မတ်မလီု၊ အံက်တဝ်ပါ ၆
ပ္ဍဲတွဵုရးမန် အခိၚ်ကြပ်ကၠုၚ်မံၚ်ကဵုပေါဲရုဲမာဲကီုလေဝ် ဒပ်ကဝ်မယှေန်ပၞာန်သီအဝဵုဝွံ ဗီုဟွံတော်ခယျလဝ်နနဲအဓ္ဓမ ရပ်ကေတ်မံၚ်သၟတ်တံတုဲ ပကောံကေတ်ကောန်ပၞာန်တၟိ ပဵုဂၠိုၚ်တိုန်မံၚ်ရောၚ် ညးဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
ဒပ်ကဝ်မယှေန်ပၞာန်ဝွံ သၟတ်မွဲတၠဓဝ် အခိၚ်အာကမၠောန် စဴကၠုၚ်နူကမၠောန်ဂှ်ကီု၊ သၟတ်မွဲဓဝ် အခိၚ်ဗ္တံဒးဗက်ဂၠာဲစမံၚ် ပရေၚ်ဗုၚ်ဂၞဴတံဂှ်စွံပဝန်တုဲဂၠာဲရပ်ကေတ်မံၚ်ရ။
သၟတ်ဒးဒုၚ်စွံလဝ်ပဝန်တံမ္ဂး အခိၚ်ဗၠေတ်နူကဵုမတ်မၞိဟ်တံဂှ် ရပ်ကော်ဏာသ္ၚိတ်တ်ကီု သွက်စၟဳစၟတ်သၟာန်သၟုက်စနွံမံၚ်ဂးတုဲ ရပ်ကော်ဏာဒၞာဲဌာန်ဒပ်ပၞာန်တံဟွံက ထ္ၜးဟိုတ်နာနာသာ်တုဲ ရပ်ကေတ်မံၚ်ဆက်က်နွံရ။
ဒပ်ကဝ်မယှေန်ပၞာန် စွံပဝန်ကဵု သၟတ်ဒးဗက်ဂၠာဲစမံၚ်ပရေၚ်ဗုၚ်ဂၞဴမွဲဓဝ်ဟေၚ် ဂၠာဲရပ်ကေတ်မံၚ်သၟးဟွံက ဆဵုညာတ် လ္တူဂၠံၚ်တှ်ေလေဝ် ဗက်ကော်ရပ်ကေတ်မံၚ်နွံရဂှ် ညးဒေသပွိုၚ်ဍုၚ်မုဟ်ဍုၚ်မွဲတၠ ဟီုရ။
“ပရေၚ်ရပ်စပ်ဟီုတှ်ေ မွဲတ္ၚဲတေံ ရပ်ကော်ဏာ ကောန်ၚာ်ဂၠာဲကမွဲ။ ကိုပ်ကၠာ ခယျဗၠိုက်ဍာ်ဂးတုဲ ဗက်ဂၠာဲမံၚ် ၜိုတ် ၃ တ္ၚဲကီု။ ရံၚ်စပတိုန်ပေါဲ ဗီုတေံဗီုဏံကီု။ ၜါပိတ္ၚဲပၠန်မှ ဒပ်ပၞာန်ကော်ရပ်ဏာ ကဵုနၚ်ပရိုၚ်ရ၊ ရပ်ဏာသွက်ဂွံယိုက်ဂၠေၚ်ဝန်ပၞာန်” သာ်ဝွံ သ္ဂးရ။
နူဒပ်ကဝ်မယှေန်ပၞာန်တံဂှ် တိုက်ရိုက်ရပ်ကေတ်မံၚ်သၟတ်ဗွဲမဂၠိုၚ် တံတုဲ ဒပ်ဗၠာဲသၟိၚ်တံလေဝ်ဟွံဂွံတီလဝ်ကီု ရဲဒးပၠုပ်ဏာစရၚ်ကောန်ပၞာန်တၟိတံဂှ် ဟွံကဵုအခေါၚ်ဆဵုဂဗကဵုမိမကောဒေံတံပုဟ် ညးဆက်ဟီုရ။
အခိၚ်ကာလပၞာန်အပ္ဍဲဍုၚ်ဒှ်မံၚ်ဏံ လ္တူပရေၚ်ယိုက်ဂၠေၚ်ဝန်ပၞာန်ဂှ် ညးလဵုမှစိုတ်ဟွံလုပ်စတုဲ ဟိုတ်နူစွံပဝန် ဍံက်ရပ်ကေတ်မံၚ် သၟတ်တံဂှ်ပရေၚ်ဒှ်ဒွိၚ်ပဵုသၠုၚ်တိုန်မံၚ်ရောၚ် သၟတ်ပွိုၚ်ဍုၚ်ရေဝ်မွဲတၠ ဟီုရ။
“ဗီုအခိၚ်လၟုဟ် ဒှ်မံၚ်ပၞာန်အပ္ဍဲဍုၚ်ဏံ ကိစ္စပရေၚ်ယိုက်ဂၠေၚ်ဝန်ပၞာန်ဂှ် ညးလဵုမှစိုတ်ဟွံလုပ်စပုဟ်။ ကၠောန်လေဝ်ဟွံမိက်ကၠောန်ပုဟ်။ ကိစ္စဏံ ဒှ်မံၚ် ပြဿနာဇၞော်ကွေံကွေံရ။ ဗီုကၠာကၠာတေံ ဟွံဂီုကၠီုရပုဟ်။ ဟွံဂံၚ်အာတရဴအိုတ်ပုဟ်။ အာလ္ၚောဝ်ကျာ်လေဝ် ဟွံဂံၚ်တိတ်တရဴပုဟ်၊ ဗီုဍုၚ်လ္ဂုၚ် ဍုၚ်ဇကုဟွံသေၚ် အာကၠောန်ကမၠောန်ဟီုတှ်ေလေဝ် ဟွံဂံၚ်အာပုဟ်။ ပရေၚ်ဒှ်ဒွိၚ်ဇၞော်ကွေံကွေံ စိုတ်ဒးထုဲဗွဲမလောန်” သာ်ဝွံ သ္ဂးရ။
အကြာဒေသ ဒၞာဲမံၚ်ကြပ်ကဵုဒပ်ကဝ်မယှေန်ပၞာန်တံတှ်ေ သၟတ်တံဟွံဂံၚ်တိတ်မ္ၚးလံလံတုဲ အခေါၚ်ဗၠးၜးဟောံဗြောံအာလဝ်ဂှ်ကီု သၟတ်ဗွဲမဂၠိုၚ်ပၠန် နဲကဲနာနာဂစာန်တိတ်အာဍုၚ်မ္ၚး ပဵုတုဲဂၠိုၚ်တိုန်မံၚ်ရောၚ် ညးဆက်ဟီုရ။
မွဲလပါ်ပၠန် ဂကောံပရေၚ်အုပ်ဓုပ်အရာပ်/ကွာန်တံဂှ် သွက်ဂွံယိုက်ဂၠေၚ်ဝန်ပၞာန် ဗီုအခိၚ်ကၠာတေံဂှ်ရာန်ထပက် မၞိဟ်အဇာလေဝ်ဟွံဂွံဂှ်ရ ဒးဆဵုမံၚ်ကဵုပြဿနာဂၠာဲမၞိဟ်ဟွံဂွံတုဲ ထ္ၜးဟိုတ်နာနာကော်ရပ်မံၚ်သၟတ်တံကီု နကဵုလိက်ရုၚ်ကော်ဟွံသၟး ဟွံက သီုကဵုကံက်မာဲလေဝ် ဒးကၠောန်ဗက်မံၚ်အိုတ်ရ။
အတိုၚ်တင်နၚ်သြၚ်လောန်တိုၚ်မ် ပကောံဂွံလဝ်တၚ်နၚ်တံမ္ဂး ပ္ဍဲကဵုတွဵုရးမန် တန်ဗတောန်ယိုက်ဂၠေၚ်ဝန်ပၞာန် နူလၟေၚ် ၁ ဒဵုကဵု လၟေၚ် ၁၇ဏံ သၟတ်နူဒေသကရပ် ၃၀၀၀ တံ ဒပ်ကဝ်မယှေန်ပၞာန် ပကောံဂွံလဝ်ကောန်ပၞာန်တၟိရ။
ပရိုၚ်-သြၚ်လောန်တိုင်မ်
Photo – MOI