက်လဝ်အမှုကဵု ဍိုပ်သ္ကိုပ် KNU တံတုဲ နကဵုဌာန်ပရိုၚ်သြၚ်လောန်တိုၚ်မ် ကေတ်အဆက်ကဵု ညးအခေါၚ်ဟီုဂးနွံကီုလေဝ် ကလေၚ်ဟီုဂးနၚ်ဟၟဲဏီ။
လ္တူဂကောံ AA ကဵု PDF မွဲဂကောံ(စၟဳစၟတ်မံၚ်ဖိုအ်) ဂှ်လေဝ် ဖျေံလဝ် Drop Bomb ပ္ဍဲကဵု ဘာလကျာ် ပွိုၚ်ဍုၚ်လေဝ်မျက်နှာ အခိၚ်ကၠောန်မံၚ်ပရေၚ်ကဵုပညာ ကၠောန်ထ္ၜးစမ်ၜတ်မံၚ်စက်စုတ်မာဲတံဂးတုဲ ကဝ်မယှေန်ပၞာန် ပံက်လဝ်အမှုကီုရ။
လ္တူဏံ နကဵုဒပ်ပၞာန်အာရက္ခ AA ညးအခေါၚ်ဟီုဂးနွံ ဥူခိုၚ်သုခ ဂှ်တှ်ေ ဒဒှ်ရ အပ္ဍဲကဵုဒၞာဲဏံ ညးတံဖျေံလဝ်ဗုမ်ဗတိုက်လဝ်ဟၟဲကီု ပရေၚ်ဏံ ဟွံဆေၚ်စပ်ကဵု AA ပုဟ် ဟီုဂးသှ်ခၠေဝ်လဝ်ရ။
“လပါ်ကဝ်မယှေန်ပၞာန် စကမဍေံတံ ဗီုစောဲစပ်လဝ် ပ္ဍဲကဵု ဘာလကျာ် ရးဧရာဝတဳ ပွိုၚ်ဍုၚ်လေဝ်မျက်နှာ ကွာန်ယေကျဳဂှ် ရဲလပါ်ပိုဲ ဖျေံဗုမ်ဗတိုက်လဝ် ညိလေဝ်ဟၟဲပုဟ်။ နကဵုလပါ် ကံၚ်သဳပၞာန်ပကီုပရာတ်တံရ ဍေံတံဖန်ကၠောန်ကေတ်လဝ်တုဲ ရန်တၟံနွံနွံ စောဲစပ်လဝ် ညးတၞဟ်တံရ။ စပ်ကဵုပရူတံဏံဂှ် ညိလေဝ်ဟွံဆေၚ်စပ်ကဵု ပိုဲပုဟ်” သာ်ဝွံ သ္ဂးရ။
ဥက္ကဌ ကံၚ်သဳဍုၚ်ချေၚ်ကီု သီကဵုဂကောံ ၁၇ တၠတံဂှ်လေဝ် ပ္ဍဲကဵုတွဵုရးချေၚ် ပွိုၚ်ဍုၚ်ထာန်တလာန်ဂှ် ပေါဲရုဲမာဲညံၚ်ဂွံလီု ဟီုဂးဟဝ်တွံလဝ်နွံတုဲ နူကဝ်မယှေန်ပၞာန်ပံက်လဝ်အမှု ပ္ဍဲဂိတုသိပ်တမ်ပါ ၄ ဂှ်ရ။
ပေါဲရုဲမာဲညံၚ်ဂွံလီု ဖန်ဖက်ရေၚ်တၠုၚ်လဝ် စောစပ်ပံက်လဝ်အမှုကဵု ပူဂဵုကဵုဂကောံတံဂှ်တှ်ေ နကဵုဥပဒေပွမစဵုဒၞာပေါဲရုဲမာဲ ၝောံပိုဒ် ၂၃(က) ကေတ်လဝ်အရေဝ်ရဂှ် အပ္ဍဲကဵုတၚ်လလောၚ်တြးဌာနဝန်ဇၞော်ကေၚ်ကာအပ္ဍဲဍုၚ် ထမံက်ပတိတ်လဝ်ရောၚ်။
နကဵုဥပဒေပွမစဵုဒၞာပေါဲရုဲမာဲ ၝောံပိုဒ် ၂၃(က) ဂှ်မ္ဂး ယြဴညးလဵုမွဲဟွံဟီု ဖံက်ပကဝ်ၜက်ၜေတ်ပရေၚ်ဒၞာတာလဝ်မ္ဂး အောန်အိုတ်ဒဏ်ထံၚ် နူကဵု ၃ သၞာံ ဒဵုကဵု ၇ သၞာံဟွံက ဒဏ်သြန်လဝ်ဖျေံမာန်ရောၚ် ချူခၞံလဝ်သၞောဝ်ရ။
မွဲလပါ်ဂှ်ပၠန် နူကဵု တေဝ်လဳဂရာန် မဳဒဳယာ “ခေတ်သစ်” ကဵု Hlaing Info တံဂှ် ပေါဲရုဲမာဲညံၚ်ဂွံလီု ညးဆဝ်ဗ္ၚုဟ်ချူမံၚ်တံကီု နူကဵုအကံက် Facebook ရဲလ္ဂုၚ်ကဵု ဍုၚ်ကျံက်ဖျူ ၂ တၠတံဂှ်လေဝ် ပံက်လဝ်အမှုကီုရ။
ကၠောန်ကၠုၚ်ပရေၚ်ကေတ်အရေဝ် ဗီုဗီုတံဏံဂှ်တှ်ေ နကဵုစိုတ်လေဝ်ညိမှ ညံၚ်ဟွံဂံၚ်ပလီုပေါဲရုဲမာဲဍေံတံဂှ် ဘပဠလဝ်ရောၚ် ညးအုပ်ကာ ကံၚ်သဳမဳဒဳယာဍုၚ်ဗမာ IPCM ဦးတိုဝ်ဇြဝ်လာတ် ဟီုကဵုဌာန်ပရိုၚ်သြၚ်လောန်တိုၚ်မ်ရ။
“ဥပဒေစဵုဒၞာပေါဲရုဲမာဲဍေံတံဂှ် နူတမ်ဝါဒိတေံရ ရန်တၟံနွံနွံ နကဵုစိတ်ဂှ်မှ ညိညံၚ်ဟွံဂံၚ်ပလီု ဍေံတံဘပဠလဝ်ဏောၚ်။ လ္တူဍိုပ်သ္ကိုပ်ကောန်ဍုၚ်အရၚ်တံ PDF တံ ဍေံတံကေတ်အရေဝ်ဗီုဏံဂှ်မှ ပေါဲရုဲမာဲအလီ ဟွံလုပ်သၞောဝ်ဟီုဂှ် ပဵုတုဲမံက်ကၠးတိုန်မံၚ်။ ယာလဝ်မြ ထ္ၜးလဝ်သေနာတ်တုဲ ကၠောန်အာပေါဲရုဲမာဲဏောၚ်ဟီုဂှ် ပဵုတုဲကၠးတိုန်” သာ်ဝွံ သ္ဂးရ။
ဂိတုသိပ်တမ်ပါ ၈ ဂှ်လေဝ် ပ္ဍဲကဵုရးမာန္တလေဝ် ပွိုၚ်ဍုၚ်မဟာအံၚ်မျေၚ်ဂှ် ပေါဲရုဲမာဲညံၚ်ဂွံလီု ညးတြးလဝ်တၞးလိက်ဆဝ်ဗ္ၚုဟ် ညးတြုံ ၄ တၠကဵု ညးဗြဴ ၂ တၠ (အဃောစၟတ်မံၚ်) တံဂှ် နကဵုဥပဒေပွမစဵုဒၞာပေါဲရုဲမာဲ ၝောံပိုဒ် ၂၃(က) ပံက်လဝ်အမှုကီုရ။
တုဲပၠန် အကြာပွိုၚ်ဍုၚ်ဇြပ်ဗုကဵုဍုၚ်ရေဝ် ညးမရပ်ဏာလဝ် ဥက္ကဌ ဗော် “ပြည်သူ့ရှေ့ဆောင်ပါတီ” ပွိုၚ်ဍုၚ်သဓီု ညးမပါလုပ် ၄ တၠဂှ်လေဝ် စၟဳစၟတ်မံၚ်တုဲ နကဵုဥပဒေပွမစဵုဒၞာပေါဲရုဲမာဲ ၝောံပိုဒ် ၂၃(က) သွက်ဂွံပံက်အမှု ဆက်တုဲဖန်ဖက်မံၚ်ရောၚ် ကဝ်မယှေန်ပၞာန် သ္ဂးရ။
ပ္ဍဲကဵုဥပဒေပွမစဵုဒၞာပေါဲရုဲမာဲ ၝောံပိုဒ် ၂၃(က) ဂှ် မၞိဟ်တံနကဵုဂကောံ ယဝ်ရ ဖံက်ပကဝ်လဝ်ရောၚ် ကၠးမးမ္ဂး ဒဏ်ထံၚ်ဗွဲမအောန် နူကဵု ၅ သၞာံ ဒဵုကဵု ၁၀ သၞာံဟွံက ဒဏ်သြန်တံလေဝ်ဖျေံအာမာန်တုဲ ပ္ဍဲကဵုၝောံပိုဒ် ၂၄(ခ) ဂှ်ပၠန်တုပ်ကဵုဒဏ်ဗီုတံဏံကီု ဖျေံမာန်ရောၚ်ထမံက်လဝ်နွံရ။
နူကဵုကၞောတ်ဂိတုဂျူလာၚ်တေံရ ကဝ်မယှေန်ပၞာန်ချူခၞံပတိုန်လဝ် သၞောဝ်ဥပဒေပွမစဵုဒၞာပေါဲရုဲမာဲဂှ်တုဲ ဗွဲကြဴထ္ၜးဟိုတ်ကဵု ဥပဒေဏံတုဲ ဗက်စၟဳစၟတ်ရပ်မၞိဟ်တံ ကၠောန်ကၠုၚ်မံၚ်ဆက်က်ရ။
ဟိုတ်ဂှ်ရ ဒဵုကဵုအခိၚ်လၟုဟ်ဏံ ပေါဲရုဲမာဲညံၚ်ဂွံလီု ညးဟီုဂးဟဝ်တွံမံၚ်တံကီု ထ္ၜးလဝ်ဆန္ဒတံကီုတြးလိက်နာနာတံကီု စောဲစပ်လဝ် ပရေၚ်ပလာတ်ပထုဲ ဂးတုဲ ပံက်အမှုကေတ်လဝ်အရေဝ် မၞိဟ်ပူဂဵု ၅၀ ပြၚ်နွံတုဲ အပ္ဍဲဏံရပ်ဂွံလဝ် ညးတြုံ ၁၂ တၠတုဲယျဂှ် ကဝ်မယှေန်ပၞာန် လလောၚ်တြးလဝ် ပရိုၚ်ရ။
ပရိုၚ်-သြၚ်လောန်တိုၚ်မ်
Photo – KNU/AA