အပ္ဍဲပွိုၚ်မွဲဂိတု ဒပ်ကဝ်မယှေန်ပၞာန် ၆၈ တၠဖျေံလွဟ်ဂှ် ဗိုလ်ဇၞော် မွဲတၠ ပါလုပ်

မတ်မလီု၊ အံက်တဝ်ပါ ၄

အလုံဍုၚ်မွဲ အပ္ဍဲကဵုပွိုၚ်မွဲဂိတု ဒပ်ကဝ်မယှေန်ပၞာန် ၆၈ တၠ ဖျေံလွဟ်ဂှ်တှ်ေ ဗိုလ်ဇၞော်မွဲတၠပါလုပ်တုဲ လုပ်ဗ္ဒဗ္ဒာဲကၠုၚ်ဇရေၚ်ဂၠံသြိုဟ်ညးဍုၚ်ကွာန်တံရ အလဵုအသဳညဳသၟဟ်ကောန်ဂကူ NUG လလောၚ်တြးရ။

စနူကဵုဂိတုသိပ်တမ်ပါ ၁ ဒဵုစိုပ် ၃၀ တေံ ကောန်ဒပ်ကဝ်မယှေန်ပၞာန် နူအလုံဍုၚ်မွဲဂှ် ချိက်ကၠုၚ်ကဵု ဌာနဝန်ဇၞော်ပရေၚ်စဵုဒၞာ အလဵုအသဳညဳသၟဟ်ဂကူ NUG တုဲ လုပ်ဗ္ဒဗ္ဒာဲကၠုၚ် ဇရေၚ်ဂၠံသြိုဟ်ညးဍုၚ်ကွာန်တံရောၚ် သ္ဂးရ။

အပ္ဍဲကဵုကောန်ဒပ်ကဝ်မယှေန်ပၞာန် လုပ်ဗ္ဒဗ္ဒာဲကၠုၚ် ဇရေၚ်ဂၠံသြိုဟ်ညးဍုၚ်ကွာန်ဂှ် ကောန်ပၞာန်တၟိဒးဒုၚ်ပကောံလဝ်ဗွဲအဓ္ဓမ ဂှ် ၅၇ တၠ၊ ဒပ်ဗၠာဲသၟိၚ်မွဲတၠ၊ ဗိုလ်ဇၞော်မွဲတၠ၊ အကြာပ်ဇၞော်မွဲတၠကဵု ကောန်ဒပ် ၈ တံပါလုပ်ကၠုၚ် NUG သ္ဂးရ။

အပ္ဍဲဏံသီုကဵုလွဟ်မကမ်ဖျေံလွဟ်ဂှ် ၁၈ တၠနွံတုဲ လွဟ် MA1 ၁၁ ဇကိုအ်၊ MA3 ၄ ဇကိုအ်၊ ဗုမ်ကၠအ် ၃ မ၊ ဗုမ်လိုန် ၂ မကဵု မကမ်နာနာ ၅၉၀ မပြၚ်ပါကၠုၚ်လဝ်ရဂှ် ချူထမံက်လဝ်ရ။

နကဵု အမိၚ်ဒပ်ကဝ်မယှေန်ပၞာန်တံကီု ညးဒးဒုၚ်သ္ပလဝ်ကောန်ပၞာန်တၟိနနဲအဓ္ဓမတံကီု ညးမိက်ဂွံဒတူလိုၚ်လပါ် ညးဍုၚ်ကွာန်ကောန်ဒပ်ကေုာံဒပ်ဗၠာဲသၟိၚ်တံဝွံ ကေတ်အဆက်ကဵု “ပြည်သူ့ရင်ခွင် တယ်လီဂရမ် @Myanmar People” တုဲ ချိက်ကဵု ဒပ် PDF ကြပ်တံကီု သီုကဵုဂကောံကောန်ဍုၚ်အရၚ်ရပ်လွဟ်တံဂှ် ညံၚ်ဂွံလုပ်ဗ္ဒဗ္ဒာဲ ဇရေၚ်ဂၠံသြိုဟ်ညးဍုၚ်ကွာန်ညိဂှ် ကဵုလဝ်သမ္တီနွံရ။

လောန်ကၠုၚ်ပွိုၚ်ထပှ်ဂိတုတေံဂှ် နူကဵုအလုံဍုၚ်မွဲ ရဲဒပ်ကဝ်မယှေန်ပၞာန်၊ ဒပ်ဗၠာဲသၟိၚ်ကေုာံ ဒပ်မၚ်ကွာန်တံကီု အပံၚ်ဖအိုတ် ၄၀၉ တၠ လုပ်ဗ္ဒဗ္ဒာဲဇရေၚ်ဂၠံသြိုဟ်ညးဍုၚ်ကွာန်တုဲ ဖျေံလဝ်လွဟ်နွံမံၚ် NUG လလောၚ်လဝ်ပရိုၚ်ရ။

ပရိုၚ်-သြၚ်လောန်တိုၚ်မ်

Photo – PDF