ဍာ်ဗု၊ အံက်တဝ်ပါ ၃
ပ္ဍဲကဵုရးတနၚ်သဳ ပွိုၚ်ဍုၚ်ဍာ်ဗု ဒၞာဲဗွိုၚ်သၞေဟ်ၜၚ်ဍာ်ဟယိုတ်ဂှ် ဒပ်ကဝ်မယှေန်ပၞာန်ဗမာ ဟိုတ်နူ ထပက်ကရောၚ်ပၞာန်လုပ်ကၠုၚ်တုဲ ညးဒေသ ၆ ကွာန်တံသီုဖအိုတ် ဒးပါဲမံၚ်ဘဲပၞာန်ရဂှ် ညးဒေသတံ ဟီုကဵုဌာန်ပရိုၚ်သြၚ်လောန်တိုၚ်ရ။
လောန်ကၠုၚ် ဂိတုသိပ်တမ်ပါ ၂၇ တေံရ နူကဵုတမ်ဒပ်ဖျေံသ္ဇိုၚ် ပွိုၚ်ဍုၚ်လံၚ်လုၚ် နကဵုဇြဟတ်ပၞာန်ဗွဲမဂၠိုၚ် ဒပ်ကဝ်မယှေန်ပၞာန် ဗမာတံ ထပက်လုပ်ကၠုၚ်ကရောၚ်ပၞာန် ဒၞာဲကဵုဗွိုၚ်သၞေဟ်ၜၚ် ဍာ်ဟယိုတ်ဂှ်ရ။ `
အတိုၚ်ညးဒေသတံဟီုလဴလဝ်မ္ဂး ကရောၚ်ပၞာန်တံဝွံ နူကဵုဍုၚ်လံၚ်လုၚ်မွဲအဆံၚ် စိုပ်ကၠုၚ်တိဍာ်ဗဒိုပ်ဗၠာဲသၟိၚ် မံၚ်မကာန်တုဲ နူဂှ်မွဲအဆံၚ်ပၠန်ထပက်လုပ်အာကရောၚ်ပၞာန် ပ္ဍဲကဵုဇရေၚ်ကွာန်ပါန်တအေန်၊ ပုၚ်ယှံၚ်၊ သၞေဟ်တၞံဇြဲ (ညောင်ပၚ်ဆိပ်) ကဵု ကွာန်မူဒူတံမဒှ်ရ။
ပြဟ်ဟ်ဏံ ဒပ်ကဝ်မယှေန်ပၞာန်ဗမာတံဂှ် လုပ်မွဲကွာန် တိတ်မွဲကွာန် ဟိုတ်နူဂေတ်ဂေၚ်ထပက်မံၚ် ကရောၚ်ပၞာန်တုဲ ကွာန်ပါန်တအေန်၊ ပုၚ်ယှံၚ်၊ သၞေဟ်တၞံဇြဲ၊ မူဒူ၊ ဧကနိ၊ ခမံက်ချံၚ်တံ အောန်အိုတ်နူ ၆ ကွာန် ညးဒေသ ၃၀၀၀ ပြၚ် ဒးဂြိပ်ပါဲမံၚ်ရောၚ် ညးတြုံရဲဒေသမွဲတၠ ဟီုကဵုဌာန်ပရိုၚ်သြၚ်လောန်တိုၚ်ရ။
တုဲပၠန် ကာလဒးဂြိပ်ပါဲအာလဝ်တံဂှ် သြန်ကဵု စၞစဇွောံမတံဂှ်တှ်ေ မၞိဟ်ကေတ်ဂတာပ်လေဝ်နွံ ညးကေတ်ဟွံဂတာပ်လေဝ်နွံတုဲ ပြဟ်ဟ်ဏံ ဒးဆဵုဂဗမံၚ်ကဵု အခက်အခုဲဗွဲမဂၠိုၚ်ကီု ပ္ဍဲကဵုဒၞာဲဂြိပ်ဒဵု ကြပ်အိုတ်ဂှ် ဗီုဒှ်ကဵုဒှ်ဒးပါဲအောပ်မံၚ်ရဂှ် ညးဆက်ဟီုရ။
မွဲလဂှ်ပါ်ပၠန် အခိၚ်ဒပ်ကဝ်မယှေန်ပၞာန်ဗမာ ထပက်ကၠုၚ်ကရောၚ်ပၞာန်ဂှ် ရပ်လဝ်ရဲကွာန်သၞေဟ်တၞံဇြဲ ညးတြုံ အယုက်ဇၞော် မတ်ညာတ်ဟွံခိုဟ်မွဲတၠဂှ်တုဲ သီကေတ်ဏာ သြန်၊ ထဝ်ကဵု ဖုၚ်တံလေဝ်နွံမံၚ် သ္ဂးရ။
ဒဵုကဵုအံက်တဝ်ပါ ၂ အခိၚ်ဗ္တံဂှ် ရဲဒပ်ကဝ်မယှေန်ပၞာန်တံ ဖျေံလဝ်ဒပ်ဒၞာဲဘာလကျာ် ကွာန်မူဒူကဵု ဒၞာဲသ္ၚိဌာန်ခိုဟ်ဟ်တံရောၚ် ညးဒေသမူဒူတံဟီုရ။
လောန်ကၠုၚ် ဂိတုသိပ်တမ်ပါ ၃၀ ဂှ်လေဝ် ကရောၚ်ပၞာန် ဒပ်ကဝ်မယှေန်ပၞာန်ဗမာ ထပက်ကၠုၚ်ဒၞာဲဗွိုၚ်သၞေဟ်ၜၚ် ဍာ်ဟယိုတ်ဂှ် အကြာဒပ်ပၠန်ဂတးတံၜါ်လပါ် ဒှ်ပေါဲဗတိုက်တုဲ ဒပ်ပၞာန်ဗမာတံ စံၚ်ပလီုထောံသ္ၚိပန်မ ပ္ဍဲကဵုကွာန် ဧကနိရဂှ် ဂွံလဝ်ပရိုၚ်ရ။
ပရိုၚ်-သြၚ်လောန်တိုၚ်မ်
Photo – Social Media