ဘာပန်၊ အံက်တဝ်ပါ ၆
ဒပ်ကဝ်မယှေန်ပၞာန်ဗမာသီအဝဵုဂှ် ပံၚ်တောဲကဵုဒပ်မၚ်ပယျဵုကရေၚ် BGF, ဒပ်ဗိုလ်ဗိ DKBA ပါ်တိတ်တံတုဲ ထပက်ကရောၚ်ပၞာန်ဗတိုက်မံၚ် ပ္ဍဲကဵုသ္ကုတ်ဂၠံၚ် ကမမံၚ်-ကတိုၚ်တိရဂှ် ညးအခေါၚ်ဟီုဂးနွံ KNU မဟာဒပ် ၅ သ္ကိုပ်ဗိုလ်ဇၞော်သဝ်ကလေဝ်ဒို ဟီုကဵုဌာန်ပရိုၚ်သြၚ်လောန်တိုၚ်မ်ရ။
သွက်ဂွံကလေၚ်သီကေတ် ဒၞာဲဗဒိုပ်ဒးဒုၚ်သီလဝ် ပ္ဍဲကဵုခရိုၚ်ဘာပန်တွဵုရးကရေၚ်ကီု သွက်ဂွံပလံၚ်ဗစိုပ်ပၞာန်ရီုဗၚ် ဗျူဟာဘာပန်မာန်ကီု ဒပ်ကဝ်မယှေန်ပၞာန်ထပက်မံၚ်ကရောၚ်ပၞာန်တုဲ ဒပ်မၚ်ပယျဵုကရေၚ် BGF ကဵု ဒပ်ဗိုလ်ဗိ DKBA ပါ်တိတ်တံပံၚ်တောဲပါလုပ် ဗတိုက်ကဵုမံၚ်ရ။
လောန်ကၠုၚ် နူဂိတုသိပ်တမ်ပါတေံရ ဒပ်ကဝ်မယှေန်ပၞာန်၊ BGF ကဵု ဒပ်ဗိုလ်ဗိ DKBA ပါ်တိတ်ပံၚ်တောဲလဝ်တံ ထပက်ကၠုၚ်ကရောၚ်ပၞာန် သ္ကုတ်ဂၠံၚ် ကမမံၚ်-ကတိုၚ်တိဂှ်တှ်ေ နူကဵုဒပ်ပၞာန်ဗၠးၜးကောန်ဂကူကရေၚ် KNLA မဟာဒပ် ၅ တတ်ထပါ်ဗတိုက်လဝ်ဂှ်ရ ပေါဲဗတိုက်ဒှ်အာတုဲ ဒပ်ပံၚ်တောဲကဝ်မယှေန်ပၞာန်တံ ဒးကလေၚ်ဆုတ်အာကီုရ။
ဒပ်ပံၚ်တောဲကဝ်မယှေန်ပၞာန်တံဂှ် ပြဟ်ဟ်ဏံ ဖျေံလဝ်ဒပ်ကရပ်လ္တူဍုၚ်ကမမံၚ် ပ္ဍဲကွာန်ဝါဒူရဂှ် ညးအခေါၚ်ဟီုဂးနွံKNU မဟာဒပ် ၅ သ္ကိုပ်ဗိုလ်ဇၞော်သဝ်ကလေဝ်ဒို သ္ဂးရ။
ပ္ဍဲတ္ၚဲအကြာတံဏံ ပ္ဍဲခရိုၚ်ဘာပန်ဒၞာဲတိဍာ်မဟာဒပ် ၅ ဂှ် ပေါဲဗတိုက်ဇၞော်ဇၞော်အပ္ဍဲကဵုအကြာၜါလပါ် ဟွံဒှ်ဏီကီုလေဝ် နူကဵုဗဒိုပ်ဒပ်ကဝ်မယှေန်ပၞာန် ပန်ကၠဟ်မံၚ်ကဵုလွဟ်ဇၞော် ဒၞာဲမ္ၚးမ္ၚးတံနွံရ။
ဒၞာဲကတိုၚ်တိ KNU မဟာဒပ် ၅ သီကေတ်လဝ်ဂှ် နူကဵုဂိတုဂျောန်လောန်ကၠုၚ်တေံ ဒပ်ကဝ်မယှေန်ပၞာန် ကလေၚ်သီကေတ်မာန်ကီုလေဝ် သ္ကုတ်ဂၠံၚ်ကမမံၚ်-ကတိုၚ်တိဂှ် ဍိုက်က်ပေၚ်ၚ်ထိၚ်ချုက် ဟွံမာန်ဏီတုဲ ထပ်ကလေၚ်ထပၚ်ကၠုၚ်ဇြဟတ် ထပက်ကၠုၚ်ကရောၚ်ပၞာန်မဒှ်ရ။
ဒပ်မၚ်ပယျဵုကရေၚ် BGF ကဵု ဗိုလ်ဗိ DKBA ပါ်တိတ်တံဝွံ ပြဟ်ဟ်ဏံ ပ္ဍဲကဵုပေါဲဗတိုက် လေဝ်ကေကဝ်ကီု ပေါဲဗတိုက်သ္ကုတ်ဂၠံၚ် အာယှ၊ ကြုၚ်ဒဵု-ကအ်ကြိက်တံဂှ် ဘိုၚ်ရီုဗၚ်ဗတိုက်မံၚ်ကဵုလပါ်ကဝ်မယှေန်ပၞာန်တံတုဲ သီုၜါဂကောံဏံဂှ် ထံက်မံၚ်ဂလာန်ကဵုပေါဲရုဲမာဲကဝ်မယှေန်ပၞာန် မဒှ်ကီုရ။
ပရိုၚ်-သြၚ်လောန်တိုင်မ်
Photo – Social Media