နေပျဳတဝ် ၊ သိပ်တမ်ပါ ၃၀
အလဵုအသဳညဳသၟဟ်ဂကူ NUG အယုက်ပေၚ်စိုပ်အာ ပန်သၞာံပြၚ်အာကီုလေဝ် ညံၚ်ဟွံဂွံသ္ပစၟတ်သမ္တီ ဂကောံပၞာန်သီအဝဵု လၟေၚ်ကမၠောန်အဓိက ဌာနဝန်ဇၞော်ပရေၚ်ဍုၚ်သ္အာၚ်ကၠောန်မံၚ်တံ တရဴဟွံစိုပ်ဏီပုဟ် ပ္ဍဲကဵုသိပ်တမ်ပါ ၂၈ ဂှ် နူ BNI – Myanmar Peace Monitor ပတိတ်လိက်ဒုၚ်စဳရေၚ်ရ။
ဌာနဝန်ဇၞော်ပရေၚ်ဍုၚ်သ္အာၚ် ဝန်ဇၞော်ကၟိန်ဍုၚ် “ဒေါ်ဇင်မာအောင်” သ္ကိုပ်သ္ကလဝ်ဝွံ အပ္ဍဲနဲကဲဂၠံၚ်ဍာန်မဟာဗျူဟာ ၆ တၚ် ကာလပၠန်ဂတးဏံ နဲကဲပရေၚ်ဍုၚ်သ္အာၚ်အရာမကဵုလဝ်ဖျုန်ကဵု မဂၞန် ၂ ဟီုဂှ်ထေက်ကဵု မ္ဒးကလေၚ်စၟဳစၟတ်အာ ဗျူဟာပရေၚ်ဍုၚ်သ္အာၚ် NUG ရောၚ် သာ်ဝွံ ပ္ဍဲကဵုလိက်ဒုၚ်စဳရေၚ်ဂှ်ချူထမံက်ထ္ၜးလဝ်ရ။
ပ္ဍဲကဵုဗလးမုက်ပရေၚ်အမာတ်ကလုတ်မ္ဂး လဂါံဇိုၚ်ဌာနဝန်ဇၞော်ပရေၚ်ဍုၚ်သ္အာၚ် NUG ဟီုဂးစဂွံ ကုအရာပရေၚ်စုက်လုက်စၟတ်သမ္တီ ဍုၚ်အမေရိကာန်၊ ဍုၚ်ပလိုတ်ယူရောပ်တံကီု ဂကောံအာသဳယာန် သ္ကိုပ်ဝန်ဇၞော် ဍုၚ်မလေဝ်ယှာတံကီု ပရေၚ်ဆက်စၠောံစုက်လုက်ကၠုၚ် ညးဂမၠိုၚ် တီကၠးလဝ်တံဂှ် ဒဵုကဵုသၞောတ်ထ္ၜတ်မွဲ ဂွံကၠုၚ်လဝ်ပရေၚ်အံၚ်ဇၞးရောၚ် ခယျကေတ်မာန်ရ။
ဆဂးဂှ် ဂကောံဍုၚ်ဂၠးကဝ်တံဏံပၠန်ရ လ္တူဂကောံပၞာန်ဗမာတံဂှ် ဂတမုက်မွဲဗီု လက်ကရဴမွဲနဲ နဲကဲဗွဲမဂၠိုၚ် စုက်လုက်ဆက်ဆောံမံၚ် ကီုတုဲ လၟေၚ်ကမၠောန ညံၚ်ဟွံဂွံသ္ပစၟတ်သမ္တီ ဂကောံပၞာန်သီအဝဵု ဌာနဝန်ဇၞော်ပရေၚ်ဍုၚ်သ္အာၚ် NUG ကၠောန်မံၚ်တံဂှ် ဟွံစိုပ်တရဴဏီ ပုဟ် နူကဵု BNI – Myanmar Peace Monitor သ္ၚဳဂၠိပ်လဝ်ရ။
ဍုၚ်ဂၠးကဝ်ဂမၠိုၚ် ၜိုန်ရတးပါဲလဝ် ဂကောံပၞာန်ဗမာသီအဝဵုကီုလေဝ် ဂွံကၠုၚ်လဝ်ပရေၚ်အထံက်အရီု နူကဵုအလဵုအသဳ ဍုၚ်ကြုက်ဇိုၚ်ဝုတ်ဒိုဟ်တုဲ အကြာပွဳဗွိုၚ်ဍုၚ်ဂၠးကဝ်ဂမၠိုၚ်လေဝ် ပၠးကၠုၚ်ဇိုၚ်မာန်ဂှ် သွက်သ္ဂောံဂွံပရေၚ်သ္ပစၟတ်သမ္တီ အလဵုအသဳ ထရ အမေရိကာန်တံကီု ဂစာန်မံၚ်ဖိုအ်ရ။
တုဲပၠန် ဍုၚ်ဇိုၚ်ဝုတ်ဒိုဟ် သေံ၊ လဴ၊ အေန္ဒိယကဵု ဍုၚ်ဗၚ်ဂလာဒက်ချ်တံဂှ်လေဝ် ဂကောံပၞာန်ဗမာ ပၠးဏာတဲမာန်တုဲ လ္တူအလဵုအသဳ NUG ကဵု ဂကောံဇြဟတ်ပၠန်ဂတး ဒစဵုဒစးမံၚ်တံဂှ် နဲကဲနာနာကဵုကၠုၚ်မံၚ် ဇြဟတ်ဟရိုဟ်တံ ဂွံဆဵုရ။
နကဵုအလဵုအသဳ ဍုၚ်တဳမဝ် နဒဒှ်အလဵုအသဳလုပ်သၞောဝ်သ္ပကၠုၚ်စၟတ်သမ္တီ ဆက်ဆောံစုက်လုက်ကဵုလဝ် NUG ကီုလေဝ် ညံၚ်ဂွံဒှ်ကောန်ဂကောံအာသဳယာန်မာန် ကၠုၚ်ဆဵုဂဗလဝ်ကဵုဂကောံပၞာန်သီအဝဵု ပ္ဍဲကဵုဍုၚ်ဗမာတုဲ နကဵုပရေၚ်ဆက်ဆောံ အဆံၚ်အလဵုအသဳကဵု အလဵုအသဳတံဟီုဂှ် သွက်ဌာနဝန်ဇၞော်ပရေၚ်ဍုၚ်သ္အာၚ် NUG အရာမ္ဒးကေတ်အာခန်လ္ၚတ်ထေက်ရောၚ် လိက်ဒုၚ်စဳရေၚ်ဏံ ထံက်ထ္ၜးလဝ်ရ။
ဟိုတ်ဂှ်ရ ဌာနဝန်ဇၞော်ပရေၚ်ဍုၚ်သ္အာၚ် NUG ဝွံ စပ်ကဵုပရေၚ်ဍုၚ်ကွာန်ပရေၚ်ပၞာန် ပရေၚ်ဘဏ္ဍာကဵု ပရေၚ်ဆက်ဆောံညးဍုၚ်ကွာန် အလဵုအသဳ NUG ကေုာံ ဂကောံဇြဟတ်ပၠန်ဂတးသီုဖအိုတ်တံဂှ် ညံၚ်ဂွံလးပၠးထ္ၜးလဝ်ကဵု ပ္ဍဲမုက်လိက်ဍုၚ်ဂၠးကဝ်တံတုဲ ညံၚ်သ္ဂောံဂွံအာပရေၚ်ကဵုဇြဟတ် အလဵုအသဳဍုၚ်ဂၠးကဝ်တံဂှ် မ္ဒးဂစာန်အာရောၚ်သ္ဂးလဝ်ရ။
တုဲပၠန် သွက်ဂွံကေတ်တာလျိုၚ် သောၚ်ကလးကဵုအရာကိစ္စ ညးမကဵုမံၚ်အရီုဗၚ်ထံက်ဂလာန် ပၠန်ဂတးတမ်ကညၚ် ကောန်ဍုၚ်ဗမာစိုပ်မံၚ်ဍုၚ်သ္အာၚ် ဟွံဗၠးဘဲနူပရေၚ်ကရေပ်ဓရတ် သၟဝ်တဲဂကောံပၞာန်တံဂှ်ကီုဂှ် BNI – Myanmar Peace Monitor ကဵုလဝ်ကသပ်ကီုရ။
တုဲပၠန် ဍုၚ်ဇိုၚ်ဝုတ်ဒိုဟ် အလဵုအသဳကြုက်၊ အေန္ဒိယ၊ သေံတံကီု အလဵုဂၠးကဝ်ဂမၠိုၚ်တံကီု တော်ဆပရေၚ်ဂုဏ်ဖဵု ပရေၚ်ပိုန်ဒြပ်ညးတံတုဲ ကဵုကၠုၚ်ဖျုန်ဆက်ဆောံကုဂကောံပၞာန်သၟးဟွံက ပေါဲရုဲမာဲဂှ်လေဝ် မၚ်ထံက်မံၚ်ဂလာန်ရောၚ် သ္ဂးရ။
ပ္ဍဲအကြာပရေၚ်ဍုၚ်ကွာန်ဂၠးကဝ် အပြံၚ်အလှာဒှ်မံၚ်ဏံ အရာကဵုဖျူန်လ္တူပရေၚ်ဍုၚ်ဗမာဂှ် ယအ်ဒေက်စှ်ေအာ ကၠးမးမံၚ်တုဲ တန်တဴကဵုတၠုၚ်လအာအလဵုအသဳဍုၚ်ဂၠးကဝ်တံ ပွမအပြံၚ်အလှာဲကဵုအာဖျုန်တံဂှ် နကဵုဌာနဝန်ဇၞော် ဍုၚ်သ္အာၚ် NUG ဝွံ ဗီုပြၚ်နဲကဲ ပွမစုက်လုက်တၟိ နတဲစှ်ေစှ်ေမ္ဒးကလေၚ်သ္ၚဳဂၠိပ်ထေက်ရောၚ် ကဵုလဝ်ကသပ်ရ။
ဗွဲတၟေၚ် ပရေၚ်ညဳသာ ဂကောံဇြဟတ်ပၠန်ဂတး သီုဖအိုတ်တံဂှ် ဒးလးထ္ၜးအာကဵု အကြာပွဳဗွိုၚ်ဍုၚ်ဂၠးကဝ်ဂမၠိုၚ်တံတုဲ အရာဇြဟတ်ပရေၚ်စန်ပကောံညဳသၟဟ် ဂကောံဇြဟတ်ပၠန်ဂတးသီုဖအိုတ် ညံၚ်ဂွံမံက်ဂတဝ် ပြကတ်အာဂှ်လေဝ် ဗွဲတၟေၚ်နွံမံၚ်ပၟိက်ကွေံကွေံရောၚ် ပ္ဍဲလိက်ဒုၚ်စဳရေၚ် BNI – Myanmar Peace Monitor ဗတိုက်ဖအောဝ် ကဵုဏာလဝ်ကသပ်ရ။
ပရိုင်-သြၚ်လောန်တိုၚ်မ်
Photo – NUG