မတ်မလီု၊ သိပ်တမ်ပါ ၃၀
ဟိုတ်နူပေါဲဗတိုက် အလုံဍုၚ်မွဲမက္တဵုဒှ်မံၚ်တုဲ လ္တူညးပါဲဒဴပၞာန် လုပ်ကၠုၚ်တွဵုရးမန်တံဂှ် ဒပ်ကဝ်မယှေန်ပၞာန် ရပ်ဓရတ် အာတ်ကေတ်မံၚ်သြန်တုဲ သၟတ်လုပ်အဝေါၚ်ယိုက်ဂၠေၚ်ဝန်ပၞာန်တံဂှ် နဒဒှ်ကောန်ပၞာန် ဒဒုၚ်ပကောံဏာလဝ်နွံမံၚ်ရောၚ် ညးဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
နူကဵု တွဵုရးသေံ၊ ကချေၚ်၊ ရခေၚ်၊ ရးသကိုၚ်၊ မဂွေ နူကဵုဒၞာဲဒေသတၞဟ်ဟ်တံကီု လ္တူညးဍုၚ်ကွာန် ဂြိပ်ဒဴကၠုၚ်ပၞာန်တံဂှ် ဟိုတ်ဖဵုဟၟဲမွဲသာ် ကော်ရပ်စၟဳစၟတ်မံၚ်တံနွံရ။
တုဲပၠန် လ္တူရဲပါဲဒဴပၞာန်လုပ်ကၠုၚ်တွဵုရးတံဂှ် အပ္ဍဲကဵုဒၞာဲပၞော်လုပ်တိတ်ဍုၚ်တံ ရပ်ဓရတ်စၟဳစၟတ်မံၚ်ကီု အာတ်ကေတ်သြန်ဗွဲမဂၠိုၚ်တုဲမှ ကဵုအခေါၚ်လုပ်ဍုၚ်ကီု ဗီုဟွံခယဂှ်ဗက်ရပ်မံၚ်ကီုရ။
ညးပါဲဒဴကၠုၚ်ပၞာန်လ္ၚဵုတံမ္ဂး အတိုၚ်မွဲဂြောဝ်ဂတာရပ်စၟဳစၟတ်မံၚ်နွံတုဲ အပ္ဍဲဏံဆက်ရပ်ကော်ကေတ်လဝ် သၟတ်လ္ၚဵုတံလေဝ်နွံမံၚ်ကီုရောၚ် ညးဒေသတွဵုရးမန် ဟွံထမံက်ယၟုမွဲတၠ ဟီုကဵုဌာန်ပရိုၚ်သြၚ်လောန်တိုၚ်မ်ရ။
“ရဲပါဲဒဴကၠုၚ်ပၞာန် ဂၠိုၚ်ကွေံကွေံရ၊ အတိုၚ်မွဲဂြောဝ်ဂတာလေဝ် နွံမံၚ်။ ဍေံတံကော်ဏာ။ စၟဳစၟတ်မံၚ် ဂၠိုၚ်ကွေံကွေံ။ ဗက်ဒတောဝ် ပရေၚ်အတိက် ရပ်ဂွံဏာလောဲလောဲ၊ ဝရာန်ဟွံပါလေဝ် ရပ်ဂွံမံၚ်။ ဂြိပ်ကၠုၚ်ပၞာန်ဟီုတှ်ေ တင်နၚ်ပ္ဍဲကဵုညးတံ ပါကၠုၚ်မံၚ်ဖအိုတ်ရ၊ စရၚ်သ္ၚိ တၞကာတ်ကောန်ဍုၚ် ပါမံၚ်ဖအိုတ်ရ။ လိက်ထံက်ဂလာန် အရာပ်လေဝ် ပါကၠုၚ်မံၚ်ရ၊ ဟွံဗလးကဵုပုဟ်၊ မၞိဟ် ၅ တှ်ေ ကလေၚ်ဗလးကဵု ၂ ။ ၃ ဂှ် ကော်ဏာ မိၚ်ဟဂှ်” သာ်ဝွံ သ္ဂးရ။
တုဲပၠန် ညးပါဲဒဴပၞာန်တံဝွံ ဒၞာဲဌာန်ဒၞာဲညးတံစိုပ်မံၚ်ဂှ် ဒးအာတေၚ်ကၟုဲ ဒၞာဲကဵုရုၚ်ပရေၚ်အုပ်ဓုပ် သၟဝ်တဲဒပ်ကဝ်မယှေန်ပၞာန်တံနွံတုဲ ရပ်ဂွံမံၚ်လောဲလောဲ အတိုၚ်ဏံရောၚ် ညးဆက်ဟီုရ။
အပ္ဍဲကဵုရဲဒဴပၞာန် ဒးဒုၚ်ရပ်လဝ်တံမ္ဂး ညးကဵုသြန်ဂၠိုၚ်ၚ်မာန် ကလေၚ်ဗၠးကၠုၚ်ဂှ်အောန်မံၚ်တုဲ ရဲကဵုသြန်ဟွံမာန်တံ ဂှ်တှ်ေ သွက်ဂွံယိုက်ဂၠေၚ်ဝန်ပၞာန်နကဵုကောန်ပၞာန်တၟိ ဒးဒုၚ်ပကောံဏာလေဝ်နွံမံၚ်ရောၚ် သ္ဂးရ။
မွဲလပါ်ပၠန် ရဲတွဵုရးသေံရပ်လဝ် တၞးကာတ်ကောန်ဍုၚ် ၁၃/ မ္ဂး ယြဴပူဂဵုလဵုဟွံဟီု အပ္ဍဲကဵုကဝ်မယှေန်ပၞာန် ခုတ်စၟတ်ကဵုလဝ် ဒၞာဲဟဝ်တေဝ် ၂ မကဵု မိုတေဝ် ၁ မဂှ်ဟေၚ် ညံၚ်ဂွံဇူဒီုအာဂှ် စနူဂိတုသိပ်တမ်ပါ ၁၇ ဏံတုဲ ပါ်ခြာစွံလဝ်ကဵု ဒၞာဲတံရ။
ပရိုင်-သြၚ်လောန်တိုၚ်မ်
Photo – Social Media