မတ်မလီု၊ အံက်တဝ်ပါ ၂
အခိၚ်ကြပ်ကၠုၚ်မံၚ်ကဵုပေါဲရုဲမာဲ ကဝ်မယှေန်ပၞာန်သီအဝဵု ကၠောန်အာဏံ သွက်သၞာဲဒါ Non CDM တံ စနူဂိတုအံက်တဝ်ပါ ၁ ဂှ်တုဲ ထပ်ဟပဵုကဵုသြန်ဂိတုရောၚ် လလောၚ်တြးလဝ်ရ။
ပ္ဍဲအရာ ထပ်ဟပဵုကဵုသြန်ဂိတုဏံမ္ဂး သၞာဲဒါဌာနဆေၚ်စပ်နာနာ Non CDM တံကီု၊ ရဲဒပ်ပၞာန်တံကီု သၞာဲဒါသၟာကမၠောန်စလိၚ်တ္ၚဲတံဟွံက သၞာဲဒါဇူကမၠောန်တံလေဝ် လၟေၚ်ဂိတုဂွံဒုၚ်စသိုၚ်ကီုရောၚ် သ္ဂးရ။
အပ္ဍဲဏံ သွက်သၞာဲဒါတံကဵု ညးဇူကမၠောန်တံဂှ် ကဵုအာ သြန်အထံက်ပၚ်လၟေၚ်ဂိတု ပိလက်ဒကေဝ်တုဲ လ္တူသၞာဲဒါ သၟာကမၠောန်စလိၚ်တ္ၚဲတံဂှ် မွဲတ္ၚဲ နူကဵု ၆၈၀၀ ဒကေဝ်ဂှ် ကဵုအာအထံက်ပၚ် ၇၈၀၀ ဒကေဝ်ရောၚ် လလောၚ်တြးလဝ်ရ။
ပရေၚ်ကဵုအထံက်ပၚ်သြန်ဂိတုဏံဂှ် နကဵု ပရေၚ်စန်ဒက်မာဲဒှ်တုဲ ပြဿနာဍံၚ်ဗက်ကၠုၚ်လက်ကရဴဟီုမ္ဂး ဒးဒုၚ်အာဘဲဒဏ် အနှေုန်ၚုဟ်ကပေါတ် ဍၚ်တိုန်မာန်ရောၚ် သၞာဲဒဴ CDM မွဲတၠ ပါ်ပါဲလဝ်ရ။
“ထပ်ဟပဵုကဵုပိလက်ဒကဝ်ဟီုဂှ် ပ္ဍဲကဵုပေါဲရုဲမာဲ ညံၚ်ဟွံဂွံဒစဵုဒစးဍေံတံ။ နနဲဗီုပြၚ်စန်ဒက်မာဲ ဗီုပြၚ်သၞောတ်ဗၜတ်ညိညကဵုလဝ်။ ကဵုလဝ်ကျာညိညိ။ ဖျေံကဵုဏာ။ ဆဂး ပြဿနာတောဲဗက်ကၠုၚ်လက်ကရဴဟီုတှ်ေ အနှေုန်ၚုဟ်ကပေါတ်ဍၚ်တိုန်ရောၚ်။ သီုညးဖအိုတ် ဒးဒုၚ်ပၠန်ရ” သာ်ဝွံ သ္ဂးရ။
နူကဵုကဝ်မယှေန်ပၞာန်ဝွံ သွက်သၞာဲဒါ Non CDM ဌာနဆေၚ်စပ် နာနာတံကဵုဒပ်ပၞာန်တံဂှ် လောန်ကၠုၚ် သၞာံ ၂၀၂၃ ဂိတုအံက်တဝ်ပါ မွဲဝါ၊ ပ္ဍဲသၞာံ ၂၀၂၄ ဂိတုအဝ်ဂတ် မွဲဝါ ထံက်ပၚ်ကဵုလဝ်သြန်အပဵု ပိ-ပိဠက်ဒကေဝ် နွံကၠုၚ်ကီုလေဝ် လၟုဟ်အလန်တတိယဏံ ထပ်ကဵုဏာ သြန်ထံက်ပၚ်အပဵုပၠန် သ္ဂးရ။
တုဲပၠန် လ္တူသၞာဲဒါလိၚ်တ္ၚဲကဵု သၟာကမၠောန်စလိၚ်တ္ၚဲတံကီု ကိုပ်ကၠာတေံ ပွိုၚ်မွဲတ္ၚဲ သွက်ဇြဟတ်ကမၠောန် ပွိုၚ် ၈ နာဍဳမ္ဂး နူကဵုခုတ်စၟတ်လဝ် ၄၈၀၀ ဒကေဝ်ဂှ် ထံက်ပၚ်ကဵုလဝ်အပဵု ၁၀၀၀ ဒကေဝ်ကီု လောန်ကၠုၚ် ပ္ဍဲသၞာံ ၂၀၂၃ ဂိတုအံက်တဝ်ပါ မွဲဝါ၊ ပ္ဍဲသၞာံ ၂၀၂၄ ဂိတုအဝ်ဂတ် မွဲဝါ၊ လၟုဟ်နကဵု အလန်တတိယ ထပ်ကဵုဏာ သြန်ထံက်ပၚ်အပဵုပၠန် လလောၚ်တြးလဝ်ရ။
နူကဵုကဝ်မယှေန်ပၞာန် ကဵုမံၚ်သြန်ထံက်ပၚ်အပဵု သွက်သၞာဲဒါ Non CDM ဌာနဆေၚ်စပ်နာနာဟွံက သီုကဵု သၞာဲဒါဇူကမၠောန်တံကီုလေဝ် ၜတ်ကၞာတ်အာကဵု ပရေၚ်ၚုဟ်မးကပေါတ်သၠုၚ်တိုန်အာလဝ် အခိၚ်ဒပ်ပၞာန်သီအဝဵုတုဲ ဗွဲကြဴဏံမ္ဂး မုအရာမှတၞဟ်ခြာအာဟၟဲရောၚ် သၞာဲဒါ Non CDM ဌာနဆေၚ်စပ်တံကဵု သၞာဲဒါဇူကမၠောန်တံ ဟီုဂးမံၚ်ရ။
ပရိုၚ်-သြန်လောန်တိုၚ်မ်
Photo – MOI