မတ်မလီု ၊ သိပ်တမ်ပါ၂၈
ပ္ဍဲတွဵုရးမန် ကရပ်ဍုၚ်မတ်မလီု အကြာကွာန်ဗလံက်ညံၚ်ဝိုၚ်ကဵု ဝါကလိပွိုၚ်ဍုၚ်မုဟ်ဍုၚ်ဂှ် သွက်ဂွံသိုၚ်ခၞံအာ ကိုန်အစဳဇန် သၞေဟ်ၜၚ်မတ်မလီုတၟိ သၞေဟ်ၜၚ်ဂၠးကဝ်အာပြၚ်ၜဳ နကဵုသၞောတ် BOT ညံၚ်ဂွံစကၠောန်ဂှ် ကဝ်မယှေန်ပၞာန် ရမျှာၚ်ပြံၚ်အာမဒှ်ရ။
အခိၚ်ကၠာတေံ ကရပ်ဍုၚ်မတ်မလီုဂှ် သွက်ဂွံသိုၚ်ခၞံအာသၞေဟ်ၜၚ်ဂၠးကဝ်သၟးဟွံက သၞေဟ်ၜၚ်ကျာ အဆံၚ်ဂၠးကဝ်ကီုဂးတုဲ ကဵုလဝ်သြန်လေဲတိဝါတံကီု၊ ဖံက်ဂၠံၚ်၊ စနူကဵု သိုၚ်စမြိုၚ်ဒၞာဲဂှ် စကာဘဏ္ဍာဍုၚ်တုဲ သွက်ဂွံကၠောန်အာ ကြဴဇာလဝ်ရ။
ဆဂး ဂိတုသိပ်တမ်ပါ ၂၆ ကၠောန်လဝ်ကောံဓရီု ပ္ဍဲကဵုရုၚ်ဂကောံ အလဵုအသဳတွဵုရးမန် နွံဍုၚ်မတ်မလီုဂှ်တှ်ေ စပ်ကဵု ဂကောံဂၠံၚ်ဍာန်ဍာ် သၞေဟ်မတ်မလီုတၟိ (မုဟ်ဍုၚ်) ကဵု ပရေၚ်ပံၚ်တောဲဖျေံဒၞာဲ ပယျဵုပြၚ်ၜဳတံ ဆဵုဂဗသဳကၠဳလဝ်ဂှ်တုဲ နူလပါ်ကဝ်မယှေန်ပၞာန် ရမျှာၚ် စပြံၚ်ကၠုၚ်လဝ်ရ။
သၞောတ် BOT ဟီုဂှ် သွက်ကိုန်အစဳဇန်ဏံ နကဵုရဲဓလိုက်တမ်ရိုဟ်တံ ဒးပတိတ်လဝ်တမ်ကၠာအိုတ်တုဲ အတိုၚ်စၟတ်လဝ်အခိၚ်ကာလတံဂှ် နူကဵုအလဵုအသဳဒးလိၚ်ကေတ်လဝ် စမြိုၚ်ဒၞာဲတံကီုၚုဟ်မး လိၚ်သၞေဟ်ဂှ်လေဝ်ဂွံတုဲ အခိၚ်ခုတ်စၟတ်လဝ်အိုတ်အာမ္ဂး သၞောတ်ဒးကလေၚ်ပအပ်ကဵု အလဵုအသဳဆေၚ်စပ်တံ သီုဖအိုတ်ရောၚ်။
နူကဵုကဝ်မယှေန်ပၞာန် ကၠောန်အာနကဵုသၞောတ် BOT ရောၚ် ဟီုကီုလေဝ် ကိုန်အစဳဇန်သၞေဟ်ၜၚ်ဏံဂှ် ဒးအာဍာ်ဇမၠိၚ်ဒှ်တုဲ နဲကဲပညာဟွံက သြန်တမ်ဓလိုက်တမ်ရိုဟ်ဂှ်လေဝ် ဒှ်အခက်အခုဲမာန်ကီု ဟိုတ်နူအကာဲအရာ ၜဳဂှ် ဂၠံၚ်ဍာ်ပြံၚ်လှာဲအာမာန်တုဲ သွက်ဍာ်ဇမၠိၚ်ဂှ်ကမၠောန်ဒှ်ဟွံမာန်ပုဟ် ညးတၠပိုန်ဒြပ်မွဲတၠ ဟီုရ။
“ဒှ်မံၚ် ကမၠောန်ဍာ်ဇမၠိၚ်ဂှ်ရ ဒှ်တၚ်အခက်ခုဲမာန်ညိရောၚ်၊ သွက်နဲကူပညာကီု သြန်တမ်ရိုဟ်တံလေဝ် အခက်အခုဲနွံမာန်။ ၜိုတ်သၞောတ်ထၜတ်မွဲမွဲ အံၚ်ဇၞးမာန်ဟွံသေၚ်။ ၜဳဏံ ဒိုဟ်အာတုဲ ဂၠံၚ်ဍာ်ပြံၚ်လှာဲအာ ဂွံဆဵုမံၚ်တုဲ သွက်ဂွံကၠောန်ကမၠောန်သၞာဲဒါ မွဲအခိၚ်ခဏဍောတ်တံဂှ် ဖဵုဂုဏ်နွံမာန်ကီုလေဝ် ဍာ်ဇမၠိၚ်တှ်ေ ဒှ်ကမၠောန်မာန်ဟွံသေၚ်ပုဟ်” သ္ဂးရ။
တုဲပၠန် နကဵုတၠတမ်ရိုဟ်တံ ယဝ်ရဓလိုက်တမ်ရိုဟ် သွက်သၞေဟ်ၜၚ်ဂၠးကဝ်မ္ဂး စိုပ်အခိၚ်ကာလၜၚ်ဇၞော်ဇၞော်တံ လုပ်ကၠုၚ်မှလေဝ် ဂွံၚုဟ်လိၚ်သၞေဟ်မာန်တုဲ ပြဟ်ဟ်ဏံနကဵုအကာဲအရာဒေသဟီုမ္ဂး ကပေါတ်ပလံၚ်ဗစိုပ်/ ကလေၚ်ပၠုပ်နၚ်ဟၟဲတုဲ ဘိုအ်ဂွံကျအာသၟးရနွံ ညးဆက်ဟီုရ။
မွဲလပါ်ပၠန် သ္ကိုပ်ဝန်ဇၞော်တွဵုရးမန် ကဝ်မယှေန်ပၞာန်ခါန်ကၞက်ဂှ်တှ်ေ ကရပ်ဍုၚ်မုဟ်ဍုၚ် သိုၚ်ခၞံမံၚ်ကိုန်အစဳဇန် သၞေဟ်ၜၚ်ကျာတၟိဂၠးကဝ်လေဝ်နွံ ထပ်သိုၚ်ခၞံအာသၞေဟ်ၜၚ်ဂၠးကဝ်ပၠန်မ္ဂး ကိုန်အစဳဇန်ဏံ သွက်တွဵုရးကီု သွက်ဍုၚ်ကီု ဒှ်ဖဵုကွေံကွေံရောၚ် ကြဴဇာမံၚ်ရ။
တုဲပၠန် ပရေၚ်ကမၠောန်ၜတ်ကၞာတ်ဂၠံၚ်ဍာန်ဍာ်ကဵု ပယျဵုသၞေဟ်တံဂှ် သွက်ဂွံဆက်ကၠောန်အာကဵုလဝ်စၞောန်ကီု နကဵုသၞောတ် BOT ညံၚ်ဂွံထမံက်အာရုပ်ရဴသၞေဟ်ၜၚ်ဏံဗွဲမပြဟ်မာန်ဂှ် ညးတာလျိုၚ်တံကီု ဌာနဆေၚ်စပ်တံကီု ပံၚ်တောဲရေၚ်တၠုၚ်အိုတ်ညိဂှ် ကဵုလဝ်စၞောန်ရ။
ကဝ်မယှေန်ပၞာန်ဝွံ သွက်ကိုန်အစဳဇန် သၞေဟ်ၜၚ်ကဵု သၞေဟ်ၜၚ်ကျာ တံဂှ် စပံက်လဝ် ကဝ်မတဳဗဟဵု ပရေၚ်ကောပ်ကာဲ ထမံက်ရုပ်ရဴ ကိုန်အစဳန် ပ္ဍဲကဵု သၞာံ ၂၀၂၁ ဂိတုဒဳဇြမ်ပါ ၁၀ ဂှ်တုဲ ပ္ဍဲသၞာံ ၂၀၂၅ ဂိတုအဝ်ဂတ် ၁ ဂှ် ကလေၚ်ပလီုထောံကမ်မတဳဏံပၠန်ရ။
ကရပ်ဍုၚ်မတ်မလီု ပ္ဍဲကဵုပွိုၚ်ဍုၚ်မုဟ်ဍုၚ် သွက်ဂွံသိုၚ်ခၞံအာ ကိုန်အစဳဇန်သၞေဟ်ၜၚ်ဂၠးကဝ်ကဵု ကိုန်အစဳဇန် သၞေဟ်ၜၚ်ကျာ ဂၠးကဝ်တံမာန်ဂှ် စကာသုၚ်စောဲအာ တိဧက ၄၇၀၀ ရောၚ် လပါ် ကဝ်မယှေန်ပၞာန် လလောၚ်ပတိတ်လဝ်နွံရ။
ပရိုၚ်-သြၚ်လောန်တိုၚ်မ်
Photo – Social Media