မတ်မလီု ၊ သိပ်တမ်ပါ ၂၇
ပ္ဍဲကဵုတွဵုရးမန် သွက်ရဲကၠုၚ်ဝေၚ် ခရိုၚ်မတ်မလီုတံမ္ဂး ကုညးရပ်လဝ်တၞးကာတ်ကောန်ဍုၚ်တွဵုရးသေံ ၁၃/ တံဂှ် နူကဵုဌာနက္ဍိုက်ပ်ဟဝ်တေဝ်ကဵု ပရေၚ်အာတရဴ သၟဝ်တဲကဝ်မယှေန်ပၞာန် ပိုၚ်ခြာပါ်စွံလဝ်ဒၞာဲဇူဒီုနွံမံၚ်ရောၚ် ညးတၠကမၠောန်ဟဝ်တေဝ်တံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
အပ္ဍဲကဵု ညးရပ်လဝ် တၞးကာတ်ကောန်ဍုၚ်တွဵုရးသေံ ၁၃/ သွက်ကၟုဲအာတရဴ ဂကူ ကဝ်က၊ ဝ ကဵု ပလံၚ်တံဟေၚ် အခိၚ်ကၠာတေံ နူကဵုဌာနက္ဍိုက်ပ် ဟဝ်တေဝ်ကဵုပရေၚ်အာတရဴ ကဵုဇူဒီုလဝ်ဒၞာဲဟဝ်တေဝ် “တော်ဝင်ဟသႅာ” ကဵု မိုတေဝ် “ဟောၚ်သရော” တံနွံရ။
တုဲပၠန် လ္တူညးရပ်လဝ် တၞးကာတ်ကောန်ဍုၚ်တွဵုရးသေံ ၁၃/ တံဂှ်တှ်ေ လ္တူဍုၚ်မတ်မလီု ဒၞာဲဟဝ်တေဝ်ကဵု ဒၞာဲဇၞုဇူဒီုလဵုဟွံဟီု ကဵုလဝ်အခေါၚ် နွံကၠုၚ်ရ။
ပြဟ်ဟ်ဏံမ္ဂး အတိုၚ်သ္ဂုတ်သွာတ် ကောံဓရီုကမ်မတဳကမၠောန်အာတရဴတံ သ္ဂုတ်သွာတ်လဝ်ဂးတုဲ ညးရပ်လဝ် တၞးကာတ်ကောန်ဍုၚ်တွဵုရးသေံ ၁၃/ သီုဖအိုတ် ယြဴဂကူလဵုဟွံဟီု ကဵုအခေါၚ်ဇူဒီုအာ ပ္ဍဲဒၞာဲဟဝ်တေဝ် “တော်ဝင်ဟသႅာ”၊ Mawlamying Strand Hotel ကဵု ဒၞာဲမိုတေဝ် “ဟောၚ်သရော” တံရောၚ် သ္ဂးရ။
လ္တူညးရပ်လဝ် တၞးကာတ်ကောန်ဍုၚ် တွဵုရးသေံ ၁၃/ တံ ပိုၚ်ခြာစွံလဝ်ဒၞာဲဇူဒီုတံဟီုဂှ် ဟိုတ်နူစၞောန်ပ္ညုၚ် သ္ကိုပ်ဝန်ဇၞော်မန် ကဝ်မယှေန်ပၞာန်ခါန်ကၞက် ဂှ်ရောၚ် ညးတၠကမၠောန်ဟဝ်တေဝ်မွဲတၠ သ္ဂးရ။
“သ္ကိုပ်ဝန်ဇၞော် ညးတေံဂွံစၟဳစၟတ်လောဲသွာဂးတုဲ ညးစၟဳစၟတ်လေဝ် ဟၟဲကီုတုဲ ဒၞာဲပိဒၞာဲဏံရ ဂွံစၟဳစၟတ်အာမာန် ဖျေံဏာအမိၚ်ဗီုဏံ ၁၃/ တံဂှ် အပ္ဍဲပိဒၞာဲဏံဟေၚ် ဒးအာဇူဒီုရောၚ် ပတိတ်ကဵုဏာလိက်သွက်ပိုဲ” သာ်ဝွံ သ္ဂးရ။
ယြဴပူဂဵု ညးရပ်လဝ် တၞးကာတ်ကောန်ဍုၚ်တွဵုရးသေံ ၁၃/ ညးလဵုဒှ်ဒှ် အတိုၚ်ခုတ်စၟတ်ကဵုလဝ် ပ္ဍဲဟဝ်တေဝ် ၂ မကဵု မိုတေဝ် ၁ မဂှ်ဟေၚ် ဒးအာဇူဒီုဏောၚ်၊ ယဝ်ရအာဇူဒီုဒၞာဲ ဟဝ်တေဝ်တၞဟ်ဟ်တှ်ေ ကေတ်အာအရေဝ်ရောၚ် ကဝ်မယှေန်ပၞာန်တွဵုရးမန် သ္ဂးလဝ်ရ။
ကဝ်မယှေန်ပၞာန်တွဵုရးမန်ဟီုဂးလဝ် ကဏ္ဍပရေၚ်အာတရဴညံၚ်ဂွံဖောအ်ဗြဳ သွက်ဂွံကၠောန်အာတံဂှ် ဟိုတ်နူပိုၚ်ခြာစွံလဝ် ဒၞာဲဇူဒီုသာ်ဏံဂှ် ပရေၚ်အာတရဴဟွံလောဲသွာသၟးဟွံက ပရေၚ်ဂီုကၠီုလေဝ်ဟၟဲတုဲ အရာသွက်ဂွံသၠုၚ်ပတိုန် ကဏ္ဍပရေၚ်အာတရဴဂှ်ဒှ်ဟွံမာန်ပုဟ် ညးကဝါ်ကၟုဲမွဲတၠ ပါ်ပါဲလဝ်ရ။
“ဗီုဍေံတံမိက်ဂွံကၠောန် မိက်ဂွံကဵု ပရေၚ်အာတရဴ ဖောအ်ဗြဳတိုန်ဂး၊ ဆဂး မွဲလပါ်တေံ ကဏ္ဍပရေၚ်ဂီုကၠီုဂးတုဲ ကၠောန်အာဗီုဏံဂှ်တှ်ေ ဌာနဝန်ဇၞော်ဍေံတံကဵုဍေံတံရ ဌာနပရေၚ်အာတရဴဟဝ်တေဝ်ဂှ် သဝ်အိုတ်ရ။ မုလေဝ် ဍေံတံသ္ပဟွံမာန်ပုဟ်၊ ဗီုလဵုမိက်ဂွံသၠုၚ်ၚ် ပရေၚ်အာတရဴတံဂှ် ဟွံလောဲသွာပုဟ်။ ကောန်ဍုၚ်တံ အာမံၚ်တရဴအပ္ဍဲဍုၚ်ဂှ်ရ ပရေၚ်ဂီုကၠီုဟၟဲမံၚ်တှ်ေ ဗီုလဵုဂွံသၠုၚ်အာမာန်ရော။ ဟီုကဵုအရေဝ်အရာပ်တှ်ေ သီုဖအိုတ်တံဂှ် သ္ပလဝ်သပုန်ဖအိုတ်တုဲ မၚ်ရံၚ်မံၚ်။ ဗက်ညာတ်မံၚ်မၞိဟ်တံ ညံၚ်ရဴကမၠတ်ဖအိုတ်တှ်ေ ဟွံပြေပြံၚ်ကွေံပုဟ်နဝ်” သာ်ဝွံ သ္ဂးရ။
ကောန်ဍုၚ်ဇကုကဵုဇကုရ ခုတ်စၟတ်လဝ်တၚ်နာနာတုဲ ကဵုအာမံၚ်တရဴတံဂှ် ဒှ်ဟွံထေက်ကီု ဟိုတ်နူပရေၚ် ခုတ်စၟတ်လဝ်တၚ်နၚ်ဗီုတံဏံဂှ်ရ ပရေၚ်ညးအာတရဴလုပ်ကၠုၚ်ဍုၚ်ကီု ရဲအာတရဴအပ္ဍဲဍုၚ်တံကီု ဒှ်အာပရေၚ်ယုတ်ဒေက်မာန်ရောၚ် ညးဆက်ဟီုရ။
မွဲလပါ်ဂှ် ကဝ်မယှေန်ပၞာန် တွဵုရးမန်ဝွံ ပ္ဍဲအခိၚ်ကာလ လာ်ဝှ်တိကှ်ဏံမ္ဂး ပရေၚ်အာတရဴဂွံဂၠိုၚ်တိုန်မာန်ဟီုတုဲ ကဵုပလေဝ်ပလေတ်လဝ် ဟဝ်တေဝ်တံ၊ လၟေၚ်တရဴတၟိတၟိ ကဵုထပ်ထမံက်တိုန်လဝ်ကီု တုဲပၠန်ပရေၚ်ဒေသ ညံၚ်ဂွံသာယာ ဂဵုလဟဵုတိုန်ကဵုလဝ်စၞောန်ပ္ညုၚ်နွံရ။
ပ္ဍဲခရိုၚ်မတ်မလီုဂှ်တှ်ေ လ္တူညးအာတရဴတံဂှ် ပ္ဍဲကဵုဒၞာဲ ပၞော်လုပ်တိတ်ဍုၚ်ကီု ဒဵုကဵုဒၞာဲဇူဒီုတေံ စၟဳစၟတ်မံၚ်တေင်င်တုဲ ဟွံထေၚ်တှ်ေ ဗီုဟွံထေၚ် ရပ်မံၚ်နွံတုဲ ညးတရဴဂမၠိုၚ်တံ သွက်ဂွံကၠုၚ်ဝေၚ်သၟးရဟီုဂှ် ဒှ်မံၚ်အခက်အခုဲဗွဲမဂၠိုၚ်ရောၚ် ဂွံတီလဝ်ရ။
ပရိုၚ်-သြင်လောန်တိုၚ်မ်
Photo – Social Media