မတ်မလီု၊ အံက်တဝ်ပါ ၄
ပ္ဍဲတွဵုရးမန် ဗော်ပရေၚ်ဍုၚ်ကွာန်လ္ၚဵု လုပ်ပြိုၚ်ပေါဲရုဲမာဲကဝ်မယှေန်ပၞာန်ကၠောန်အာဏံဂှ် ကဵုပရၚ်တဲတုဲ ကၠောန်မံၚ်ပရေၚ်စန်ဒက်နွံမံၚ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
ဗော်ပရေၚ်ဍုၚ်ကွာန်လ္ၚဵု လုပ်ပြိုၚ်ပေါဲရုဲမာဲကဝ်မယှေန်ပၞာန်တံဝွံ ကြပ်ကၠုၚ်ကဵုပေါဲရုဲမာဲဟဍၚ် ပ္ဍဲကဵုဒၞာဲကဝ်မယှေန်ပၞာန် ထိၚ်ချုက်လဝ်တံဂှ်စွံအဓိကတုဲ ကၠောန်ကၠုၚ်ပရေၚ်စန်ဒက်ရ။
ကာလစန်ဒက်မ္ဂး ပ္ဍဲပေါဲရုဲမာဲဂှ် တဆိပ်ဗော်ညးတံရ ညံၚ်ဂွံစုတ်ကဵုမာဲညိ ယဝ်ရဗော်ညးတံဇၞးမာဲမ္ဂး ပရေၚ်ဒေသညံၚ်ဂွံဖောအ်ဗြဳဂှ် ရေၚ်တၠုၚ်ကၠောန်အာကဵုရောၚ် ဟီုဂးတုဲစန်ဒက်မံၚ်ရဂှ် ဂွံတီရ။
ဗော်ပရေၚ်ဍုၚ်ကွာန်လ္ၚဵုတံပၠန်ဂှ်လေဝ် စှ်ေအကြာအရာပ်တုဲ ပ္ဍဲကဵုကၠောန်ပေါဲဟီုတွံတံဂှ် ကဵုပရၚ်တဲဗံၚ်ဟမိက်တုဲ ကၠောန်လဝ်ပရေၚ်စက်ဒက်ရဂှ် ညးဒေသမွဲတၠ ဟီုရ။
“အဓိက ဗော်ပျဳခိုင်ဖျိုဝ်၊ ဗော်ကိုကိုဂျဳတံကဵု ဗော် PPP တံ စှ်ေအကြာအရာပ်တုဲ ကၠောန်ပေါဲဟီုတွံတံ နွံမံၚ်။ ပ္ဍဲသ္ၚိ ဆေၚ်စပ်ကဵုရဲဗော်ညးတံဂှ် ပကောံမၞိဟ်တုဲ ကၠောန်ပေါဲဟီုတွံ သွက်ညးတိုန်စိုပ်ကၠုၚ်လဝ်တံ ကဵုဏာပရၚ်တဲ ဗံၚ်ဟမိက်တံ မုတံနွံမံၚ်။ ဗော်ဍေံတံ ချဳဒရာၚ်မံၚ်။ ဗော်တၞဟ်ဟ် မုလေဝ်ဟွံချဳဏီ” သာ်ဝွံ သ္ဂးရ။
ဗီုဗီုဏံ ဗော်ပရေၚ်ဍုၚ်ကွာန်လ္ၚဵု ကၠောန်ပေါဲစန်ဒက်ဂှ်တှ်ေ ကောန်ဗော်ညးတံကဵု ရဲဒးဒုၚ်စန်ဒက်လဝ်တံဂှ်ရ အဓိကတိုန်စိုပ်မံၚ်အိုတ်တုဲ အကြာပရေၚ်စသုၚ်ဝါတ်ဂါတ်မံၚ်ဏံ ညးဍုၚ်ကွာန်ဗွဲမဂၠိုၚ်တံဂှ် စွံလေဝ်ဟွံလုပ်စတုဲ တိုန်စိုပ်ကၠုၚ်လဝ်ဟၟဲကွေံကွေံရ ညးဆက်ဟီုရ။
မွဲလပါ်ပၠန် ဗော်ပရေၚ်ဍုၚ်ကွာန် လုပ်ပြိုၚ်ပေါဲရုဲမာဲ ကဝ်မယှေန်ပၞာန်တံဝွံ ပြဟ်ဟ်ဏံ ကၠောန်မံၚ်ပရေၚ်စန်ဒက်ကီု သီုပတိုန်လဝ်စရၚ်အလံၚ်အမာတ်ညးစၞးတံတုဲ ခြာဟွံလံ ညံၚ်ဂွံကၠောန်အာ ပေါဲတံၚ်ဂြဲမာဲ သွက်အလံၚ်ညးစၞးတံဂှ် ဖန်ဖက်ပလေဝ်ပလေတ်စမံၚ်အိုတ်ရ။
နူကဵုကဝ်မယှေန်ပေါဲရုဲမာဲကၟိန်ဍုၚ် ကဝ်မယှေန်ပၞာန်ဂှ်တှ်ေ အလုံတွဵုရးမန် သီုကဵု ၁၀ ပွိုၚ်ဍုၚ်ဂှ် ခုတ်စၟတ်လဝ် နဒဒှ် ဒၞာဲဆန္ဒမာဲဖအိုတ်တုဲ စိုပ်ဂိတုဒဳဇြမ်ပါ ၂၈ အပ္ဍဲကဵုကၠောန်အာပေါဲရုဲမာဲ သ္ကုတ် ၁ ဂှ်မ္ဂး ပ္ဍဲကဵုပွိုၚ်ဍုၚ် ကျာ်ထဝ်၊ သဓီု၊ မတ်မလီု၊ ၜါသွာၚ်ကဵု ကျာ်မြဟ်တံဟေၚ်ကၠောန်အာကၠာရောၚ် လလောၚ်တြးလဝ်ရ။
ဗော်ပရေၚ်ဍုၚ်ကွာန် သွက်ဂွံလုပ်ပြိုၚ်ပေါဲရုဲမာဲကဝ်မယှေန်ပၞာန် ပ္ဍဲကဵုတွဵုရးမန်မ္ဂး ဗော်ပျဳခိုၚ်ဖျိုဝ်၊ ဗော် “ပြည်သူ့ရှေ့ဆောင် ပါတီ”၊ ဗော် “ပြည်သူ့ ပါတီ”၊ ဗော်ကၠဗု ကော် “ရှမ်းနှင့် တိုင်းရင်းသားများ ဒီမိုကရက်တစ် ပါတီ၊ ဗော်တစည၊ ဗော် “မြန်မာနိုင်ငံ တောင်သူလယ်သမား ဖွံ့ဖြိုး တိုးတက်ရေးပါတီ၊ ဗော်ညဳသၟဟ်မန်ကဵု ဗော်ကောန်ဂကူပအိုဝ် ဖောအ်ဗြဳတဴတက်တံ ပါလုပ်ပြိုၚ်အာရောၚ် ဂွံတီရ။
ပရိုၚ်-သြၚ်လောန်တိုၚ်မ်
Photo – PPP Party