မတ်မလီု၊ အံက်တဝ်ပါ ၃
ပ္ဍဲတွဵုရးမန် သွက်ပေါဲရုဲမာဲကဝ်မယှေန်ပၞာန်အာဏံ ဂွံကဵုမာဲမာန် ညးဍုၚ်ကွာန်တံသွက်ဂွံကၠုၚ်ရံၚ်စရၚ်မာဲဂှ် ကဝ်မယှေန်ပၞာန် ဗက်ဆဝ်ဗ္ၚုဟ်မံၚ်ညးဒေသတံရောၚ် ဟီုကဵုဌာန်ပရိုၚ်သြၚ်လောန်တိုၚ်ရ။
သွက်ဂွံစကၠောန်အာပေါဲရုဲမာဲ ပ္ဍဲဂိတုဒဳဇြမ်ပါ ၂၈ ဏံဂှ် စရၚ်မာဲနကဵုအလန်ပထမ စနူသိပ်တမ်ပါ ၃၀ ဒဵုကဵု အံက်တဝ်ပါ ၁၃ တေံ ဗာန်စွံလဝ်စရၚ်မာဲရောၚ် နူကဵုကဝ်မယှေန်ပေါဲရုဲမာဲကၟိန်ဍုၚ် လလောၚ်တြးလဝ်ရ။
နူကဵုကဝ်မယှေန်ပၞာန် တ္ၚဲဗာန်စွံလဝ်စရၚ်မာဲတံဂှ် လလောၚ်တြးလဝ်ကီုလေဝ် ဟိုတ်နူညးဍုၚ်ကွာန်တံ စိုတ်ဟွံလုပ်စတုဲ ညးကၠုၚ်ရံၚ်ဗဵု စဵုကဵုကြပ်ဟွံမွဲမံၚ်ရောၚ် ဂွံတီကေတ်ရ။
သွက်ဂွံကၠုၚ်ရံၚ်ဗဵုစရၚ်မာဲတံဂှ် ရဲကဝ်မယှေန်ပၞာန် ဗက်ဆဝ်ဗ္ၚုဟ်မံၚ်ကဵုစက်သၠဲရမျှာၚ်ကီု၊ နူကဵုညးဇၞော်အရာပ် က္ဍိပ်သ္ရိကၠံတံမွဲအဆံၚ် ဗက်ဆဝ်ဗ္ၚုဟ်မံၚ်ဂှ်ကီု မွဲသ္ၚိအောန်အိုတ်မၞိဟ်မွဲ ညံၚ်ဂွံအာရံၚ်ဟီုဂးမံၚ်နွံရဂှ် သၟတ်ဒေသမွဲတၠ ဟီုကဵုဌာန်ပရိုၚ်သြၚ်လောန်တိုၚ်ရ။
“ပြဟ်ဟ်ဏံ ဗက်ဆဝ်ဗ္ၚုဟ်မံၚ်နွံ ဗီုဏံရ။ လပါ်အရာပ်ဏံ ကွာန်ဏံ နကဵုစက်သၠဲရမျှာၚ်တံ ဗက်ဆဝ်ဗ္ၚုဟ်မံၚ် ညံၚ်ဂွံကၠုၚ်ကျောဝ်ရံၚ်ဗဵု စရၚ်မာဲ။ အရာပ်လ္ၚဵုပၠန် နူကဵုညးဇၞော်အရာပ် ချိၚ်ဂံၚ်တံ မွဲအဆံၚ် ဗက်ဆဝ်ဗ္ၚုဟ်မံၚ်ကီု နွံရ။ ညးပါမံၚ်ပ္ဍဲစရၚ်တံ ကၠုၚ်ဗဵုရံၚ်ညိ။ ပ္ဍဲကဵုရုၚ်ဍေံတံလေဝ် အာဗဵုအိုတ်ညိ မုတံနွံမံၚ်။ မွဲသ္ၚိမၞိဟ်မွဲ ဒးအာဗဵု” သာ်ဝွံ သ္ဂးရ။
တုဲပၠန် သွက်ဂွံအာရံၚ်စရၚ်မာဲဂှ် ညးသၟဝ်တဲကဝ်မယှေန်ပၞာန်လ္ၚဵုတံ ကဵုမံၚ်ဇြဟတ်ဟရိုဟ်နွံမံၚ်တုဲ ညးဒေသလ္ၚဵုတံဂှ်ဗီုကၠာတေံ ဟွံရံၚ်ချိုတ်တ်ပၠိုတ်တ်ကီု ဆၜိုတ်အာရံၚ်လဝ်ကီုလေဝ် ပရေၚ်စိုတ်လုပ်စဟၟဲပုဟ်ဂှ် ညးဆက်ဟီုရ။
ၜိုန်ရကဝ်မယှေန်ပၞာန် ဗက်ဆဝ်ဗ္ၚုဟ်မံၚ် ကၠုၚ်ရံၚ်စရၚ်မာဲဟီုကီုလေဝ် စရၚ်ညးစိုပ်မံၚ်ဍုၚ်သ္အာၚ်ကီု စရၚ်မၞိဟ်ချိုတ်တ်ပၠိုတ်တ်လေဝ် လလောၚ်ပတိတ်လဝ်ဟၟဲတုဲ ပေါဲရုဲမာဲဏံ ညးဂှ်မာန်မာန် ဍေံတံရအုပ်ဓုပ် ဟိုတ်နူဒှ်မံၚ်သာ်ဏံရ ဟွံဒှ်အာဗဵုလဝ်ဏီ ညးဒေသမွဲတၠ ဟီုရ။
“စရၚ်မာဲဍေံတံဂှ် ပြဟ်ဟ်ဏံ လၟိဟ်မၞိဟ်စိုပ်မံၚ်သ္အာၚ်တံ၊ မၞိဟ်ချိုတ်လဝ်ဂျိုၚ်လဝ် နွံမူစိ စရၚ်မၞိဟ်ချိုတ်တ်ပၠိုတ်တ်လေဝ် လ္တူလလောၚ်ပတိတ်လဝ်ဟၟဲဂှ် ပေါဲရုဲမာဲဍေံတံပၠန် ၜိုတ်လဵုကၠးအးမာန်ရော၊ ပရေၚ်လီဠာန်ဟၟဲမွဲသာ် ဗီုလဵုဍေံတံပြိုၚ်အာရော ပိုဲတံ ညိလေဝ်စိုတ်ဟွံလုပ်စပုဟ်။ ပေါဲရုဲမာဲဏံ ဗော်လဵုညးလဵုမာန်န် ဍေံရအုပ်ဓုပ်ပၠန် ပိုဲတော်လဝ်” သာ်ဝွံ သ္ဂးရ။
နူကဵုကဝ်မယှေန်ပေါဲရုဲမာဲဂှ် နဒဒှ်အလန်ပထမဏံ ပွိုၚ် ၁၄ တ္ၚဲ ဗာန်စွံလဝ် ပ္ဍဲအရာပ်၊ ကွာန်တံကဵု ဒၞာဲရုၚ်ကဝ်မယှေန်ပါ်ဂကောံကွာန်တံတုဲ ဒၟာနူဟိုတ်နာနာသာ်တုဲ ယဝ်ရဗာန်စွံလဝ်စရၚ်မာဲဟွံမာန်မ္ဂး စရၚ်မာဲတံဂှ် အာရံၚ်ကေတ်ဒၞာဲကဵုရုၚ်ပါ် ပွိုၚ်ဍုၚ်တံမာန်ရောၚ် လလောၚ်တြးလဝ်ရ။
တုဲပၠန် အာရံၚ်စရၚ်မာဲတုဲ ယဝ်ရယၟုဇကုဟွံပါမ္ဂး နကဵုတၞးလိက်ဗီုပြၚ် (၃) သွက်ဂွံစုတ်ကဵုစရၚ်အာတ်မိက်မာန်၊ မၞိဟ်ပါလုပ်ဟွံထေက်တံ ယဝ်ရပါလုပ်မံၚ်မ္ဂး နကဵုတၞးလိက်ဗီုပြၚ် (၄) သ္ပအာစောဒကမာန်၊ တၚ်နၚ်စရၚ်မာဲ ဗၠေတ်ဗၠေၚ်မှာရာမံၚ်ဆဵုညာတ်မ္ဂး နကဵုတၞးလိက် ဗီုပြၚ် (၄-ဂ) ကလေၚ်ပလေဝ်တၚ်နၚ်မာန် သ္ဂးလဝ်ရ။
အတိုၚ်လၟုဟ်ဏံစပ်ကဵုစရၚ်မာဲ ကလေၚ်ဗပေၚ်၊ နုက်ပတိတ်၊ ပလေဝ်စုတ်တၚ်နၚ်တံတုဲဒှ်အာမ္ဂး နကဵုအလန်လက်ကြဴအိုတ်ပၠန် စရၚ်ညးကဵုမာဲသွက်ပေါဲရုဲမာဲဂှ် ပ္ဍဲကဵုဂိတုနဝ်ဝမ်ပါတေံ ထပ်ကလေၚ် ဗာန်စွံကဵုမွဲဝါပၠန်တုဲ အတိုၚ်နွံပၟိက်မိက်ဂွံထပေၚ်စုတ်၊ ပလေဝ်ပလေတ်၊ ပတိုန်ဂလာန်စောဒကတံ ကလေၚ်ကၠောန်မာန်မွဲဝါပၠန်ရောၚ် ကဝ်မယှေန်ပေါဲရုဲမာဲ လလောၚ်တြးလဝ်ရ။
ပရိုၚ်-သြၚ်လောန်တိုၚ်မ်
Photo – MOI