လေဝ်ကေကဝ်၊ အံက်တဝ်ပါ ၁
တွဵုရးကရေၚ် ပွိုၚ်ဍုၚ်ဗြဝတဳပ္ဍဲလေဝ်ကေကဝ် ဟိုတ်နူပေါဲဗတိုက်ကလေၚ်ဒှ်မံၚ်တုဲ လၟိဟ်ရဲဒဴပၞာန်တံထပ်ပဵုတိုန်ကၠုၚ်ဂှ်ရ နွံပၟိက်မံၚ်ကဵုဇွောံမစၞစသုၚ်ဂမၠိုၚ်ရောၚ် ဂကောံဇာဖိုၚ်လေဝ်ကေကဝ် လလောၚ် ပတိတ်လဝ်ရ။
ပ္ဍဲကရပ်ဍုၚ်လေဝ်ကေကဝ်ဂှ် အကြာဒပ်ပၞာန်ဗမာကဵုဒပ်ပၠန်ဂတးတံ ပေါဲဗတိုက်ဒှ်မံၚ်တုဲ ညးဒေသနူလေဝ်ကေကဝ်၊ ထဳမေဝ်ဝါခဳကဵု ကွာန်ပွဳပွူကရပ်တံဝွံ စနူဂိတုသိပ်တမ်ပါ ၉ ဂှ်ဒးဂြိပ်ပါဲမံၚ်ရ။
အကြာပေါဲဗတိုက်ၜါဏံဂှ် ပ္ဍဲကဵုဗ္ဒိုပ်ဒဴပၞာန် ၇ ဒၞာဲတံ လၟိဟ်ရဲဒဴပၞာန် ၁၀၀၀ ပြၚ် စိုပ်ကၠုၚ်လဝ်တုဲ ဟိုတ်နူဒှ်မံၚ်အခိၚ်ကသီုတုဲ သွက်ရဲပါဲဒဴပၞာန်တံအခက်အခုဲဗွဲမဂၠိုၚ် ဒးဆဵုဂဗမံၚ်အိုတ်ရ။
ဟိုတ်နူပေါဲဗတိုက် ညးဍုၚ်ကွာန်ရဲဒဴပၞာန်ဂမၠိုၚ်တံဂှ် အလန်ကဵုအလန်ဒးဂြိပ်ပါဲဒဴမံၚ်လဝ်တုဲ သွက်ဘဝ ဂွံတန်တဴအာဂှ် ဒးဆဵုဂဗမံၚ်ကဵုပရေၚ်စသုၚ်မံၚ်စံၚ် အကြေပ်ဂြတ်လောန်ကီု အရာသွက်ဂွံကလေၚ် ဒက်ပတန်ပၠန်လေဝ် တင်နွံပၟိက်ဗွဲမဂၠိုၚ်နွံမံၚ်ရောၚ် ညးလုပ်ဂကောံဇာဖိုၚ်လေဝ်ကေကဝ် နဝ်ဂျက် ဟီုရ။
ဂကောံဇာဖိုၚ်လေဝ်ကေကဝ်တံဂှ်တှ်ေ ကဵုမံၚ်ပရေၚ်အရီုဗၚ် ကုညးဍုၚ်ကွာန်ရဲဒဴပၞာန်ဂမၠိုၚ်တံ ၁၀ ဝါပြၚ်အာတုဲ အဓိက တၚ်နွံပၟိက်ဂှ် သ္ၚု၊ ယာတ်ကၟဳစဵုဒၞာ၊ စၞစဟကှ်နာနာ ဂၠိက်ယာတ်တံကဵုကၞဴတံကီု နကဵုကာတၟေၚ်ဂှ် စက်ဇြောတ်ဍာ်ကဵုသ္ၚိဍာ်တံဂှ် ဘိုၚ်ကဵုလဝ်အရီုဗၚ်ရဂှ်လေဝ် နူကဵုဂကောံဇာဖိုၚ်လေဝ်ကေကဝ်ကဵုလဝ်သမ္တီရ။
တုဲပၠန် သွက်ဂွံကဵုအရီုဗၚ်ညးဒဴပၞာန်တံမ္ဂး အရာတၚ်နွံပၟိက်ညးတံဂွံကဵုအရီုဗၚ်မာန်ဂှ် ကၠုၚ်ပံၚ်တောဲဆက်ဆောံကဵု ဂကောံဇာဖိုၚ်လေဝ်ကေကဝ်မာန်ရောၚ် ကော်ဘိက်လဝ်နွံရ။
ပ္ဍဲလေဝ်ကေကဝ်ဂှ် အကြာဒပ်ပၞာန်ဗမာကဵု ဂကောံဇြဟတ် ဒပ်ပၠန်ဂတး KNLA သ္ကိုပ်သ္ကလဝ်တံ ထပက်မံၚ်ကရောၚ်ပၞာန် ဒဵုကဵု သိပ်တမ်ပါ ၃၀ ဂှ် ပေါဲဗတိုက်ဇၞော်ကဵုဇြဟတ်ဆက်ဒှ်မံၚ်တုဲ နူကဵု ဒပ်ကဝ်မယှေန်ပၞာန် ဘိုၚ်ပန်ရီုမံၚ်ကဵုလွဟ်ဇၞော် ဇၞော်ကဵု ဇြဟတ်ရ။
တုဲပၠန် ဟိုတ်နူဒပ်ကဝ်ယှေန်ပၞာန်ဗတိုက်ကြဳဗုၚ် နကဵုဒရုၚ်ဂှ်ရ ပ္ဍဲကဵုကွာန်ဖလူ၊ မေန်လက်ပါန် နွံမံၚ်ကရပ် ဍုၚ်လေဝ်ကေကဝ်ဂှ် ဘာဗတောန်လိက်ကဵုဘာလကျာ်ဂမၠိုၚ်ဒးဗုၚ်တုဲ လီုလာ်အာလဝ်နွံရဂှ် တမ်ရိုဟ်ကၞက်ညးဒေသတံ ဟီုလဴလဝ်ရ။
ပရိုၚ်-သြၚ်လောန်တိုၚ်မ်
Photo – လေးကေကော်လူငယ်ကွန်ရက်