ရေဝ်၊ သိပ်တမ်ပါ ၂၇
ပ္ဍဲကဵုတွဵုရးမန်ပွိုၚ်ဍုၚ်ရေဝ် ကရောၚ်ပၞာန်ဒပ်ကဝ်မယှေန်ပၞာန်ဗမာ ဂေတ်ထပက်အာကၠုၚ်မံၚ်အကြာကွာန်တံ ရပ်ကေတ်လဝ်ညးဒေသ ၃၀ ပြၚ်တုဲ စကာနကဵုဂဒံၚ်မၞိဟ်ရဂှ် ညးတာလျိုၚ်ဒပ်ပၠန်ဂတးတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
ကရောၚ်ပၞာန်ဒပ်ကဝ်မယှေန်ပၞာန်ဗမာ ဇြဟတ်ၜိုတ် ၃၀၀ ပြၚ် ပါ်လဝ် ပိကရောၚ်ပၞာန်တံ စနူသိပ်တမ်ပါ ၂၅ တုဲ နူကဵုကွာန်ဘာ ပွိုၚ်ဍုၚ်ရေဝ်ဂှ် တိတ်အာလပါ် အဒိၚ်၊ ဝါယာဟေၚ်၊ ဝါဟလိၚ်၊ ဇီုပရိုက်၊ ဗယိကၠဵုကွာန်တၟိကဵု လပါ်ကွာန်ဍောတ်တံ ထပက်မံၚ် ကရောၚ်ပၞာန်ရ။
ကရောၚ်ပၞာန်တံဏံ စိုပ်အာကွာန်အဒိၚ်ကဵု ဝါယာဟေၚ်တုဲ ညးတြုံညးဗြဴ နွံမံၚ်ပ္ဍဲကၠအ် ၃၀ တၠပြၚ်တံဂှ် ရပ်ကော်ဏာ သီုကဵုၜုၚ်တက်ပျဲပျာံလဝ်နွံမံၚ်ရဂှ် ကဍိုပ်ဂကောံ “ရေးဘီလူး” ဟီုရ။
ကရောၚ်ပၞာန်ဒပ်ကဝ်မယှေန်ပၞာန် ရပ်ကော်ဏာလဝ်ညးဒေသ ၃၀ ပြၚ်ဏံဂှ် စိုပ်သိပ်တမ်ပါ ၂၆ လေဝ် ဟွံကလေၚ်ဗလးကဵုဏီတုဲ မွဲကရောံကဵုကရောၚ်ပၞာန်ကော်ဏာ လပါ်ကွာန်တၟိမုဟ်ဒဵုတေံ သ္ဂးရ။
ၜိုန်ရ ကရောၚ်ပၞာန် ဒပ်ကဝ်မယှေန်ပၞာန် ထပက်မံၚ်ကီုလေဝ် ဒဵုကဵုအခိၚ်လၟုဟ် ကုဒပ်ပံၚ်တောဲ မဟာမိတ်ပၠန်ဂတးတံဂှ် ပေါဲဗတိုက်ဟွံဂွံဒှ်လဝ်ဏီ။
မွဲလပါ်ပၠန် ဒပ်ကဝ်မယှေန်ပၞာန် ဇြဟတ် ၁၀၀ ပြၚ်တံဂှ် ပ္ဍဲအကြာသ္ကုတ်ဂၠံၚ်ကွာန်ဘာကဵု ဍုၚ်ရေဝ် စွံလဝ်ကၚ်ဒမၠုက်တုဲ မာတ်ဆိုအ်စၟဳစၟတ်မံၚ်ရောၚ် ရဲဒပ်ပၠန်ဂတးတံဟီုရ။
ပရိုၚ်-သြင်လောန်တိုၚ်မ်
Photo – CJ