သိုဝ်လ်၊ သိပ်တမ်ပါ၂၈
ကဝ်ရဳယာသၟဝ်ကျာဝွံ နကဵုလွဟ်လက်နက်နျူကလဳယာ ပန်ဗစိုပ်ဏာ ဍုၚ်အမေရိကာန်မာန် ပရေၚ်ပတိတ် ၜၚ်သၠောဝ်ဟဇီုမကမ်ထိၚ်သၞေဝ် သၠောဝ်တံ စိုပ်မံၚ်အဆံၚ်လက်ကြဴအိုတ်ကီုလေဝ် အရာပွမစီုသကီု နဲကဲပညာ သွက်ဂွံလုပ်စိုပ်ခတီုဗလးကျာဂၠးတိ ဟၟဲဏီရောၚ် သမ္မတ ကဝ်ရဳယာသၠုၚ်ကျာ ဟီုပတိတ်ဏာ ပ္ဍဲသိပ်တမ်ပါ ၂၆ ဂှ်ရ။
သမ္မတ ကဝ်ရဳယာသၠုၚ်ကျာ လဳဂျေမျံၚ် တိုန်စိုပ်မံၚ် သဘၚ်သဳကၠဳကုလသမဂ္ဂ စိုပ်မံၚ်နယူယံက်ဂှ် ပ္ဍဲကဵုဖျာယှေဝ်ယှာ ဆဵုဂဗလဝ်ကဵုတၠတမ်ရိုဟ်တံရ။
သွက်ညးဓလိုက်တမ်ရိုဟ်တံ ပဵုတုဲညံၚ်ဂွံလုပ်ကၠုၚ် ဇြဟတ်ပရေၚ်ပိုန်ဒြပ် ဂွံခိုဟ်တဴမာန် အန္တရာဲပရေၚ်ဂီုကၠီု ဆက်စပ်မံၚ်ကဵု ကဝ်ရဳယာသၟဝ်ကျာတံဂှ် ယှအ်ဖျေံအာရောၚ် သမ္မတ ကဵုလဝ်ကတိပါၚ်နွံရ။
ကဝ်ရဳယာသၟဝ်ကျာဝွံ ၜၚ်သၠောဝ်ဟဇီုမကမ်ထိၚ်သၞေဝ်တံ ဂ္ဇံက်ဍိုပ်နျူကလဳယာတုဲ ဒဵုကဵုအဆံၚ် ပန်ဗစိုပ်ဏာ ဍုၚ်အမေရိကာန်မာန် ဆက်ကၠောန်ပတိတ်မံၚ်ရောၚ် သမ္မတလဳ သ္ဂးရ။
နကဵုဍေံတံ ဗွဲမဍိုက်ပေၚ်စိုပ်ဒတုဲ ဟွံအံၚ်ဇၞးကီုလေဝ် စိုပ်မံၚ်အဆံၚ် လက်ကရဴအိုတ်ယျတုဲ ဆၜိုတ် နဲကဲညံၚ်ဂွံကလေၚ်လုပ်စိုပ် ဗလးကျာဂၠးတိရ သှ်ေမံၚ်ဏီရောၚ် သမ္မတ ကဝ်ရဳယာသၠုၚ်ကျာ ဟီုရ။
ပူဂဵုသွက်ဂွံတက်ကျာကဵု ဍိုပ်သ္ကိုပ်ကဝ်ရဳယာသၟဝ်ကျာ ကေန်ဂျုၚ်အာန်မာန်ဂှ် နွံမံၚ် သမ္မတအမေရိကာန် ဒဝ်နေဝ်ထရ မွဲဟေၚ်ရ သမ္မတလဳ ဟီုရ။
စနူဂိတုဂျောန်တေံ ညးယိုမက်ဂၠေၚ်လဝ်တာလျိုၚ် သမ္မတ ကဝ်ရဳယာသၠုၚ်ကျာဝွံ ပရေၚ်ဆက်ဆောံကဵု ပျုၚ်ယာန် ညံၚ်ဂွံတဴတက်အာ ဂစာန်မံၚ်တုဲ အကြာကိုရဳယာၜါဍုၚ် သွက်ဂွံသဳကၠဳအာ ဗတိုက်ဖအောဝ်လဝ်ကီုလေဝ် ကဝ်ရဳယာသၠုၚ်ကျာ တးပါဲလဝ် ပွမဗတိုက်ဖအောဝ်တံဂှ်ရ။
ညးမအုပ်ဓုပ်လဝ် ကဝ်ရဳယာသၟဝ်ကျာတံဂှ် အဝဵုဍေံတံ ဆက်ဂွံတန်ကြန်အာမာန် လွဟ်လက်နက်နျူကလဳယာဗွဲမဂၠိုၚ် ညံၚ်ကဵုပိုၚ်ပြဳဂွံလဝ် ဍိုက်က်ပေၚ်ၚ်ရတုဲ ညံၚ်ဟွံဂွံထပ်ပတိတ် လွဟ်လက်နက်နျူကလဳယာ သွက်ဂွံသွံရာန်ပတိတ် ဍုၚ်မ္ၚးတံမာန် သမ္မတလဳ ဗတိုက်ဖအောဝ် ညံၚ်ဂွံကၠောန်အာပေါဲသဳကၠဳတံရ။
ယဝ်ရ ကလေၚ်ရုတ်သီထောံ ပရေၚ်အမေရိကာန်တံအာတ်မိက်မံၚ် သွက်ဂွံနုက်ပလှ် ပရေၚ်လွဟ်လက်နက်နျူကလဳယာမ္ဂး ပရေၚ်တက်ကျာကဵု ဝါယှေန်တန်ဂှ် သွက်ဂွံပါဲဓလေတ်အာ ပရူပရာဟၟဲရောၚ် ကေန်ဂျုၚ်အာန် ဟီုဂးလဝ်နွံရ။
Ref:Reuters