လေဝ်ကေကဝ်၊ အံက်တဝ်ပါ ၂
ပ္ဍဲကဵုတွဵုရးကရေၚ် ဍုၚ်တၟိလေဝ်ကေကဝ်ဝွံ ပေါဲဗတိုက်အကြာ ဒပ်ကဝ်မယှေန်ပၞာန်ကဵု ဂကောံဇြဟတ်ပၠန်ဂတး KNLA ၜါလပါ်တံ ပဵုတုဲသ္ကာတ်တိုန်မံၚ်တုဲ ပ္ဍဲအံက်တဝ်ပါ ၁ ဂှ် နကဵုၜၚ်ကျာပၞာန် ကြဳဖျေံဗုမ် အပ္ဍဲကဵု လေဝ်ကေကဝ်ရဂှ် တမ်ရိုဟ်ပရိုၚ်ညးဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
သၠုၚ်ကျာဍုၚ်ဗြဝတဳ ဒၞာဲဂကောံဇြဟတ်ပၠန်ဂတး KNLA တံ သီကေတ်လဝ်ဏံ သွက်ဂွံကလေၚ်သီထိၚ်ချုက်အာ ဍုၚ်တၟိ လေဝ်ကေကဝ်ပၠန်ဂှ် စနူကဵုဂိတုသိပ်တမ်ပါ ၂၁ တေံ နူကဵု ဒပ်ကဝ်မယှေန်ပၞာန် ပါ်လဝ်ဟွံအောန်နူကဵု ပိကရောၚ်ပၞာန်တုဲ ထပက်မံၚ်ပၞာန်ဗလးတိ ဒှ်ကၠုၚ်လဝ်ပေါဲဗတိုက်ရ။
စနူဂိတုအံက်တဝ်ပါ ၁ ဏံဂှ်တုဲ နူကဵုဒပ်ကဝ်မယှေန်ပၞာန် ခလရ ၂၇၅ ဖျေံသ္ဇိုၚ်ဗြဝတဳဂှ်မွဲအဆံၚ် နကဵုလွဟ်ဇၞော် ပန်ပလံၚ်မံၚ်ကဵု အပ္ဍဲဍုၚ်လေဝ်ကေကဝ် သၟးဟွံက နူကဵုၜၚ်ကျာလေဝ် ကြဳဖျေံဗုမ်ကီု သီုကဵုဒရုၚ်တံဗတိုက်မံၚ်ရောၚ်ဂှ် တမ်ရိုဟ်ပရိုၚ်ညးဒေသတံ သ္ဂးရ။
သွက်ဂွံကလေၚ်ဂွံ ဍုၚ်လေဝ်ကေကဝ်မာန် ပ္ဍဲကဵုပရေၚ်လဝေင်ပၞာန် ကဝ်မယှေန်ပၞာန်ဏံဂှ် သီုကဵု ဒပ်မၚ်ပယျဵုကရေၚ် BGF ဒပ်သၟဝ်တဲ ဒုသ္ကိုပ်ပၞာန် မုက်တုၚ် (မုတ်သုန်) ကဵု ဒုသ္ကိုပ်ပၞာန် တေန်ဝေန်တံ ပံၚ်လဝ်ကဵု ဒပ်ကဝ်မယှေန်ပၞာန်မွဲစွံတုဲ ဗတိုက်မံၚ်မွဲကရောံကီုရောၚ် တမ်ရိုဟ်ပရိုၚ်ညးဒေသတံဟီုရ။
အပ္ဍဲကဵုပေါဲဗတိုက်ဏံ ဒၞာဲဗ္ဒိုပ်ကုန်ကၟာဍာ် လေဝ်ကေကဝ်ဂှ် ကဝ်မယှေန်ပၞာန် ကလေၚ်ထိၚ်ချုက်ဂွံလဝ်တုဲ လုပ်ကၠုၚ်စိုပ်မံၚ် အပ္ဍဲဍုၚ်ရဂှ် တမ်ရိုဟ်ပရိုၚ် ညးဒေသတံဟီုကီုလေဝ် လပါ် ဒပ်ကဝ်မယှေန်ပၞာန်ကီု ဂကောံဇြဟတ်ပၠန်ဂတး KNLA တံကီု စပ်ကဵုပေါဲဗတိုက်ဏံ လလောၚ်လဝ်ပရိုၚ်ဟၟဲဏီရ။
ပ္ဍဲကဵုပေါဲဗတိုက်လေဝ်ကေကဝ်ဏံ နူကဵုဒပ်ကဝ်မယှေန်ပၞာန်တံ စကာသုၚ်စောဲလဝ် ကောန်ပၞာန်တၟိ စှ်ေလဝ်ဘာပၞာန် ယိုက်ဝေန်ပၞာန် တံတုဲ ဖျုၚ်ဗ္စလဝ်ဂဥုဲၜူမာဲတုဲ ဗလးဏာမုက်ပၞာန် ကဵုဒုၚ်ချိုတ်မံၚ်ဂှ်ရ အပ္ဍဲကဵုပေါဲဗတိုက်ဏံ ကောန်ပၞာန်တၟိ ရဲဒပ်ကဝ်မယှေန်ပၞာန်တံ ချိုတ်အာလဝ် ဂအုံကဵုဂအုံ နွံမံၚ်ရောၚ် တမ်ရိုဟ်ပရိုၚ်ပၠန်ဂတးတံ လဴစလဝ်ရ။
ဟိုတ်နူပေါဲဗတိုက် ညးဒေသ လေဝ်ကေကဝ်၊ ထဳမေဝ်ခဳဝါကဵု ကွာန်ကရပ်ကရပ်တံဏံ ဒးဂြိပ်ပါဲဒဴအာ ဒၞာဲဗၠးဘဲဒဏ်တံတုဲ သွက်ဇွောံမစၞစသုၚ်နာနာကဵု ဒၞာဲမံၚ်တံ နွံမံၚ်ပၟိက်ကဵု ယာတ်စဵုနာနာ တံရဂှ် ဂွံတီကေတ် နူညးကဵုမံၚ်ပရေၚ်အရီုဗၚ် ညးဒဴပါဲဘဲပၞာန်တံရ။
ပရိုၚ်-သြန်လောန်တိုၚ်မ်
Photo – Social Media