ဝါယှေန်တန်၊ အံက်တဝ်ပါ ၁
အစဳဇန်တၟိအမေရိကာန် သွက်ဒေသၚာ်ၜဳဂါဇာဂှ် ကဍိုပ်သ္ကိုပ်သ္ကုတ်ဍုၚ်ဗၟံက်လဒေါဝ်ကဵု ယူရောပ်တံ ဒုၚ်တၠုၚ်တုဲ နကဵုဂကောံဟာမာတ်သ် သွက်ဂွံဒုၚ်တဲအစဳဇန် ထရ ကဵုလဝ်သတိရ။
အတိုၚ် အစဳဇန် ထရကဵု သ္ကိုပ်ဝန်ဇၞော်အေတ်သရေ နေတာန်ညာဟုတံ တုပ်လဝ်စိုတ်မ္ဂး ပရေၚ်လဝေၚ်ပၞာန်တံ ညံၚ်ဂွံဒေါအ်ထောံလၟုဟ်၊ ပးဒၞန်လမျီုဂျိုၚ်သှ်ေမံၚ် ၂၀ ဂှ် ဟာမာတ်သာ်ညံၚ်ဂွံဗလးနၚ်၊ ရုပ်ဇွပးဒၞန်မ္ဒးချိုတ်လဝ် ၜါဇြေန်ပြၚ်သှ်ေမံၚ်တံ ပွိုၚ် ၇၂ နာဍဳဂှ် ညံၚ်ဂွံကလေၚ်ဗစိုပ်နၚ် ကေုာံ လၟိဟ်ဂၠိုၚ်ကဵုကၠမ် ကောန်ဒေသဂါဇာ ဒးဒုၚ်ရပ်လဝ်ဂှ် ညံၚ်ဂွံဗလးကဵု ပၠုပ်လဝ်ဂလာန်ရ။
အစဳဇန်ပရေၚ်ၜိုဟ်လလမ် သ္ၚိစၠတ်ဗု ၂၀ တၚ်ဂှ် ပလံၚ်ဗစိုပ်လဝ်ကဵု ဂကောံဟာမာတ်သ်တုဲဒှ်အာယျ တမ်ရိုဟ်ကၞက်ပါလက်သတိုၚ် ကြပ်မံၚ်ကဵု ပရေၚ်ပညဳပညပ် ပရေၚ်ဒေါအ်ပန်ပှော်မွဲဒၞာဲ ဟီုရ။
ပ္ဍဲဂကောံအလဵုအသဳ အနာဂတ်ဂါဇာတေံ နကဵုဂကောံဟာမာတ်သ် ညံၚ်ဟွံဂွံပါလုပ်အာ အာတ်မိက်လဝ်တုဲ ဗွဲကြဴဏံ ဍုၚ်ပါလက်သတိုၚ် သွက်ဂွံမံက်ဂတဝ်ကၠုၚ် ပံက်လဝ်ကဵုဂၠံၚ်ရ။
ပေါဲသဳကၠဳသ္ၚိစၠတ်ဗုတုဲ ပ္ဍဲကဵုကၠောန်အာလဝ်ပေါဲသောၚ်ကလးလိက်ပရိုၚ်ဂှ် အစဳဇန်ထရဝွံ သွက်ပရေၚ်ၜိုဟ်လလမ် ဒှ်လၟေၚ်တ္ၚဲလုပ်ဝင်မွဲတ္ၚဲရောၚ် ဟီုရ။
ဆဂးဂှ် အစဳဇန်ဏံ ယဝ်ရဂကောံဟာမာတ်သာ်ဟွံတုပ်စိုတ်မ္ဂး ညံၚ်ဟာမာတ်သ် ဟွံဂွံကဵုအန္တရာဲမာန် အစဳဇန်ပသောၚ်သ္အးဏာ အမေရိကာန် ကဵုအရီဗၚ်ရောၚ် ထရ ဟီုလဝ်ကဵု နေတေန်ညာဟု ရ။
နကဵုဂကောံဟာမာတ်သာ် ယဝ်ရတးပါဲအစဳဇန်ဏံ ဟွံသေၚ်မ္ဂး ဟွံဗက်စမ္ဂး နကဵုအေတ်သရေ ဒဵုကဵုကမၠောန်တုဲဒှ် ကၠောန်အာရောၚ် နေတေန်ညာဟု သ္ဂးလဝ်ရ။
ဂကောံအုပ်ဓုပ်အဝဵုပါလက်သတိုၚ် မအုပ်ဓုပ်လဝ်ဒေသဂါဇာ ဇိုၚ်ၜဳပလိုတ် ဒၞာဲအေတ်သရေတံ သီဂွံလဝ်တံဂှ် ပရေၚ်လွဳဂစာန် သမ္မတအမေရိကာန်ဝွံ နွံကဵုပရေၚ်ယဵုလ္ဂူ ပိုတ်သ္ကုတ်ကွေံရောၚ် ဟီုရ။
ပေါဲပၞာန်ဂါဇာ ညံၚ်ဂွံဒေါအ်အာ ပရေၚ်လွဳဂစာန် ထရ သ္ကိုပ်သ္ကဂှ် ထံက်ဂလာန်ရ သာ်ဝွံ ယူအေအဳ၊ သဝ်ဒဳအာရေဗဳယာ၊ ကာတာ၊ အဳဂျေတ်၊ ဂျဝ်ဒါန်၊ တူရကဳ၊ အေန်ဒိုနဳယှာကဵု ပါကေတ်သတာန်တံ ပံၚ်တောဲတုဲ လလောၚ်တြးလဝ်ရ။
အတိုၚ်အစဳဇန်လၟုဟ်မ္ဂး ဂါဇာဂှ် ပံၚ်အာကဵု ဒေသပြၚ်ၜဳပလိုတ်တုဲ နဒဒှ်ဍုၚ်နိဂီု ပါလက်သတိုၚ် ဒက်ပတန်အာရောၚ်။
ဥက္ကဌကံၚ်သဳယူရောပ် အာန်တိုနဳယို ကဝ်သတာ၊ သ္ကိုပ်ဝန်ဇၞော် အဂႅလိက် သတာမာ၊ သမ္မတပြၚ်သေတ် မက်ကရောန်တံလေဝ် ဒုၚ်တၠုၚ်ဏာ အစဳဇန်ဂါဇာ ထရဖန်ဖက်လဝ်ဂှ်ရ။
Ref:BBC