ကုလသမဂ္ဂ၊ သိပ်တမ်ပါ ၂၆
ပ္ဍဲကဵုဝင်ဂကူမၞိဟ်တံဝွံ ပရေၚ်ပြိုၚ်ပကာန် လွဟ်လက်နက်ပလီုပလာ် ဇြဟတ်ဇၞော်အိုတ်တံ က္တဵုဒှ်မံၚ်ရဂှ် သမ္မတယူခရုၚ် ဗိုလိုဒဳမာ ဇဳလန်သကဳဟီုဏာ ပ္ဍဲသိပ်တမ်ပါ ၂၄ ဂှ်ရ။
နကဵုပၟိက်ဆန္ဒ သမ္မတရတ်ယှာ ဗလာဒဳမာ ပူတေန်မ္ဂး မိက်ဂွံထပ်သၠဲပတိတ် ပ္ဍဲမုက်ပၞာန် ယူရောပ်နွံမံၚ်တုဲ နူကဵုပွဳဗွိုၚ်ဂၠးကဝ်တံ ညံၚ်ဂွံတာဒၞာအာ ညးတေံဂှ် ဇဳလန်သကဳ ဗတိုက်ဖအောဝ် ဟီုဂးဏာရ။
ရံၚ်အာ ပရေၚ်ဂၠးကဝ်အခိၚ်တ္ၚဲဏံမ္ဂး ကုလသမဂ္ဂကီု နကဵုဂကောံဍုၚ်ဇြဟတ်ဍိုန်လျ မပါလုပ်မံၚ်ပ္ဍဲကဵု ဂကောံဂၠးကဝ်တံဂှ် တာဒၞာကဵုပေါဲပၞာန် ယူခရုၚ်၊ ဂါဇာ၊ သူဒါန် ကဵု ဒၞာဲတၞဟ်ဟ်တံ ဟွံမာန်ဒှ်မံၚ်တုဲ ဍုၚ်တံဏံသွက်ဂွံဂျိုၚ်တဴအာဟီုဂှ် သၞောဝ်ဥပဒေဂၠးကဝ်တံ ကဵုအထံက်အပၚ်ဟွံမာန် ဒှ်မံၚ်ရောၚ် ဇဳလန်သကဳဟီုဏာရ။
ညးလဵုတံ ဆက်ဂျိုၚ်တဴအာရောဟီုဂှ် လွဟ်လက်နက်တံဟေၚ် ဆက်ကဵုအာသ္ဂုတ်သွာတ်တံရောၚ်။ သအာၚ်နူကဵု မိဿဟာဲကဵု လွဟ်လက်နက်တံတုဲ မုအရာလဵုမှ တၚ်ဒုၚ်လျိုၚ်ဟၟဲပုဟ် သမ္မတယူခရုၚ် ဟီုရ။
ဆဵုဂဗလဝ်ကဵု သမ္မတအမေရိကာန်တုဲ ဗြဲကြဴမွဲတ္ၚဲ အပ္ဍဲကဵုသဘၚ်သဳကၠဳဇၞော် ကုလသမဂ္ဂပေၚ်ကၠောံသၞာံဂှ် ဇဳလန်သကဳဟီုဏာ အတိုၚ်ဏံရ။
အခိၚ် ဆဵုဂဗလဝ်ကဵု သမ္မတထရဂှ် နကဵုတိဍာ် ယူခရုၚ် ဆောံလောံလဝ်သီုဖအိုတ်တံ ညံၚ်ကလေၚ်ဂွံနူကဵုရတ်ယှာဂှ် ကၠောန်သ္ပမာန်ရောၚ် ထရ ဟီုဂးလဝ်ကဵု ဇဳလန်သကဳရ။
နူကဵုအခိၚ်လၟုဟ်ဏံ တာဒၞာ ပူတေန်ဟွံမာန်မ္ဂး ၜက်နူကဵု ယူခရုၚ်တုဲ ညးတေံ စဂၠာဲတိုန်သၞမာန်ပၠန်ရောၚ် ဇဳလန်သကဳဟီုရ။
ဟိုတ်နူရတ်ယှာ ၜက်ၜေတ်လုပ်ကၠုၚ် ဗလးကျာဍုၚ်ဂကောံ နေတိုလ္ၚဵုတံ နွံကၠုၚ်တုဲ ဗလးပၞာန် ပဵုတုဲသၠဲကၠုၚ်မာန်ရောၚ် ပရေၚ်ဂွိၚ်ဂွာဲတံ နွံမံၚ်ရ။
ပြဟ်ဟ်ဏံ တမ်ရိုဟ်ကၞက်နကဵုအပိုၚ်အခြာရနွံမံၚ် ဗီုဍုၚ်ကဝ်ရဳယာသၟဝ်ကျာဂှ်မှ ကၠောန်ပတိတ်ကၠုၚ် လွဟ်လက်နက်ကဵုဘဲအန္တရာဲတံ မာန်ကၠုၚ်ရ ဇဳလန်သကဳဟီုလဝ်ရ။
အခိၚ်တ္ၚဲဏံ ဟိုတ်နူနဲကဲ ပရေၚ်ဂမြၚ်ဥာဏ်ပတောအ် AI တံလေဝ် ပါလုပ်ကၠုၚ်တုဲ အပ္ဍဲကဵုရာဇဝင် မၞိဟ်ဂၠးကဝ်တံ အရာ ပရေၚ်ပြိုၚ်ပကာန် လွဟ်လက်နက်ပလီုပလာ် ဇြဟတ်ဇၞော်အိုတ်တံ က္တဵုဒှ်မံၚ်ရောၚ် ဟီုဂးကၠုၚ် မဒှ်ရ။
Ref:AP