တနင်သဳ၊ အံက်တဝ်ပါ ၂
ပ္ဍဲကဵုရးတနၚ်သဳ ဒပ်ကဝ်မယှေန်ပၞာန် တမ်ဒပ် ခလရ ၂၈၀ ဖျေံသ္ဇိုၚ် ပွိုၚ်ဍုၚ်တနၚ်သဳဂှ် ကောန်ပၞာန်တၟိစှ်ေနူဘာပၞာန် ပန်တၠ ဂြိုပ်တိတ် အာတုဲ ကၠုၚ်ဖျေံလဝ်လွဟ်နွံရဂှ် နူကဵုဗော်သွးကောန်ဂကူကရေၚ် KNU ခရိုၚ်ဗိက်-ထဝါဲ လလောၚ်ပတိတ်လဝ်ရ။
ကောန်ပၞာန်တၟိ စှ်ေလဝ်တာလျိုၚ် ပ္ဍဲကဵု တမ်ဒပ် ခလရ ၂၈၀ ပန်တၠတံဂှ် ဂြိပ်တိတ်ကၠုၚ်လဝ် ပ္ဍဲဂိတုသိပ်တမ်ပါ ၃၀ တုဲ ကၠုၚ်ဖျေံလွဟ် ဒၞာဲကဵု ဒပ်ပၞာန်ဗၠးၜးကောန်ဂကူကရေၚ် KNLA မဟာဒပ် (၄ ) ဇရေၚ်တမ်ဒပ် (၁၁) မဒှ်ရ။
ကောန်ပၞာန်တၟိပန်တၠ ကၠုၚ်ဖျေံလွဟ်တံဝွံ နကဵုဥပဒေယိုက်ဂၠေၚ် ဝန်ပၞာန် ကဝ်မယှေန်ပၞာန်သီအဝဵုတံ နဗွဲအဓ္ဓမဟေၚ် ဒးဒုၚ်ပကောံ ပၠုပ်ကဵုတိုန်ဘာပၞာန်တုဲ ဒးဒုၚ်ပလံၚ်ဗစိုပ်နၚ် တမ်ဒပ် ခလရ ၂၈၀ ဖျေံသ္ဇိုၚ်တနၚ်သဳရ။
တုဲပၠန် နူကဵုတမ်ဒပ်ခလရ ၂၈၀ မွဲအဆံၚ် ဒးပလံၚ်ဗစိုပ်မုက်ပၞာန် လပါ်ကွာန်သိၚ်ခေါန်တေံဂှ်တုဲ လွဟ်ဟွံပါ ဂြိပ်တိတ်ကၠုၚ်ဖျေံလွဟ် စိုပ်ကၠုၚ် တမ်ဒပ်(၁၁) ဒပ်ပၞာန်ဗၠးၜးကောန်ဂကူကရေၚ် KNLA ရ။
လောန်ကၠုၚ်ဂိတုသိပ်တမ်ပါ ၁၇ ဂှ်လေဝ် နူကဵုဘာဗကတ်ဗကေၚ် ကွတ်ပၞာန် စၟတ် ၁၂ ဖျေံလဝ်သ္ဇိုၚ် ပလောက်ဂှ် သၟတ်ဒးဒုၚ် ပကောံလဝ်ကောန်ပၞာန်တၟိ ၇ တၠတံ ဂြိပ်တိတ်ကၠုၚ်လဝ်တုဲ ကၠုၚ်ဖျေံလွဟ်ကုဇရေၚ် ဒပ်ပၞာန်ဗၠးၜးကောန်ဂကူကရေၚ် KNLA ကီုရ။
ပရိုၚ်-သြန်လောန်တိုၚ်မ်
Photo – KNU