မတ်မလီု၊ အံက်တဝ်ပါ ၂
ပ္ဍဲကဵုတွဵုရးမန်ဒပ်ပၞာန်ဗမာ ဟလိုၚ်ပတိုန်ဇြဟတ်တုဲ သၠုၚ်မံၚ် ပရေၚ်ဂီုကၠီုဂှ် ပ္ဍဲအရာသွက်ဂွံတာဒၞာဲပေါဲရုဲမာဲ ကဝ်မယှေန်ပၞာန် ကၠောန်အာဏံ တၚ်ကော်ဆောအခက်အခုဲ ဒှ်ကၠုၚ်မာန်ရောၚ် နူလပါ်ဂကောံပၠန်ဂတး ညးတာလျိုၚ်လ္ၚဵုတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
ဒၞာဲဒေသ ဂကောံဇြဟတ်ပၠန်ဂတးရပ်လွဟ် ချဳဒရာၚ်ဇြဟတ်ခိုဟ်မံၚ် တံ ပွိုၚ်ဍုၚ် ကျာ်ထောဝ်၊ သဓီု၊ ၜဳကလေၚ်၊ ဇြဟ်ဗုကဵု ဍုၚ်ရေဝ်တံဂှ် သွက်ပရေၚ်ဂီုကၠီုဂးတုဲ လ္တူဍုၚ်ကီု ဒၞာဲကွာန်ဗ္ဒာဲဗ္ဒာဲဍုၚ်တံဂှ် ဒပ်ပၞာန်ဗမာ ဂေတ်ဂေၚ်မံၚ်ဟဂှ်ရ။
နကဵုဂကောံပၠန်ဂတးတံဂှ် နကဵုနဲကဲစုၚ်စုၚ် ဗတိုက်သရိုဟ်အာ ပေါဲရုဲမာဲကဝ်မယှေန်ပၞာန် ကၠောန်အာဏံဂှ်တှ်ေ အခက်အခုဲတံ နွံမာန်ရောၚ်ဂှ် ညးတာလျိုၚ်ဒပ်ပၞာန်စဵုဒၞာ PDF ခရိုၚ်သဓီု ကိုအေမေန်ထောန် ဟီုရ။
“ပေါဲရုဲမာဲကံၚ်သဳပၞာန် ဟွံလုပ်ဗဗွဲသၞောဝ်ဏံ နကဵုဂကောံပၠန်ဂတးပိုဲတံသီုဖအိုတ် သွက်ဂွံပလီုပလာ် ဗတိုက်သရိုဟ်ဏာ ဟီုဂးလဝ်တုဲယျ။ ဟိုတ်ဂှ်ရ နူလပါ်ပိုဲ နဲကဲစုၚ်စုၚ် ကၠောန်ဒစဵုဒစးအာတဝဵုရ။ သွက်အရၚ်ဏံ တၚ်ဝါတ်နွံလေဝ် နွံမာန်ဏောၚ်” သာ်ဝွံ သ္ဂးရ။
ဆဂး အခက်အခုဲဗီုလဵုရောဂှ် ဟွံဟီုပတိတ်လဝ်ရ။ ပြဟ်ဟ်ဏံ အပ္ဍဲကဵုသ္ကုတ်သၟဝ်ကျာ တွဵုရးဂှ် လ္တူဍုၚ်ကီု ဒၞာဲကွာန်ဗ္ဒာဲဗ္ဒာဲဍုၚ်တံဂှ်ကီု ဒပ်ပၞာန်ဗမာသၠုၚ်လဝ်ပရေၚ်ဂီုကၠီုတုဲ အကြာၜါလပါ် ပရေၚ်ပၞာန် သ္ကာတ်ကၠုၚ်မာန်ရောၚ် ညးဆက်ဟီုရ။
လောန်ကၠုၚ်ဂိတုသိပ်တမ်ပါ ၂၈ တေံဂှ် ဒပ်ပၞာန်ကဵု ဒပ်ဗၠာဲသၟိၚ် ဇြဟတ် ၅၀ ပြၚ်ပံၚ်တောဲလဝ်တံ လုပ်ကၠုၚ်ကွာန်သၞေဟ်ကရေၚ် ဍောတ် ပွိုၚ်ဍုၚ်သဓီုတုဲ ကော်ရပ်ဏာညးဒေသ ၃၀ ပြၚ်ရဂှ် ညးဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
လပါ်ဒေသသၠုၚ်ကျာ ရေဝ်ကဵုဇြပ်ဗုဂှ်လေဝ် ဂိတုတုဲကၠုၚ်တေံ ဒပ်မဟာမိတ်ပၠန်ဂတးတံ ထမံက်ကၠုၚ်လဝ်ပေါဲဗတိုက်ဆက်က်တုဲ ဗွဲကြဴဏံ ဒပ်ပၞာန်ထပဵုစွံကၠုၚ်ဇြဟတ်ရဂှ် သ္ကိုပ်ဌာနပရေၚ်စဵုဒၞာ ကံၚ်သဳဖိတ်ဒရေဝ်ဍုၚ်မန် MSFC တလနာဲ ဟီုရ။
“ကၠာကၠာတေံ ဒၞာဲဇြဟတ်နွံလၟိဟ်ကဵုစှ်ောဂှ် ထပေၚ်လဝ် ဇြဟတ်ကဵုကၠံ နွံမံၚ်။ တုဲပၠန် ဗီုပ္ဍဲကွာန်အနေၚ် ဍေံတံမံၚ်ဒၟံၚ် ပ္ဍဲကွာန်။ ဂေတ်ဂေၚ်အာကၠုၚ်မံၚ် အကြာကွာန်။ မိက်ဂွံဟီုဂှ်တှ်ေ ဒၞာလဝ်ကဵုညးဍုၚ်ကွာန်တံတုဲ ထပေၚ်ဇြဟတ်။ ရေဝ်သၠုၚ်ကျာ ရေဝ်သၟဝ်ကျာ ဒၞာဲဒေသသၠုၚ်ကျာဇြပ်ဗုတံ ဍေံတံပဵုတုဲထပေၚ်မံၚ်ဇြဟတ် ဒၞာလဝ်ကဵုညးဍုၚ်ကွာန်တံဏောၚ်” သာ်ဝွံ သ္ဂးရ။
နကဵုကဝ်မယှေန်ပေါဲရုဲမာဲကၟိန်ဍုၚ် သၟဝ်တဲကဝ်မယှေန်ပၞာန်ဂှ်တှ်ေ ပ္ဍဲကဵုကၞောတ်သၞာံဏံကဵု သၞာံဂတမံက်တေံ ပ္ဍဲကဵုကၠောန်အာပေါဲရုဲမာဲ သ္ကုတ်ညးကဵုညးတံဂှ်မ္ဂး အလုံတွဵုရး ၁၀ ပွိုၚ်ဂှ် နဒဒှ်ဒၞာဲဆန္ဒမာဲ သီုဖအိုတ် ခုတ်စၟတ်လဝ်ရ။
ပ္ဍဲကဵုတိဍာ် ဂကောံဇြဟတ်ပၠန်ဂတး ဒုၚ်သ္ဇိုၚ်ကဵုကောန်ဂကူတံကဵု ဂကောံဖျေံသ္ဇိုၚ်ဒေသ PDF တံကီု ဂကောံမဟာမိတ်တၞဟ်ဟ်တံ ဒၞာဲထိၚ်ချုက်ချဳဒရာၚ်မံၚ်တံဂှ် ကဵုအခေါၚ်ကၠောန်အာ ပေါဲရုဲမာဲဟွံသေၚ်ရောၚ် လလောၚ်တြးလဝ်ရ။
မွဲလပါ်ပၠန် ဂကောံကရေၚ်ရပ်လွဟ် BGF ကီု ဂကောံထပက်လဝ် စၟတ်တဲ NCA ပရေၚ်ဒေါအ်ပန်ပှော် DKBA ကဵု KNU/KNLA PC တံဂှ် လ္တူပေါဲရုဲမာဲကဝ်မယှေန်ပၞာန် ကၠောန်အာဏံ ထံက်ဂလာန် စဵုဒၞာကဵုအာပေၚ်ၚ်ရောၚ် ပ္ဍဲတ္ၚဲအကြာတံဏံ ပံၚ်တောဲ လလောၚ်တြးလဝ်ရ။
ဂကောံကရေၚ်ရပ်လွဟ်တံဏံ ပ္ဍဲကဵုတွဵုရးကရေၚ်ဟွံက ဒၞာဲဒေသမန် လ္ၚဵုလ္ၚဵုတံဂှ်လေဝ် ချဳဒရာၚ်မံၚ်ကီုတုဲ ပ္ဍဲကဵုဂကောံဇြဟတ်ပၠန်ဂတးတံ ဒစဵုဒစးအာပေါဲရုဲမာဲဏံဂှ် ဒှ်ကၠုၚ်တၚ်ကော်ဆောမွဲရောၚ် တလနာဲ ဟီုရ။
“ဒၞာဲဒေသမန်လ္ၚဵု ဂကောံကရေၚ်ရပ်လွဟ်ပိဂကောံဏံ ချဳဒရာၚ်မံၚ်ကီုဏောၚ်။ တၚ်ဏံလေဝ် ဒှ်ပရေၚ်ကော်ဆောမွဲကီုရ။ တုဲပၠန် တၚ်ကော်ဆောအခက်အခုဲမွဲပၠန်ဟီုတှ်ေ ဒၞာလဝ်ကဵု ညးဍုၚ်ကွာန်တံတုဲ ချဳဒရာၚ်မံၚ်နွံ။ ဒှ်မံၚ်အကာဲအရာ ဗီုဏံမ္ဂး ပ္ဍဲကဵုပရေၚ်ထမံက်ရုပ်ရဴ လဝေၚ်ပၞာန်ဂှ်တှ်ေ ညးဍုၚ်ကွာန်တံညံၚ်ဂွံဒးဘဲဒဏ်ဂှ် ပိုဲဒးရပ်စပ်ဖန်ဖက် ကၠောန်အာချိုတ်တ်ပၠိုတ်တ်ဏောၚ်” သ္ဂးရ။
ဆဂး ညံၚ်ဟွံဂွံထမံက်အာရုပ်ရဴပေါဲရုဲမာဲဂှ် နကဵုပရေၚ်ပၞာန် ပရေၚ်ဍုၚ်ကွာန်ကီု ပ္ဍဲဒၞာဲတိဍာ်ဇကုဂှ် ပံၚ်တောဲစဵုဒၞာအာကဵု မွဲကရောံ မဟာမိတ်တံဂှ်ရ နဲကဲညးဍုၚ်ကွာန်တံ ညံၚ်ဂွံဂိအောန် ဒစဵုဒစး အာရောၚ် ညးဆက်ဟီုရ။
သွက်ပေါဲရုဲမာဲသ္ကုတ် ၁ ကဝ်မယှေန်ပၞာန်ကၠောန်အာ ပ္ဍဲဒဳဇြမ်ပါ ၂၈ ဏံဂှ် စရၚ်မာဲတွဵုရးမန် အလန်ပထမဂှ် စနူသိပ်တမ်ပါ ၃၀ တုဲ ပွိုၚ်ၜါသတ္တဟ ဗာန်စွံလဝ် ပ္ဍဲကဵုရုၚ်ပါ် ကဝ်မယှေန်ပေါဲရုဲမာဲကဵု ရုၚ်အုပ်ဓုပ် အရာပ်/ကွာန်တံရ။
ဆဂး ညးဍုၚ်ကွာန်တံဂှ်တှ်ေ ပေါဲရုဲမာဲဏံကီု လ္တူဗာန်စွံစရၚ်မာဲတံ ဂှ်ကီု ပရေၚ်စိုတ်လုပ်စဟၟဲရောၚ် ဟီုလဝ်ကဵု ဌာန်ပရိုၚ်သြၚ်လောန်တိုၚ်မ် နွံရ။
ပရိုၚ်-သြန်လောန်တိုၚ်မ်
Photo – MOI