အစ္စတာန်ဗူလ်၊ အံက်တဝ်ပါ ၆
ပးဒၞန်အေတ်သရေ ၜိုတ်သှ်ေမံၚ်သီုဖအိုတ် သွက်ဂွံဗလးကဵု ဂကောံဟာမာတ်သ်ဟိုတ်နူတုပ်စိုတ်ဂှ် ပရေၚ်ကြဳဗုမ်ဗတိုက်မံၚ် ပ္ဍဲၚာၚ်ၜဳဂါဇာ ညံၚ်ဂွံဒေါအ်လဝ် အမေရိကာန် ဗတိုက်ဖအောဝ်အေတ်သရေရ။
သွက်ဂွံဗလးကဵု ပးဒၞန်ၜိုတ်သှ်ေမံၚ်သီုဖအိုတ်တံ ဟာမာတ်သ်တုပ်စိုတ်ကီုလေဝ် စပ်ကဵုဂါဇာ အတိုၚ်အမေရိကာန် အာတ်မိက်ပတိုန်ထ္ၜးလဝ် တင်နင်ပရေၚ်ၜိုဟ်လလမ်ဗွဲမဂၠိုၚ်ဂှ်တုဲ သွက်ဂွံထပ်ပညဳပညပ်အာ အာတ်မိက်လဝ်ရ။
အတိုၚ်သမ္မတအမေရိကာန် ဒဝ်နေဝ်ထရ စဳဇန်လဝ်အဆံၚ်ပထမဂှ် ဗွဲမပြဟ်ညံၚ်ဂွံထမံက်အာရုပ်ရဴမာန် ဒစးဒုၚ်ပလေဝ်စမံၚ်ယျ သ္ကိုပ်ဝန်ဇၞော်အေတ်သရေ နေတာညာဟု ဟီုရ။
လၟေၚ်အစဳဇန်ပရေၚ်ၜိုဟ်လလမ်ဂှ် အံက်တဝ်ပါ ၅ စွံလက်ကရဴအိုတ်တုဲ ဟွံတုပ်စိုတ်မ္ဂး ညံၚ်စိုပ်နာရက်ဂျိုၚ်ၚ် ဒးဂွံဒုၚ်စသိုၚ်အာရောၚ် သတိကဵုဏာသတိတုဲ ဗွဲကြဴ တၚ်လလောၚ်တြးဏံ မံက်တိတ်ကၠုၚ်ရ။
နကဵုဟာမာတ်သာ် သွက်ပရေၚ်ၜိုဟ်လလမ် တန်ကြဴဍာ်ဇမၠိၚ် မၚ်လဝ်ဂွန်တုဲယျ နကဵုဇကုပတေဟ်ကေတ်လဝ်ကီု၊ နကဵုအေတ်သရေ ဗတိုက်ကြဳမံၚ်ဗုမ် ပ္ဍဲဂါဇာဂှ် ဒေါအ်ထေက်ရ ထရ ချူလဝ်ပ္ဍဲမဳဒဳယာ ပရေၚ်မၞိဟ်ညးတေံရ။
နကဵုဂကောံဟာမာတ်သ်တံ ဒးပလှ်ထောံလွဟ်သီဖအိုတ်တုဲ ပ္ဍဲဂကောံပရေၚ်အုပ်ဓုပ် အနာဂတ်ဂါဇာ အခေါၚ်ပါလုပ်ဟၟဲရောၚ် စပ်ကဵုလၟေၚ်အစဳဇန် ပရေၚ်ၜိုဟ်လလမ် ထရဂှ် ဟာမာတ်သ် အာတ်မိက်လဝ်ဟွံဆဵုဏီ။
အကြာဏံ လၟေၚ်အစဳဇန် ပရေၚ်ၜိုဟ်လလမ် ထရဂှ် အတိုၚ်ဍုၚ်မူသလေၚ်ဗွဲမဂၠိုၚ် ပတိုန်ထ္ၜးလဝ်တံပရေၚ် ကိတ်ညဳမံၚ်ဟၟဲပုဟ် ပါကေတ်သတာန် ဟီုဂးလဝ်ရ။
ပွမဒုၚ်ဏာတဲ ဂလာန်ဂကောံဟာမာတ်သ်အာတ်မိက်လဝ်ဏံဂှ် ဒှ်သွက်လဂါံဇိုၚ် ဂွံဆက်အာဂတတေံရောၚ် သ္ကိုပ်ဝန်ဇၞော်အဂႅလိက်ဟီုဂး ဒုၚ်တၠုၚ်ရ။
နကဵုဂကောံဆေၚ်စပ်သီဖအိုတ်တံဂှ် ကေတ်အခေါၚ်အရာ လၟုဟ်ဏံတုဲ ဂိုတ်ဂစာန်အာ သွက်ပရေၚ်ၜိုဟ်လလမ်ညိ ညးအုပ်ကာနာနာ ကုလသမဂ္ဂ အာန်တိုနဳယို ဂူတာရက်သ် ဗတိုက်ဖအောဝ်လဝ်ရ။
ပွမတၚ်တုပ်စိုတ်ဂကောံဟာမာတ်သ်ဏံ သမ္မတတူရကဳ အာဒိုဂါန်လေဝ် ဒုၚ်တၠုၚ်တုဲ သွက်ပရေၚ်ၜိုဟ်လလမ်ဍာ်ဇမၠိၚ် လဂါံဇိုၚ်ခိုဟ်မွဲရောၚ် ဟီုရ။
ပရေၚ်ပးဒၞန်ဂမၠိုၚ်ဗၠးၜးကဵု ပရေၚ်ၜိုဟ်လလမ်ဂါဇာ ဆၜိုတ်မွဲပခံက်တဲရသှ်ေမံၚ်ဏီ အဓိပတိဂျာမာန် ဖရက်ဒရေတ် မာတ်ဇ် ဟီုရ။
သမ္မတပြၚ်သေတ် မက်ခရောန်ကီုလေဝ် ဒုၚ်တၠုၚ်ဏာ ပွမတၚ်တုပ်စိုတ်ဂကောံဟာမာတ်သ်ဏံတုဲ ကတိဍေံတံပတိုန်လဝ် ညံၚ်ဟွံဂွံလဇုဲလဇ ဒးထမံက်ရုပ်ရဴထေက်ရောၚ် သ္ဂးလဝ်ရ။
အကာဲအရာပရေၚ်ထံက်ပၚ် ပရေၚ်ဓရ်ဗ္စာရဏာမၞိဟ် ပရေအ်လောန်အိုတ်စောန် ဒးဒုၚ်စသိုၚ်မံၚ် ညးဒေသနွံမံၚ် ဒေသတံဝွံ ပရိုၚ်ဂွံလဝ်တၚ်တုပ်ဗီုလၟုဟ်ဏံဂှ် ဟွံဂံၚ်ပ္တေဟ်စကွေံကွေံ ဒှ်မံၚ်အိုတ်ရ။
Ref:BBC