ရေဝ်၊ သိပ်တမ်ပါ၂၈
ပ္ဍဲကဵုတွဵုရးဍုၚ်မန် ပွိုၚ်ဍုၚ်ရေဝ်ဂှ် နူကဵုကရောၚ်ပၞာန်ဒပ်ကဝ်မယှေန်ပၞာန် နဒဒှ်ဂဒံၚ်မၞိဟ်ရပ်လဝ်ညးဒေသ ၃၀ ပြၚ်တံ ညံၚ်ဂွံကလေၚ်ဗၠးတိတ်ကၠုၚ်မာန်ဂှ် နကဵုသြန်လၟိဟ်ကဵုကိုတ်ဒကေဝ် ဒးနုက်ပတိတ်လဝ်ရောၚ် ညးဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
လောန်ကၠုၚ်ဂိတုသိပ်တမ်ပါ ၂၅ တေံဂှ် ကရောၚ်ပၞာန်ဒပ်ကဝ်မယှေန်ပၞာန်ဇြဟတ်ၜိုတ် ၃၀၀ တံ ပါ်လဝ် ပိကရေၚ်ပၞာန်တံဝွံ ပ္ဍဲကဵုပွိုၚ်ဍုၚ်ရေဝ်ဂေတ်အာလပါ် အဒိၚ်၊ ဝါယာဟေၚ်၊ ဗယိကၠဵုကွာန်တၟိ၊ ကွာန်ဍောတ်၊ ကွာန်ဇီုပရိုက်တံတုဲ ထပက်လဝ်ကရောၚ်ပၞာန်ရ။
အခိၚ်ထပက်ကရောၚ်ပၞာန် ပ္ဍဲကရပ်အဒိၚ်ကဵုကွာန်ဝါယာဟေၚ် အကြာဂၠံၚ်ဍာန်ဂှ် ဆဵုညာတ်အာလဝ် ညးအာကၠအ် ၃၀ ပြၚ်တံတုဲ နကဵုဂဒံၚ်မၞိဟ်သွက်ဂွံထ္ၜးဂၠံၚ်ကော်ရပ်ဏာလဝ်ရ။
သွက်ဂွံထ္ၜးဂၠံၚ် နကဵုဂဒံၚ်မၞိဟ်ရပ်ကော်ဏာလဝ် ညးဒေသ ၃၀ ပြၚ် တံဂှ် ပ္ဍဲကဵုသိပ်တမ်ပါ ၂၆ အခိၚ်သဝ်တ္ၚဲ ပ္ဍဲကဵုအာစိုပ်လဝ် ဒၞာဲကွာန်ကာန်လှဂှ် ကရောၚ်ပၞာန်ဗၟာကလေၚ်ဗလးကဵုနၚ်ရ။
ဆဂး ရဲဒးဒုၚ်ကော်ရပ်လဝ်တံဏံ ညံၚ်ဂွံဗၠးတိတ်မာန် ဒၞာဲအကံက်ဗာန်ကရောၚ်ပၞာန်ကဵုလဝ်ဂှ် ရဲသ္ၚိကၟိန်မဆေၚ်စပ်တံ ဒးသၠောဲကဵုဏာလဝ်သြန် သွက်မွဲတၠ နူကဵု ၅ ကိုတ်ဒဵုကဵု၁၀ ကိုတ် ဒးသၠောဲကဵုလဝ်သြန်နွံမံၚ် ကောန်ကွာန်အဒိၚ်မွဲတၠဟီုရ။
အပ္ဍဲကဵုညးဒေသ ၃၀ ပြၚ် နကဵုဂဒံၚ်မၞိဟ် ရပ်ကော်ဏာလဝ်တံဂှ် ညးတြုံဟွံအောန်နူကဵု ၄ တၠတံ ဒးဒုၚ်ၜုၚ်တက်လဝ်ဂှ်လေဝ် သ္ဂးရ။
ကရောၚ်ပၞာန်ဒပ်ကဝ်မယှေန်ပၞာန် ဂေတ်ကွာန်လၟေၚ်ၚ်တုဲ ထပက်မံၚ်ပၞာန်တံကလေၚ်ဆုတ်အာကီုလေဝ် ဖက်ကရောၚ်ပၞာန် ထပ်ကလေၚ်စိုပ်ကၠုၚ်ပၠန်ဂှ် ညးဒေသတံဒှ်မံၚ်ဒွိၚ်အိုတ်ရ။
ပရိုၚ်-သြၚ်လောန်တိုၚ်မ်
Photo – CJ