နေပျဳတဝ်၊ အံက်တဝ်ပါ ၆
ပေါဲရုဲမာဲကဝ်မယှေန်ပၞာန်ညံၚ်ဂွံလီု နနဲဗီုပြၚ်နာနာပရေၚ်ပလီုပထုဲဂးတုဲ အလုံဍုၚ်မွဲပရေၚ်ကေတ်လဝ်အရေဝ် ၂၄ အမှုကဵု မၞိဟ် ၆၄ တၠ ဒးဒုၚ်စောဲဒုဟ်ရပ်လဝ်နွံရဂှ် ပ္ဍဲကဵုလိက်ပရိုၚ်တြးဝါဒနိဂီုဍုၚ် ဒပ်ပၞာန်ထိၚ်လဝ်တံချူလဝ်ရ။
ပ္ဍဲကဵုအံက်တဝ်ပါ ၃ ကောံဓရီုကမ္မတဳဗဟဵု ဆေၚ်စပ်ကဵုကောပ်ကာဲ ပရေၚ်ဂီုကၠီုကာလပေါဲရုဲမာဲဗော်ဇဳ ပ္ဍဲကဵုနေပျဳတဝ်ဂှ် ဝန်ဇၞော်ကေၚ်ကာအပ္ဍဲဍုၚ်သ္ကိုပ်ပၞာန်ဇၞော်ထောန်န်နံၚ် ဟီုလဝ်ရ။
ပ္ဍဲကၞောတ်ဂိတုဂျူလိုၚ် အတိုၚ်ချူခၞံကၠုၚ်လဝ် ဥပဒေပွမစဵုဒၞာနူကဵုပရေၚ်ပလီုပထုဲပေါဲရုဲမာဲဗော်ဇဳဂှ် ဒဵုကဵုဂိတုသိပ်တမ်ပါ ၃၀ ကေတ်လဝ်အရေဝ်နွံကၠုၚ် ၂၄ အမှု မဒှ်ရ။
ပရေၚ်ကေတ်လဝ်အရေဝ်ဗီုတံဏံဂှ် ညံၚ်ကဵုကၟာတ်ထောံ သ္ဇိုၚ်အခေါၚ်အရာမၞိဟ် ဟီုဂးဗွဲမသၠးပွးရောၚ် ဒါရိုက်တာ ဂကောံအခေါၚ်အရာမၞိဟ်ကရေၚ်ဍာဲ ဥူဗညာ ဟီုရ။
“ပရေၚ်ဏံဂှ် သွက်မၞိဟ်မွဲမွဲ အခေါၚ်သ္ဇိုၚ်ပရေၚ်ဍုၚ်ကွာန် ဟီုဂးဗွဲမသၠးပွးတံဂှ် နကဵုပရေၚ်ဍုၚ်ကွာန်ဒှ်ဒှ် ပရေၚ်ဘာသာဒှ်ဒှ် ကၟာတ်ထောံ တၚ်ညးတံခယျလဝ်တံဂှ်ရ။ ဗွဲတၟေၚ် ဒှ်အာပရေၚ်ဖံက်ပကဝ် ကၟာတ်ထောံ အရာပါလုပ် ပရေၚ်ဍုၚ်ကွာန်ညးတေံရ။ တုဲပၠန် ဂလာန်ပတေဟ်ပရေၚ်ဍုၚ်ကွာန်ညးတေံကီု ပရေၚ်တြးပတိတ်ပရိုၚ်တံ သ္ဇိုၚ်အခေါၚ်အရာမၞိဟ်တံဂှ် ကောံတုဲ ညံၚ်ဂွံဒစဵုဒစးအာ၊ ဟၟဲကဵုဗဗွဲဓရ်တံဂှ် ညံၚ်ဂွံဂံၚ်ဟီုမာန် ယုတ်ဒေက်အာကဵု သ္ဇိုၚ်အခေါၚ်အရာမၞိဟ်တံရ” သာ်ဝွံ သ္ဂးရ။
တၚ်နၚ်အမှုတံဏံ ဗွဲတြးဟီုဂးလဝ်ပ္ဍဲကောံဓရီုဟၟဲကီုလေဝ် ပ္ဍဲဂိတုသိပ်တမ်ပါဂှ် ပေါဲရုဲမာဲညံၚ်ဂွံလီုလာ် ဟီုဂးဟဝ်တွံ ဆဝ်ဗ္ၚုဟ် ပလာတ်ပထုဲမံၚ်ဂးတုဲ လ္တူက္ဍိုပ်သ္ကိုပ် KNU ကီု ကံၚ်သဳဍုၚ်ချေၚ်ကဵု ဂကောံ AA တံ ၂၈ တၠဂှ် ပံက်လဝ်အမှုရ။
ပရေၚ်ဂီုကၠီုပေါဲရုဲမာဲညံၚ်ဂွံလီုလာ် ညးတြးမံၚ်ဝါဒဆဝ်ဗ္ၚုဟ်မံၚ်တံဂှ် ညံၚ်ဂွံဂၠိုက်ဂၠာဲထမံက်ပတိုန်အာ ဝန်ဇၞော်ကေၚ်ကာအပ္ဍဲဍုၚ် သ္ကိုပ်ပၞာန်ဇၞော်ထောန်န်နံၚ် ဟီုရ။
ညးဒးဒုၚ်ကေတ်အရေဝ် နကဵုဥပဒေပွမစဵုဒၞာပေါဲရုဲမာဲတံဂှ် နကဵုၝောံပိုဒ် ၂၃(က) ယြဴပူဂဵုလဵုဟွံဟီု ဖံက်ပကဝ်လဝ် ပရေၚ်တာဒၞာလဝ်တံမ္ဂး အောန်အိုတ်ဒဏ်ထံၚ်နူကဵုပိသၞာံ ဒဵုကဵု ထပှ်သၞာံ ဒးဖျေံအာသၟးဟွံက ဒဏ်သြန်လေဝ်ဖျေံမာန်ရောၚ် ခၞံလဝ် ပ္ဍဲသၞောဝ်ဂှ်ရ။
အပ္ဍဲကဵု ၝောံပိုဒ် ၁၆ ဥပဒေဏံမ္ဂး လၟေၚ်ကမၠောန်ဆေၚ်စပ်ကဵုပေါဲရုဲမာဲကီုဒှ် သာ်ဝွံဟွံသေၚ် လၟေၚ်ကမၠောန် မွဲသ္ကုတ်မွဲသ္ကူကီုဒှ် သွက်ဂွံလီုလာ် ပွမဟဝ်၊ ဟီုဂး၊ စန်ဒက်၊ ဆဝ်ဗ္ၚုဟ်၊ ထ္ၜးဆန္ဒ သာ်ဝွံဟွံသေၚ် ချူလိက်တြးပတိတ်တံ နဲလဵုမှကၠောန်သ္ပဟွံဂွံရောၚ် စဵုဒၞာလဝ်ရ။
နကဵုကဝ်မယှန်ပၞာန် ပေါဲရုဲမာဲကၠောန်အာဏံ ရန်တၟံညံၚ်ဂွံလီုလာ်ပရေၚ်စဵုဒၞာလဝ်တံဏံဂှ် ထ္ၜးဟိုတ်တုဲ ဂၠိုက်ဂၠာဲထမံက်ပတိတ် ညးဖံက်ပကဝ်လဝ်တံတုဲ ပရေၚ်ကေတ်အရေဝ်ရပ်စပ်တံမွဲဒမြိပ် ကၠောန်ကၠုၚ်မံၚ်ရ။
နကဵုကိစ္စပရေၚ်စုတ်မာဲ လ္တူ Facebook သိုဲယှေဝ်မဳဒဳယာ ညးတြုံပါ်ပါဲချူလဝ်မွဲတၠဂှ် နဒဒှ်အလန်ပထမကိုပ်ကၠာအိုတ် အတိုၚ်ဥပဒေပွမစဵုဒၞာပေါဲရုဲမာဲ နကဵုၝောံပိုဒ် ၂၃(က) ဖျေံလဝ်ဒဏ်ထံၚ် ၇ သၞာံ ပေၚ်ၚ်ကေုာံသီုကဵုကမၠောန်ကီု လောန်ကၠုၚ်ဂိတုသိပ်တမ်ပါ ၉ ဂှ် ဖျေံဏာအမိၚ်နွံရ။
ဥပဒေဏံဂှ် ပ္ဍဲဗလးတိဒှ်ဒှ် လ္တူအန်လာၚ်ဒှ်ဒှ် ပရောပေါဲရုဲမာဲ ပရေအ် ဆၜိုတ်ချူဒးဟီုဂးဂှ် ဒးဒုၚ်ကေတ်အရေဝ်ဒှ်မံၚ်တုဲ ဒစဵုဒစးမံၚ်ကဵု အခေါၚ်အရာမၞိဟ် ပွမဟီုဂးဗွဲမသၠးပွးဂှ်ရောၚ် ညးချဳဒရာၚ် အခေါၚ်အရာမၞိဟ်တံ ထံက်ထ္ၜးမံၚ်ရ။
မွဲလပါ်ပၠန် ပေါဲရုဲမာဲကဝ်မယှေန်ပၞာန်သ္ကိုပ်သ္ကကၠောန်အာဏံဝွံ ဒှ်ကမၠောန်ပေါဲရုဲမာဲအလီ ညံၚ်အယုက်တၠအဝဵုပၞာန် ဂွံဂၠိၚ်အာရောၚ် လပါ်ရဲဂကောံဇြဟတ်ပၠန်ဂတးတံ ခုတ်စၟတ်လဝ်ရ။
ဟိုတ်ဂှ်တုဲ တၞးလိက်ဒစဵုဒစးပေါဲရုဲမာဲအလီဂမၠိုၚ် ကြဳဖျေံမံၚ်အကြာမၞိဟ်လ္တူဍုၚ်တံ ဒၞာဲအာကၠုၚ်လောဲသွာကီု နူလ္တူ အန်လာၚ်မဳဒဳယာတံမွဲအဆံၚ် ဒစဵိုဒစးပေါဲရုဲမာဲအလီညိဂှ် ပရေၚ်ဗတိုက်ဖအောဝ်ဆဝ်ဗ္ၚုဟ်တံ နွံမံၚ်ပၠန်ရ။
လ္တူပရေၚ်ချဳဒရာၚ်နွံကၠုၚ်မံၚ်ဗီုတံဏံဂှ် နူလပါ်ကဝ်မယှေန်ပၞာန်တံလေဝ် ဂၠိုက်ဂၠာဲထမံက်ပတိတ် ဆက်ရပ်မံၚ်ဂၠိုၚ်တိုန်တုဲ ပ္ဍဲအရာကဵုအာဇြဟတ်ဟရိုဟ် ပေါဲရုဲမာဲညံၚ်ဟွံဂွံဒှ်ဂှ် ပရေၚ်ဇီုကပါ် ဖဵုပရေအ်ပရေအ်တံနွံကၠုၚ်မံၚ်ရောၚ် ဥူဗညာ ထံက်ထ္ၜးလဝ်ရ။
“ပေါဲရုဲမာဲညံၚ်ဟွံဂွံဒှ် နူကဵုပရေၚ်ချဳဒရာၚ် ပၠန်ဂတးညးဍုၚ်ကွာန်တံ ပရေၚ်ယုတ်ဒေက်ဟၟဲဟာဟီုတှ်ေ ရံၚ်အာလောဲလောဲမ္ဂး တၚ်ယုတ်ဒေက်နွံရောၚ် ဟီုမာန်ရ။ ဥပဒေအရာဆေၚ်စပ်ကဵုပေါဲရုဲမာဲ လၟုဟ်ခၞံလဝ်တံဂှ် ကမၠောန်ဍေံတံကၠောန်ကီု ဗွဲတၟေၚ် ရဲနွံလ္တူဍုၚ် သၟတ်တံဒှ်ဒှ် အလုံးညးဍုၚ်ကွာန်ဟီုဟီု လ္တူပရေၚ်ဏံ ဟွံဂံၚ်ဟီုဂး ဗီုပြၚ်ခၜီုဍာ်မာတ်လဝ်ပါ်ဂှ် သွက်အရာချဳဒရာၚ် ပရေၚ်ကဵုဇြဟတ်ဟရိုဟ် ပေါဲရုဲမာဲညံၚ်ဟွံဂွံဒှ် ဖဵုပရအ်ဇီုကပါ်မံၚ်ဗွဲမဂၠိုၚ်နွံ” သာ်ဝွံ သ္ဂးရ။
စပ်ကဵုလၟေၚ်အလိုက်ကာလ ပေါဲရုဲမာဲပရေၚ်ဂီုဂၠီု ညံၚ်ဟွံဂွံထောၚ်ပြိုဟ်အာ၊ ပရေၚ်တိဍာ်ညံၚ်ဂွံညိၚ်ဝပ်၊ အမှုအရာ ညံၚ်ဂွံအောန်စှ်ေကေုာံ ပရေၚ်အုပ်လဒမ်သၞောဝ်ဓရ်ဥပဒေတံဂှ် နကဵုဌာနဒပ်၊ သ္ကိုပ်က္ဍိုက်ပ်ဌာန နွံသၟဝ်တဲဌာနကေၚ်ကာအပ္ဍဲဍုၚ်တံ ညံၚ်ဂွံပံၚ်တောဲအာဂှ် နူကဵုဌာနဝန်ဇၞော်ကေၚ်ကာအပ္ဍဲဍုၚ် ကဵုလဝ်စၞောန်ရ။
တုဲပၠန် ပ္ဍဲကာလပေါဲရုဲမာဲဏံ ဗော်ပရေၚ်ဍုၚ်ကွာန် လုပ်ပြိုၚ်မာဲတံကီု အလံၚ်ညးစၞးအမာတ်တံကီု နူကဵုအခိၚ်ညးတံစန်ဒက်မာဲဂှ် ဒဵုကဵုစိုပ် အခိၚ်ပေါဲရုဲမာဲတေံ ပရေၚ်ဂီုကၠီုနွံနွံ ညံၚ်ဂွံဖန်ဖက်ရေၚ်တၠုၚ်အာမာန် ကေုာံ ပ္ဍဲကဵုကာလပေါဲရုဲမာဲ သွက်ပရေၚ်ဂီုကၠီု ဂကောံလ္ၚတ် နူပ္ဍဲဍုၚ်မ္ၚးဍုၚ်တံကီု ညံၚ်ဂွံစဳရေၚ်ဖန်ဇန်လဝ် ဟီုဂးလဝ်ရ။
ပရိုၚ်-သြၚ်လောန်တိုင်မ်
Photo – MOI