မတ်မလီု၊ အံက်တဝ်ပါ ၁
သွက်ပေါဲရုဲမာဲကဝ်မယှေန်ပၞာန် ကၠောန်အာ ပ္ဍဲဂိတုဒဳဇြမ်ပါဏံ လ္တူဗာန်လဝ်စရၚ်မာဲတံဂှ် ညးဍုၚ်ကွာန်တံပရေၚ်စိုတ်ဟွံလုပ်စဟၟဲပုဟ်ဂှ် ဟီုကဵုဌာန်ပရိုၚ်သြၚ်လောန်တိုၚ်မ်ရ။
သွက်ဂွံစကၠောန်အာပေါဲရုဲမာဲ ပ္ဍဲဂိတုဒဳဇြမ်ပါဏံဂှ်နကဵုအလန်ပထမ စနူဂိတုသိပ်တမ်ပါ ၃၀ ဒဵုကဵု အံက်တဝ်ပါ ၁၃ တေံ ဗာန်စွံလဝ်စရၚ်မာဲရောၚ် နူကဵုကဝ်မယှေန် ပေါဲရုဲမာဲကၟိန်ဍုၚ် လလောၚ်တြးလဝ်ရ။
ပ္ဍဲကဵုရုၚ်ကဝ်မယှေန်ပါ် အရာပ်၊ ဂကောံကွာန် မဆေၚ်စပ်တံဂှ် နဒဒှ်အလန်ပထမဏံ ပွိုၚ် ၁၄ တ္ၚဲ ဗာန်စွံလဝ်တုဲ ဒၟာနူ ဟိုတ်နာနာသာ်တုဲ ပ္ဍဲကဵုအရာပ်ကဵုကွာန်တံဗါန်စွံလဝ်စရၚ်မာဲဟွံမာန်မ္ဂး စရၚ်မာဲတံဂှ် အာရံၚ်ကေတ် ဒၞာဲကဵုရုၚ်ပါ်ပွိုၚ်ဍုၚ်တံမာန်ရောၚ် သ္ဂးလဝ်ရ။
လ္တူကဝ်မယှေန်ပၞာန်ကၠောန်အာပေါဲရုဲမာဲဏံဂှ် ဟိုတ်နူညးဍုၚ်ကွာန် စိုတ်ဟွံလုပ်စတုဲ လ္တူစရၚ်မာဲတံဂှ်လေဝ် စိုတ်ဟွံလုပ်စကီု စရၚ်မာဲတံဂှ်ဟွံယဵုလ္ဂူတုဲ ဂလာန်ပတေဟ်ဟၟဲပုဟ်ဂှ် ညးဍုၚ်ကွာန်မွဲတၠ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
“ပေါဲရုဲမာဲဍေံတံကၠောန်ဏံဂှ် ညးဍုၚ်ကွာန်ဗွဲမဂၠိုၚ်ဂှ် စိုတ်ဟွံလုပ်စပုဟ်။ ၜိုတ်ပိုဲတီ အခိၚ်ကၠောန်စရၚ်မာဲတံဂှ် ပရေၚ်ယဵုလ္ဂူတပ်တးဟၟဲလဝ်ပုဟ် ဟီုဂးမံၚ်အိုတ်ရ။ ဍေံတံဠာန်တဝဵုရ။ မုဒှ်ရောတှ် လၟုဟ် မၞိဟ်ချိုတ်လဝ်တံကီု ရဲတိတ်အာဍုၚ်သ္အာၚ်တံကီု မၞိဟ်ညိညိဟွံသေၚ်ပုဟ်။ ပိုဲဒုၚ်တဲဟွံသေၚ်ပုဟ်၊ ဂလောန်ပတေဟ်လေဝ်ဟၟဲပုဟ်” သ္ဂးရ။
ပ္ဍဲစရၚ်မာဲဂှ် ယဝ်ရယၟုဇကုဟွံပါမ္ဂး နကဵုတၞးလိက်ဗီုပြၚ် (၃) သွက်ဂွံစုတ်ကဵုစရၚ်အာတ်မိက်မာန်တုဲ မၞိဟ်ပါလုပ်ဟွံထေက်တံနွံမ္ဂး နကဵုတၞးလိက်ဗီုပြၚ် (၄) သ္ပအာစောဒကမာန်ရောၚ် သ္ဂးရ။
တုဲပၠန် တၚ်နၚ်စရၚ်မာဲဗၠေတ်ဗၠေၚ်မှာရာမံၚ်ဆဵုညာတ်မ္ဂး နကဵုတၞးလိက်ဗီုပြၚ် (၄-ဂ) ဂမြၚ်ပတီ တၞးလိက်ကလေၚ်ပလေဝ် တၚ်နၚ်မာန်တုဲ နွံပၟိက်ကဵု တၞးလိက်ဗီုပြၚ်နာနာတံမ္ဂး ကၠုၚ်အာတ် ကေတ်မးမး ပ္ဍဲကဵုရုၚ်ကဝ်မယှေန်ပါ် အရာပ်/ဂကောံကွာန်တံမာန်ရောၚ် လလောၚ်တြးလဝ်နွံရ။
လ္တူကဝ်မယှေန်ပၞာန်တံ ဗာန်စွံလဝ်စရၚ်မာဲတံဂှ် ပရေၚ်က္တိုၚ်ကၟိုဟ်ဗီုကၠာတေံဟၟဲရတုဲ စိုတ်ဘိုအ်ဂွံလုပ်စလေဝ်ဟၟဲကီု ဟိုတ်နူဒှ်မံၚ် ပေါဲရုဲမာဲဟၟဲကဵုအရာပရေၚ်ကၠးဖ္ဍးတံတုဲ စိုတ်ဟွံလုပ်စပုဟ် သၟတ်မွဲတၠ ဟီုရ။
“မၞိဟ်သီုဖအိုတ်တံရ ပေါဲရုဲမာဲဂှ် စိုတ်ဒဵုကဵုလုပ်စမံၚ်ဟွံသေၚ်ပုဟ်။ ဗီုဗီုကၠာတေံ စိုတ်က္တဵုကၟိုဟ်မံၚ်လေဝ်ဟွံသေၚ်ပုဟ်။ ဗာန်စွံလဝ်ဂှ် မိက်ဂွံဗာန်တှ်ေဗာန်လဝ်ရ။ ပေါဲရုဲမာဲ သီုညးဖအိုတ်ပါလုပ်မံၚ်ဟွံသေၚ်တုဲ စိုတ်ဟွံလုပ်စပုဟ်။ မွဲလပါ်ဂှ် လလောၚ်တြးလဝ် ဗာန်စွံလဝ်အတိုၚ်ဏံ။ မုလေဝ်ကၠောန်ဟွံဂွံ တၚ်တေံတၚ်ဏံ ညးမွဲမှ ဟွံအာရၚ်ပုဟ်” သာ်ဝွံသ္ဂးရ။
စပ်ကဵုစရၚ်မာဲတုဲ တၚ်နၚ်မိက်ဂွံထပ်ထပေၚ်၊ ပလီု၊ ပလေဝ်တံဂှ်ရေၚ်တၠုၚ်တုဲအာမ္ဂး နကဵုအလန်လက်ကရဴအိုတ် ပ္ဍဲဂိတုနဝ်ဝေန်ဗာဂှ် ကလေၚ်ထပ်ဗာန်အာမွဲဝါပၠန်တုဲ ဗီုနွံပၟိက် ထပ်ဗပေၚ်၊ နုက်၊ ပလေဝ်စုတ်တၚ်နၚ်တံမာန်ရောၚ် ကဝ်မယှေန်ပေါဲရုဲမာဲ သ္ဂးလဝ်ရ။
ဟိုတ်ဂှ်ရ သွက်သ္ဂောံဂွံစရၚ်မာဲ မဍိုက်ပေၚ်ကဵုတၚ်နၚ်တံမ္ဂး နကဵုညးဍုၚ်ကွာန်တၠဆန္ဒမာဲတံဂှ် မွဲသ္ၚိမ္ဂးမွဲတၠ အောန်အိုတ် မ္ဒးကၠုၚ်ရံၚ်တုဲ ပံၚ်တောဲပါလုပ်ရီုဗၚ်အိုတ်ညိဂှ် ကဝ်မယှေန်ပေါဲရုဲမာဲကၟိန်ဍုၚ် သၟဝ်တဲကဝ်မယှေန်ပၞာန် အာတ်မိက်လဝ်နွံရ။
ပရိုၚ်-သြၚ်လောန်တိုၚ်မ်
Photo – CJ