လိုၚ်ဗၠဲ၊ သိပ်တမ်ပါ၂၈
ပ္ဍဲကဵုတွဵုရးကရေၚ် ကွဳစက်အာမံၚ်သ္ကုတ်ဂၠံၚ်လိုၚ်ဗၠဲတံဂှ် ဒပ်ပၞာန်ဗမာကရေပ်ဓရတ်စၟဳစၟတ်မံၚ်တုဲ ယဝ်ရ ဖ္ဍိုက်ဇက်နၚ်သ္ၚုကဵုကၠေၚ်စက်တံမ္ဂး မွဲအလန်ဓဝ်ရပ်သီကေတ်ထောံရဂှ် တမ်ရိုက်ကၞက်ပရိုၚ်ညးဒေသတံ ဟီုကဵု ဌာန်ပရိုၚ် သြၚ်လောန်တိုၚ်မ်ရ။
ကွဳစက်ဖ္ဍိုက်ကပေါတ်တံ အာမံၚ်လ္တူဂၠံၚ် လိုၚ်ဗၠဲ-ဘာအၚ်၊ လိုၚ်ဗၠဲ-ပိုၚ်ကြုၚ်-နဗူ ကဵု ဂၠံၚ်ထဳလုၚ်-နဗူတံဂှ် ကွဳစက်ကပေါတ်သၟးဟွံက သီုကဵုကွဳစက်ဍောတ်တ်ရဲသ္ၚိကၟိန်ဍိုက်တံဂှ် ဒပ်ကဝ်မယှေန်ပၞာန် ကရေပ်ဓရတ်စၟဳစၟတ်မံၚ်တုဲ ဖ္ဍိုက်နၚ်သ္ၚုကဵုကၠေၚ်စက်တံမ္ဂး သီကေတ်ဏာမွဲအလန်ဂှ်ရ။
ဗွဲတၟေၚ် ပ္ဍဲကဵုဂၠံၚ်ကူသာန်ဗၞိက်ဒေသပယျဵု ပွိုၚ်ဍုၚ်ပိုၚ်ကြုၚ် ပွိုၚ်တိုက် ထဳလုၚ်၊ ဒၞာဲဂၠံၚ် ဘာအၚ်- ထဳလုၚ်-နဗူ ပ္ဍဲကဵုဒးတတ်အာ ဒပ်ကဝ်မယှေန်ပၞာန် တမ်ဒမ်ခမရ ၂၀၃ ဂှ် အဓိက မၚ်ရပ်မံၚ် ကွဳစက် ဖ္ဍိုက်ကပေါတ်ဗၞိက်တံရ။
အတိုၚ်တမ်ရိုက်ကၞက်ပရိုၚ်ညးဒေသတံ ဟီုလဴလဝ်မ္ဂး ဒၟာနူအမိၚ်သ္ကိုပ်တမ်ဒပ် ခမရ ၂၀၃ ဂှ်တုဲ သ္ၚုကဵုကၠေၚ်စက်တံညံၚ်ဟွံဂွံစိုပ်တဲ ဗော်သွးကောန်ဂကူကရေၚ် KNU ကဵု ဂကောံပၠန်ဂတးတံဂှ် သီကေတ်ထောံရောၚ် သ္ဂးမံၚ်ရ။
ဆဂးဂှ် ဒပ်မၚ်ပယျဵုကရေၚ် BGF၊ ကံၚ်သဳပရေၚ်ၜိုဟ်လလမ်ကရေၚ် KNU-KNLA/PC ကဵု ဒပ်ပၞာန်ကရေၚ် ပတုဲဖဵုဒဳမဝ်ကရေသဳ DKBA တံ ယဝ်ရဖ္ဍိုက်နၚ် ကၠေၚ်စက်၊ သ္ၚုကဵုကပေါတ်တၞဟ်ဟ်တံမ္ဂး နူဒပ်ကဝ်မယှေန်ပၞာန် ဟွံရပ်စပ်မွဲသာ် ကဵုလဝ်အခေါၚ်ပေၚ်ၚ်ရောၚ် တမ်ရိုက်ကၞက်ပရိုၚ်ညးဒေသတံ သ္ဂးရ။
ကွဳစက်ဖ္ဍိုက်ကပေါတ် ဒးဒုၚ်ရပ်လဝ်တံဂှ် နူကဵုဒပ်ပၞာန်သီကေတ်ထောံအပိုၚ်နွံကီုလေဝ် ကွဳစက်လ္ၚဵု ရဲမကြပ်မံၚ်ကဵုဂကောံရပ်လွဟ်လ္ၚဵုတံမ္ဂး နုက်ကေတ်ကဵုသြန်တုဲ ကလေၚ်ဗၠးကၠုၚ်လဝ်နွံရဂှ် တမ်ရိုက်ကၞက်ပရိုၚ်ဂကောံရပ်လွဟ်တံ ဟီုလဴတုဲဂွံတီလဝ်ရ။
တုဲပၠန် ပ္ဍဲကဵုဒၞာဲသ္ကုတ်ဂၠံၚ်ဆက်စၠောံလဝ်ကဵု ဍုၚ်လိုၚ်ဗၠဲတံဂှ် ဂိက်သၞေဟ်ကၚ်ဒပ်ကဝ်မယှေန်ပၞာန်ကီု သၞေဟ်ကၚ်ဂိက် သၟဝ်တဲဒပ်မၚ်ပယျဵုကရေၚ် BGF ၂ ဒၞာဲဖျေံလဝ်ဂိက် ပဵုဂၠိုၚ်တိုန် နူကဵုကၠာတေံတုဲ ကံက်မံၚ်သြန် ကွဳစက်ဗၞိက်အာကၠုၚ်မံၚ်တံရဂှ် ဂွံတီရ။
ဍုၚ်လိုၚ်ဗၠဲ နွံမံၚ်လ္တူဂၠံၚ်ကူသာန်ဗၞိက် ဒေသပယျဵု ဗြဝတဳ-ဘာအၚ်တုဲ ဒၞာဲဒေသဆက်စပ်မံၚ်ကဵု ပွိုၚ်ဍုၚ်လိုၚ်ဗၠဲတံမ္ဂး ဒပ် KNU တံကဵုဂကောံရပ်လွဟ်ဗွဲမဂၠိုၚ် အာကၠုၚ်ချဳဒရာၚ်မံၚ်နွံရ။
ကမ်မတဳစဳမာန်ကဵု ပရေၚ်အုပ်ဓုပ် ပွိုၚ်ဍုၚ်လိုၚ်ဗၠဲ သၟဝ်တဲကဝ်မယှေန်ပၞာန်ဂှ်တှ်ေ အပ္ဍဲကဵုပွိုၚ်ဍုၚ်လိုၚ်ဗၠဲဂှ် အခေါၚ်ဟၟဲမွဲသာ် ပရေၚ်ပလံၚ်ဗစိုပ်သ္ၚုကီု ခြိုၚ်ဒေပ်စွံလဝ်သ္ၚုတံကီုညံၚ်ဟွံကၠောန် လောန်ကၠုၚ် ဂိတုသိပ်တမ်ပါ ၃ တုဲကၠုၚ်ဏံဂှ် ပတိတ်လဝ်အမိၚ်ဒေသန္တရမွဲတုဲ ယဝ်ရဟွံဒဂေတ်ဗက်မ္ဂး ဒးဒုၚ်ကေတ်အရေဝ်ရောၚ်သ္ဂးလဝ်ရ။
စနူကဵု ဂိတုသိပ်တမ်ပါ ၃ စဵုကဵုစိုပ်ဂိတုနဝ်ဝမ်ပါ ၂ တေံ အမိၚ်ဒေသန္တရပတိတ်လဝ် ပွိုၚ် ၂ ဂိတုဏံဂှ် သ္ၚုသွက်ဂွံဒှ် အထံက်အပၚ်ကဵုဂကောံပကီုပရာတ်တံကီု၊ နူကဵုပွိုၚ်ဍုၚ်မွဲမွဲ ပတိတ်ဏာဒေသတၞဟ်ဟ်တံကီု နူကဵုတွဵုရးဏံ ပတိတ်ဏာဒေသတၞဟ်ဟ်တံဂှ် သွက်ဂွံထိၚ်ချုက်အာရောၚ် ပ္ဍဲလိက်အမိၚ်ချူလဝ်နွံရ။
ပရိုၚ်-သြၚ်လောန်တိုၚ်မ်
Photo – CJ