သဓီု၊ သိပ်တမ်ပါ ၃၀
ပ္ဍဲတွဵုရးမန် ပွိုၚ်ဍုၚ်သဓီု ဒၞာဲကဵုကွာန်သၞေဟ်ကရေၚ်ဍောတ် (ကရင်လေးဆိပ်) ဂှ် ဒပ်ပၞာန်ဗမာတံ ဍိုက်လုပ်ကၠုၚ်တုဲ အပ္ဍဲကဵုရပ်ကော်ဏာ ညးဒေသ ၃၀ ပြၚ်တံဂှ် ညးအယုက်ဟွံပေၚ်တံပါလုပ်မံၚ်ရောၚ် ညးဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
ဒပ်ကဝ်မယှေန်ပၞာန်ဗမာ ဇြဟတ် ၅၀ ပြၚ်ကဵု ဒပ်ဗၠာဲသၟိၚ်တံပံၚ်တောဲတုဲ ပ္ဍဲကဵုသိပ်တမ်ပါ ၂၈ ၜိုတ်အခိၚ်နူဂယး ၅ နာဍဳဂှ် ဍိုက်လုပ်ကၠုၚ်ကွာန်သၞေဟ်ကရေၚ်ဍောတ်ရ။
တုဲပၠန် ဒပ်ကဝ်မယှေန်ပၞာန်တံရပ်ကော်ဏာ ကောန်ၚာ် ၁၃ သၞာံ ၅ တၠ၊ ညးဗြဴ ၁၀ တၠကဵု ညးတြုံ ဟွံအောန်နူကဵု ၁၅ တၠ အပံၚ်ဖအိုတ်ရပ်ဏာ ၃၀ ပြၚ်ၚ်နွံရ။
ညးဒေသရပ်ဏာလဝ်တံဏံ ဗစိုပ်ဏာလဝ် ပ္ဍဲကဵုဒပ်ပကတ်ပကေၚ် စၟတ် ၉ ပ္ဍဲဍုၚ်သဓီုတုဲ ဒဵုကဵုဂိတုသိပ်တမ်ပါ ၂၉ ဏံ ဟွံဒှ်ကလေၚ်ဗလးကဵုဏီရ။
စပ်ကဵုပရေၚ်ဖံက်ဟတိုဟ်လဝ် ဂၠံၚ်ကွဳပၟတ် လ္ဂုၚ်-မတ်မလီု ပ္ဍဲပွိုၚ်ဍုၚ်သဓီု အကြာဍုၚ်ဝန်ကဵု တိၚ်သုက် ပ္ဍဲမွဲၜါတ္ၚဲဏံဂှ်တုဲ ကော်ရပ်ဏာမၞိဟ်တံဏံဂှ်ဒှ်မာန်ရောၚ် ညးဒေသတံသ္ၚဳဂၠိပ်ရ။
လောန်ကၠုၚ်ဂိတုဂျူလိုၚ် ၃၀ တေံလေဝ် ပ္ဍဲပွိုၚ်ဍုၚ်သဓီုကွာန်ပတိၚ်ယို ညးအယုက်ဟွံပေၚ်တံလေဝ်ပါကီု ညးဒေသ ၄၀ ပြၚ်ဂှ် ဒပ်ကဝ်မယှေန်ပၞာန်ကၠုၚ်ကော်ရပ်ကေတ်လဝ် ပ္ဍဲသ္ၚိတံတုဲ ညးသၟတ် လုပ်အဝေါၚ်ယိုက်ဂၠေၚ်ဝန်ပၞာန်တံဂှ် စုတ်ပကောံကဵုဏာနဒဒှ် ကောန်ပၞာန်တၟိတံရ။
ပရိုင်-သြၚ်လောန်တိုၚ်မ်
Photo – CJ