ဘာအၚ်၊ သိပ်တမ်ပါ ၂၇
ဒပ်ပၞာန်သီလဝ်အဝဵုဝွံ ညံၚ်ရဴပၞာန်ဖိတ်သေတ်တံကီု ၜက်ၜေတ်လဝ် အမှုရာဇဝတ် လ္တူညးဍုၚ်ကွာန်တံတုဲ ကောန်ပၞာန်တၟိ ဒးဒုၚ်ပကောံလဝ် နနဲအဓ္ဓမတံဂှ်လေဝ် စိုတ်သမ္တီ ညံၚ်ဂွံကၠေံအာ ပ္ဍဲကဵုမုက်ပၞာန်ဂှ် ဖျုၚ်ဗစကဵုလဝ်ဂဥုဲၜူမာဲတံရောၚ် နူကဵုဌာန်ဂအုပ်ပၞာန်ဗဟဵု ဒပ် KNLA လလောၚ်တြးလဝ် ပ္ဍဲဂိတုသိပ်တမ်ပါ ၂၆ ဂှ်ရ။
ဗီုပြၚ်တၠုၚ်လအာ ပရေၚ်ဍုၚ်ကွာန် မေန်အံၚ်လှိုၚ် အာမံၚ်နကဵုသၞောတ်ဖံက်ပၠန်ဏံဂှ် သွက်ဂွံသ္ပဍိုက်ထာဝရ ကု ညးဍုၚ်ကွာန်တံတုဲ အမှုရာဇဝတ်မၜက်ၜေတ်လဝ် သွက်ပရေၚ်ဂုဏ်ဖဵုဍေံဝွံ နကဵုဥပဒေညးဍုၚ်ကွာန်တံ တပ်ဒဏ်လ္တူဍေံဂှ် ညံၚ်ဂွံပါဲဓလေတ် အာမာန် စဵုဒၞာလဝ်ကဵုဒပ်ပၞာန်ရောၚ် ဌာန်ဂအုပ်ပၞာန်ဗဟဵု ဒပ်ပၞာန်ဗၠးၜး ကောန်ဂကူကရေၚ် KNLA သ္ဂးရ။
ဗီုပြၚ် ဒပ်ပၞာန်ဖိတ်သေတ်ကီုရ ပ္ဍဲကဵုဒပ်ပၞာန်ဗမာ ဇြဟတ်ဆောံလေၚ်ဂၠိုၚ်အာတုဲ ပတိတ်ကေတ်ဥပဒေ ယိုက်ဂၠေၚ်ဝန်ပၞာန်ဂှ်နနဲအဓ္ဓမ ဒးပကောံထပေၚ်ကေတ်လဝ်ကောန်ပၞာန်တံရောၚ် ပ္ဍဲလိက်လလောၚ်တြး ချူလဝ်ရ။
တုဲပၠန် ကောန်ပၞာန်တံကီု သ္ၚိကၟိန်အိန်ထံၚ်တံဂှ်ကီု နနဲဗီုပြၚ်နာနာကရေပ်ဓရတ်ကေတ်အရေဝ်ကီု၊ ပွမဘပဠကီု၊ ဒမၠုပၠုပ်လဝ်ယက်ဝါဒတံဂှ်လေဝ် ကၠောန်မံၚ်ဆက်က်နွံတုဲ ပ္ဍဲမုက်ပၞာန်ဂှ်လေဝ်ကောန်ပၞာန်တၟိ ပကောံကေတ်လဝ်နနဲအဓ္ဓမတံဂှ် စိုတ်သမ္တီဍေံတံ ညံၚ်ဂွံကၠေံအာ ဖျုၚ်ကဵုလဝ်ဂဥုဲၜူမာဲတုဲ သ္ပလဝ် ကၟာၚ်ဒုၚ်ပၞာန်ကဵုလမျီုမၞိဟ်တံရောၚ် ချူထမံက်လဝ်ရ။
ကမၠောန်မေန်အံၚ်လှိုၚ်ဏံဝွံ လမျီုကောန်ဇာတ်ညးဍုၚ်ကွာန်မွဲမွဲဂှ် ဆၜိုတ်တိုၚ်ဒပ်မွဲတၞုၚ်ဂှ်မှ ဟွံလဝ်လဝ်စိုတ်တုဲ နကဵုဂဒံၚ်မၞိဟ် အလုံဍုၚ်မွဲ စကာသုၚ်စောဲမံၚ်သၠဲသၠဲလးလးရောၚ်ဂှ်လေဝ် ဌာန်ဂအုပ်ပၞာန်ဗဟဵု ကဵုသမ္တီဟီုဂးလဝ်ရ။
ပြဟ်ဟ်ဏံ ဒၞာဲပေါဲဗတိုက်ဒှ်မံၚ် ဍုၚ်လေဝ်ကေကဝ်ကီု ပေါဲဗတိုက်လှာဒကှ်၊ ပ္ဍဲပေါဲဗတိုက်ကြုၚ်ဒဵုတံဂှ် လပါ် ဒပ်ကဝ်မယှေန်ပၞာန် စကာလဝ်ကောန်ပၞာန်တၟိဗွဲမဂၠိုၚ်တုဲ ဖျုၚ်လဝ်ဂဥုဲၜူမာဲ ကဵုအာဂတ ဒုၚ်ချိုတ်တုဲကဵုဗတိုက်မံၚ်ရောၚ် တမ်ရိုဟ်ကၞက်ပရိုၚ်ဒပ်ပၠန်ဂတးလ္ၚဵုတံ ဟီုရ။
ပ္ဍဲကဵုပေါဲဗတိုက်လေဝ်ကေကဝ်ဂှ် လပါ်ဒပ်ကဝ်မယှေန်ပၞာန် ကောန်ပၞာန်တၟိစှ်ေကၠုၚ်လဝ် နူဘာပၞာန်တံဝွံ ပ္ဍဲအကြာပေါဲဗတိုက် ပွိုၚ်မွဲသတ္တဟဏံဂှ် ချိုတ်မံၚ်ဂအုံကဵုဂအုံရောၚ် တမ်ရိုဟ်ကၞက်ပရိုၚ်ဒပ်ပၠန်ဂတးတံဟီုတုဲ ဂွံတီရ။
သွက်ဂွံကလေၚ်ဂွံဍုၚ်လေဝ်ကေကဝ်မာန်ဂှ် ဒပ်ကဝ်ပၞာန်တံ နကဵုလွဟ်ဇၞော်၊ ၜၚ်ကျာ၊ ဒရုၚ်တံ ဘိုၚ်ပန်မံၚ်တုဲ နူကဵုဗလးတိဂှ်ပၠန် ဇြဟတ်နကဵုလၟိဟ်ကၠမ်မ် ထပက်ပၞာန်တုဲဗတိုက်ကၠုၚ်မံၚ် မဒှ်ရ။
ပရိုၚ်-သြင်လောန်တိုၚ်မ်
Photo – KNLA