ဘာအၚ်၊ သိပ်တမ်ပါ ၃၀
လ္တူ ပေါဲရုဲမာဲကဝ်မယှေန်ပၞာန်ကၠောန်အာဏံဂှ် ပံၚ်တောဲစဵုဒၞာအာပေၚ်ၚ်ရောၚ် ဂကောံကရေၚ်ရပ်လွဟ် BGF, DKBA, KNU/KNLA-PC ပိဂကောံတံ ပ္ဍဲသိပ်တမ်ပါ ၂၈ ဏံပံၚ်တောဲလလောၚ်တြးဏာ သဘဴလစွံစိုတ် ပေါဲရုဲမာဲရ။
ပ္ဍဲသိပ်တမ်ပါ ၂၈ ဒၞာဲဗွိုၚ်ဒေသဒပ်စၟတ် ၂ BGF ဂှ် ဒပ်ပၞာန်ကရေၚ်ပတုဲဖဵုဒဳမဝ်ကရေသဳ DKBA၊ ဒပ်မၚ်ပယျဵုကရေၚ် BGF၊ ကံၚ်သဳပရေၚ်ၜိုဟ်လလမ်ကရေၚ် KNU/KNLA PC ပိဂကောံ ကဍိုပ်သ္ကိုပ်အဆံၚ်လှုၚ်တံဆဵုဂဗညးသ္ကံဂှ် သွက်အနာဂတ်တွဵုရးကရေၚ်ကဵု ညးဍုၚ်ကွာန်တံဂးတုဲ ချပ်သဳကၠဳလဝ်ညးသ္ကံရောၚ် ချူလဝ်ပ္ဍဲလိက်လလောၚ်တြးရ။
လ္တူအကာဲအရာ ပရေၚ်ပၞာန် ပရေၚ်ဍုၚ်ကွာန်တွဵုရးကရေၚ်လၟုဟ်ဏံသ္ၚဳဂၠိပ်လဝ်တုဲ ပေါဲရုဲမာဲကၠောန်ဗ္ဒျ်အာ သၞာံ ၂၀၂၅ ဒဳဇြမ်ပါကဵု သၞာံ ၂၀၂၆ ဂိတုဂျာန်နဝါရဳတံဂှ် သွက်ဂွံသောၚ်ကလးအာ ပဋိပက္ခဍုၚ်ဗၟာအိုဿီုနာနာမာန် ဂကောံအလဵုအသဳညးဍုၚ်ကွာန်မွဲမံက်တိုန်ကၠုၚ်ရောၚ် ကရေၚ်ရပ်လွဟ်ပိဂကောံတံ သ္ဂးရ။
ပေါဲရုဲမာဲဝွံ သွက်ဍုၚ်ဗမာဂွံၜိုဟ်သြိုဟ်အာကီု ထမံက်ပတိုန်ကဵုဏာပရေၚ်ဖောအ်ဗြဳသၟးဟွံက သွက်တွဵုရးကရေၚ် ကေုာံဘဝညးဍုၚ်ကွာန်တံ ညံၚ်ဂွံၜိုဟ်သြိုဟ်ဖန်ဗ္ဒျ်ကဵုမာန်ရောၚ် သ္ၚဳဂၠိပ်ဂွံလဝ်ရဂှ် ကရေၚ်ရပ်လွဟ်ပိဂကောံ သ္ဂးလဝ်ရ။
ပ္ဍဲပေါဲရုဲမာဲ လ္တူညးဍုၚ်ကွာန်ဒေသကဵုအာမာဲ နကဵုဆန္ဒဗွဲမသၠးပွးပံၚ်တောဲပါလုပ်အာဂှ် စွံဇြိုဟ်နက်စၟတ်သမ္တီ သ္ပအဲပရဲကဵု သၞောတ်ထ္ၜတ်ဍာ်ဒကေဝ်ပရေၚ်ဒဳမဝ်ကရေသဳတုဲ ပ္ဍဲပေါဲရုဲမာဲ ပရေၚ်ကဵုမာဲညံၚ်ဟွံဆောံလေၚ်အာ ပံၚ်တောဲစဵုဒၞာကဵုအာရောၚ် လလောၚ်တြးလဝ်ရ။
တုဲပၠန် နကဵုသၞောတ်ဒဳမဝ်ကရေသဳဗော်ဇဳဟေၚ် သွက်ဂွံထမံက်ပတိုန်အာဘဝညးဍုၚ်ကွာန်တံ ညံၚ်ဂွံၜိုဟ်သြိဟ်ရာၚ်ဆာဲမာန်ဂှ် ပံၚ်တောဲကဵုအာပေၚ်ၚ်ရောၚ် ကရေၚ်ရပ်လွဟ်ပိဂကောံတံ ပံၚ်တောဲ လလောၚ်တြးလဝ်ရ။
အပ္ဍဲကဵုကရေၚ်ရပ်လွဟ်ပိဂကောံဏံ နကဵုဒပ်မၚ်ပယျဵုကရေၚ် BGF ဝွံ ဒဒှ်ရနုက်တိတ်လဝ် နူကဵုသၟဝ်ဒပ်ပၞာန်ဗမာဂှ် ပ္ဍဲသၞာံ ၂၀၂၄ တေံ လလောၚ်တြးလဝ်တုဲ ပြံၚ်လှာဲပံက်အာရောၚ် ဒပ်ပၞာန်ကောန်ဂကူ ကရေၚ် KNA ဟီုပတိတ်လဝ်နွံရ။
ဒပ်ပၞာန်ကရေၚ်ပတုဲဖဵုဒဳမဝ်ကရေသဳ DKBA ကေုာံ ကံၚ်သဳပရေၚ်ၜိုဟ်လလမ်ကရေၚ် KNU/KNLA PC တံဂှ်မ္ဂး ပါလုပ်မံၚ် ပ္ဍဲကဵုဂကောံထပက်လိက်ကသုက် တင်တုပ်စိုတ်ပရေၚ်ဒေါအ်ပန်ပှော်အလုံဍုၚ် NCA တုဲ ကဝ်မယှေန်ပၞာန်အတိုၚ်ကော်ဘိက်လဝ် ပ္ဍဲကဵုပေါဲဆဵုဂဗသဳကၠဳ ပရေၚ်ၜိုဟ်လလမ်တံဂှ် တိုန်စိုပ်မံၚ် မဒှ်ရ။
ပရိုင်-သြၚ်လောန်တိုၚ်မ်
Photo – BGF/KNA