ဒူဗိုၚ်၊ ဝါယှေန်တန်၊ အံက်တဝ်ပါ ၂
နကဵုပရေၚ်ဗတိုက်သရိုက် အရာမဆုဲပြံၚ်ဒၞာဲ သမ္မတအမေရိကာန် ဒဝ်နေဝ်ထရ ပ္ဍဲကဵု ကလေၚ်ပလံၚ်ဖျဴဏာ ကောန်ဍုၚ်အဳရာန် ၄၀၀ အသုတ်ပထမတံဝွံ ပ္ဍဲအံက်တဝ်ပါ ၁ ဂှ် စိုပ်ဍုၚ်ကာတာတုဲ ဆက်ပလံၚ်ဗစိုပ်အာ တဳဟဳရာန်ရောၚ် ညးတာလျိုၚ်ၜါလပါ်တံ ဟီုရ။
ပ္ဍဲကဵု အသုတ်ပထမဏံမ္ဂး ရဲဒးဒုၚ်ဖျေံလဝ်ထံၚ် နကဵုအမှုရာဇဝတ်တံကီု နကဵုဗဗွဲသၞောဝ်ဟွံသေၚ် လုပ်ကၠုၚ်လဝ် အမေရိကာန်တံကီု ပါလုပ်မံၚ် ညးတာလျိုၚ်အမေရိကာန် ဟွံမိက်ထမံက်ယၟု ဟီုရ။
စပ်ကဵုပရေၚ်ကိုန်အစဳဇန် နျူကလဳယာ အဳရာန်တုဲ အကြာဍုၚ်ၜါဇီုဟဗတ်မံၚ်တံ နကဵုပွမပံၚ်တောဲ လၟေၚ်ဓမ္မတာဟွံသေၚ်ရောၚ်။
ပရေၚ်ကိုန်အစဳဇန် နျူကလဳယာတံဂှ် သွက်အရၚ်ညးဍုၚ်ကွာန်တံ စကာသုၚ်စောဲရောၚ် တဳဟဳရာန်ဟီုလဝ်ကီုလေဝ် ဂစာန်ကၠောန်မံၚ် လွဟ်လက်နက်နျူကလဳယာရောၚ် အမေရိကာန် ဒှ်မံၚ်သံသယရ။
သွက်ဂွံကေတ်အာကသပ် တၚ်တုပ်စိုတ် ဆေၚ်စပ်ကဵုပရေၚ်ဍုၚ်ကွာန်ကု အမေရိကာန်ရောၚ်ဟီုဂှ် ညးတာလျိုၚ်တးပါဲလဝ်ရ။
နကဵုအစဳဇန်တၟိ ပရေၚ်တာဒၞာ ပွမဆုဲပြံၚ်ဒၞာဲမံၚ် အလဵုအသဳအမေရိကာန်မ္ဂး နကဵုဗဗွဲသၞောဝ်ဟွံသေၚ် လုပ်စိုပ်လဝ်ဗွဲမဂၠိုၚ်ပါလုပ် ကောန်ဍုၚ်အဳရာန် ၄၀၀ တံ သွက်ဂွံကလေၚ်ပလံၚ်ဖျဴနၚ် အမေရိကာန် ပလေဝ်ပလေတ်မံၚ်ရောၚ် ဂအုပ်သ္ကိုပ်စၞောန်ပ္ညုၚ် စပ်ကဵုစၠတ်ထဝ် ဌာနဝန်ဇၞော်ဍုၚ်သအာၚ် အဳရာန် ဟိုသိၚ် နဝ်ချာဗာဒဳ ဟီုလဝ်ရ။
ပ္ဍဲကသုတ်ပထမဏံ နူကဵုမက္ကသဳကိုမွဲအဆံၚ် ကောန်ဍုၚ်အဳရာန် ကၠတ်လုပ်ကၠုၚ်လဝ် အမေရိကာန် ၁၂၀ ပါလုပ်ရောၚ် ဂအုပ်သ္ကိုပ်စၞောန်ပ္ညုၚ် ဟိုသိၚ် ဟီုလဝ်ရ။
ညံၚ်ဂွံရှ်ေသှ်ေ အခေါၚ်အရာ ကောန်ဍုၚ်အဳရာန် နွံမံၚ်အပ္ဍဲဍုၚ်အမေရိကာန်တံဂှ်လေဝ် ဟိုသိၚ် ဗတိုက်ဖအောဝ်လဝ် ကီုရ။
အသုတ်ပထမ မၞိဟ် ၁၂၀ ပါလုပ်တံ ပွိုၚ်မွဲၜါတ္ၚဲဏံ ကလေၚ်စိုပ်အဳရာန်ရောၚ် ညးတေံ ဟီုရ။
နူကဵုတွဵုရး လူဝဳသဳယာနာ ပ္ဍဲကဵုသိပ်တမ်ပါ ၃၀ ၜၚ်ကျာ စတိတ်ကၠုၚ်လဝ်ဂှ် ပ္ဍဲအံက်တဝ်ပါ ၁ စိုပ်ဍုၚ်ကာတာတုဲ ကောန်ဍုၚ်အဳရာန်တံဏံဂှ် သၠောဲပြံၚ်အာကဵု ၜၚ်ကျာသွက်ဂွံပလံၚ် တဳဟဳရာန်ရောၚ်။
Ref:Reuters