ဘေဂျင်း၊ သိပ်တမ်ပါ ၃၀
ဝန်ဇၞော်ပရေၚ်တဵုလွဳကဵု ကေၚ်ကာဒေသရး ဍုၚ်ကြုက် တာန်ယာန်ကျေန်ဝွံ နကဵုအမှုစလာဘ်ဗ္စာ နူကဵုရုၚ်သၞောဝ်ဓရ် တွဵုရးကျဳလေၚ် ပ္ဍဲသိပ်တမ်ပါ ၂၈ ဂှ် ဖျေံအမိၚ် ဒေါအ်ဒေၚ်ကာဂစိုတ်ရ ဌာန်ပရိုၚ်သေန်ဟွာ ချူလဝ်ပရိုၚ်ရ။
ဝန်ဇၞော်တာန်ဝွံ စနူကဵုသၞာံ ၂၀၀၇ ဒဵုကဵုသၞာံ ၂၀၂၄ အခိၚ်ဂွံလဝ်ဒၞာဲဗီုပြၚ်နာနာတံဂှ် သြန်ကြုက်ယန် ၂၆၈ ပြကောဋိကိုတ်ပြၚ် (သြန်ဒဝ်ဠာအမေရိကာန် ၃၇ ဒဿမ ၆ ပြကောဋိကိုတ်) ၚုဟ်မးနွံ မသြန်ကဵု ပရေၚ်ပိုင်ပြဳနာနာတံ စလဝ်လာဘ်ဗ္စာနွံမံၚ် နူကဵု ဌာန်ပရိုၚ်သေန်ဟွာ ချူလဝ်ရ။
မေတ်သတာတာန်ဝွံ လ္တူဒုဟ်အမှုရာဇဝတ် ညးတေံလောန်ၜက်လဝ်တံဂှ် ဒုၚ်လဝ်ဝန်တုဲ လ္တူဖျေံလဝ်ဒုဟ်အမိၚ်ဂစိုတ် ကုညးတေံဂှ် ဒေါအ်ဒေၚ်စွံလဝ် ပွိုၚ်ၜါသၞာံရောၚ် ရုၚ်သၞောဝ်ဓရ်ညးဍုၚ်ကွာန် အဆံၚ်လဒေါဝ် ချာန်ချောန် လလောၚ်တြးလဝ်ရ။
နူကဵုအေဂျေန်သဳ ပရေၚ်ဗတိုက်သရိုဟ် ပွမဒဂေတ်လီုစလာဘ်ဗ္စာဝွံ စၟဳစၟတ်ဂၠိုက်ဂၠာဲ မေတ်သတာတာန်ဂှ် ဖျေံထောံနူတာလျိုၚ်တုဲ ပ္ဍဲကဵုသၞာံ ၂၀၂၄ ဂိတုနဝ်ဝမ်ပါဂှ် ပတိတ်ထောံလဝ် နူဗော်ကောန်မျူနေတ်ကြုက်ရ။
ဗီုအမှု သ္ကိုပ်ပရေၚ်စဵုဒၞာတြေံ လဳယှာန်ဖူကဵု ညးကေၚ်ယိုက်လဝ်တာလျိုၚ်ဒၞာဲညးတေံ ဝေဖာန်ဂဳတံကီု စၟဳစၟတ်ဂၠိုက်ဂၠာဲလဝ် အမှု မေတ်သတာတာန် ဗွဲမပြဟ်ဂှ် လၟေၚ်အတိုၚ်ဓမ္မတာဟွံသေၚ်ရောၚ်။
သမ္မတယှဳကျေအ်ဖျေန် စပံက်လဝ် ပရေၚ်ဗတိုက်သရိုဟ်စလာဘ်ဗ္စာ အပ္ဍဲသၞာံ ၂၀၂၀ တုဲ ဒပ်ဗၠာဲသၟိၚ်၊ သၟာဂဗုတ်အလဵုအသဳတံကဵု နာဲဗ္စာတံ ညံၚ်ဂွံမၚ်မွဲအာသစ္စပေၚ်ၚ်၊ ညံၚ်သ္ဂောံသ္အးဇ္ၚးဂလာန်ပတေဟ်ဍိုက်ပေၚ်အာ လွဳပရာဂစာန်ကၠုၚ်လဝ်ရ။
ကၠာတာန် ဟွံဒှ် ဝန်ဇၞော်ပရေၚ်တဵုလွဳကဵု ကေၚ်ကာဒေသရးဏီဂှ် နူကဵုသၞာံ ၂၀၁၇ ဒဵုကဵု ၂၀၂၀ တေံ နဒဒှ်သ္ကိုပ်ပရေၚ်အုပ်ဓုပ် တွဵုရးကျန်သု သ္ကုတ်ပလိုတ်ကီုရ။
ပရေၚ်စလာဘ်ဗ္စာဝွံ သွက်ဗော်ကောန်မျူနေတ်ကြုက်ဂှ် ဒှ်အရာအန္တရာဲဇၞော်အိုတ်ရောၚ် ယှဳကျေအ်ဖျေန် ဟီုလဝ် ပ္ဍဲကဵုဂိတုဂျာန်နဝါရဳရ။
အစဳဇန်ပရေၚ်ဗတိုက်သရိုဟ် ပွမစလာဘ်ဗ္စာ သမ္မတယှဳ စကၠောန်တုဲ ဗွဲကြဴဏံ ပ္ဍဲဍုၚ်ကြုက် ပွမဒးဒုၚ်ရပ်တံ ဟွံသေၚ်မ္ဂး ညးတာလျိုၚ်ဇၞော်တံ ကၠေံအာနူကဵု ဗွိုၚ်မၞိဟ်တံဗွဲမဂၠိုၚ် နွံကၠုၚ်မံၚ်ရ။
Ref:Reuters