လေဝ်ကေကဝ်၊ အံက်တဝ်ပါ ၇
ဍုၚ်တၟိလေဝ်ကေကဝ် တွဵုရးကရေၚ်ဂှ် ကလေၚ်သီဂွံဏာယျ ရဲလဝ်ဗဳကဝ်မယှေန်ပၞာန်တံ ပ္ဍဲအံက်တဝ်ပါ ၅ တြးလဝ်ဝါဒကီုလေဝ်ဒၞာဲဍုၚ်လ္ၚဵု ၜိုတ်ကဝက်ရဒပ်ကဝ်မယှေန်ပၞာန်ထိၚ်ချုက်လဝ်မာန် နူကဵုတမ်ရိုဟ်ကၞက် ဂကောံပၠန်ဂတးတံ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
ကဝ်မယှေန်ပၞာန်တံ ကလေၚ်ထိၚ်ချုက်ဂွံဏာတုဲ ဂတမုက် ရုၚ်ခဒမ်ကဵုဂဥုဲ ဍုၚ်လေဝ်ကေကဝ် ရုပ်ကောန်ဒပ်ကဝ်မယှေန်ပၞာန် တက်လဝ်ဗီုဂှ် ပ္ဍဲအံက်တဝ်ပါ ၅ ဂှ်တှ်ေ ရဲလဝ်ဗဳဒပ်ပၞာန်တံ တြးထ္ၜးလဝ် ပ္ဍဲမဳဒဳယာပရေၚ်မၞိဟ်ရ။
ကဝ်မယှေန်ပၞာန်ဂှ် နကဵုအရီုဗၚ် BGF ဒပ်ပၞာန်ဟေၚ် ကလေၚ်ထိၚ်ချုက်ဂွံလဝ် ရုၚ်ခဒမ်ကဵုဂဥုဲ ဍုၚ်လေဝ်ကေကဝ်ကဵု ဒၞာဲကရပ်ဗ္ဒာဲပွဳပွူဂှ်ကီုလေဝ် အလုံဍုၚ်မွဲဟွံသေၚ်ထိၚ်ချုက်ဂွံလဝ် ကြပ်ကဝက်ဍုၚ် လေဝ်ကေကဝ်ဏီရောၚ် ဂွံတီလဝ်ရ။
သှ်ေမံၚ်ဒၞာဲကဝက်ဍုၚ်ဂှ်လေဝ် ဒပ်ပံၚ်တောဲဂကောံပၠန်ဂတးတံ ဆက်ထိၚ်ချုက်မံၚ်ဏီတုဲ သွက်ဂွံဆက်ဒုၚ်ဒဝ်ဗတိုက်အာ ဒပ်ကဝ်မယှေန်ပၞာန်တံဂှ်ပလေဝ်ပလေတ်စမံၚ်ရောၚ် နူကဵုတမ်ရိုဟ်ကၞက် ကြပ်ကဵုဂကောံပၠန်ဂတးတံ သ္ဂးရ။
သွက်ဂွံကလေၚ်သီကေတ်ဍုၚ်လေဝ်ကေကဝ် နွံမၚ်သၠုၚ်ကျာဗြဝတဳ ဒၞာဲဒပ်ပံၚ်တောဲဂကောံပၠန်ဂတး KNLA သီဂွံလဝ်ဂှ် နူကဵုတုဲကၠုၚ်သိပ်တမ်ပါ ၂၁ တေံရ နကဵုအရီုဗၚ်ဒပ်မၚ်ပယဵုကရေၚ် BGF တံ ဒပ်ကဝ်မယှေန်ပၞာန် ထပက်ကၠုၚ်ပရောၚ်ပၞာန်ဗလးတိတုဲ ဇၟာပ်အရိုဟ်ဟ်တ္ၚဲပေါဲဗတိုက်သ္ကာတ်မြဟ် ဒှ်ကၠုၚ်မံၚ်ဟဂှ်ရ။
ဗွဲကြဴဏံ ဒၞာဲကုန်ကၟာဍာ်ဍုၚ်လေဝ်ကေကဝ်ဂှ် ဒပ်ကဝ်မယှေန်ပၞာန်သီဂွံဏာတုဲ ပြဟ်ဟ်ဏံ ပ္ဍဲကဵုဒၞာဲရုၚ်ခဒမ်ကဵုဂဥုဲကဵု ကရပ်ဗ္ဒာဲပွဳပွူတံရ ဒပ်ကဝ်မယှေန်ပၞာန်ထပ်သီဂွံလဝ်မဒှ်ရ။
ပ္ဍဲကဵုပေါဲဗတိုက်သီဍုၚ် လေဝ်ကေကဝ်ဏံ နူကဵုဒပ်ကဝ်မယှေန်ပၞာန် စကာလဝ်ကောန်ပၞာန်စှ်ေလဝ်ဘာပၞာန်တၟိ ဗွဲမဂၠိုၚ်တုဲ ကဵုဒုၚ်ချိုတ်တိုန်ဂတ ပ္ဍဲကဵုမုက်ပၞာန်ဂှ်ရ ကောန်ပၞာန်တၟိယိုက်ဂၠေၚ်ဝန်ပၞာန် ဗွဲမဂၠိုၚ် ဒးချိုတ်အာလဝ်နွံရဂှ် နူကဵုတမ်ရိုဟ်ကၞက်ဂကောံပၠန်ဂတးတံ သ္ဂးရ။
နူကဵုဒပ်ကဝ်မယှေန်ပၞာန် ယဝ်ရထိၚ်ချုက်ဂွံအာ ဍုၚ်လေဝ်ကေကဝ် မာန်မ္ဂး မွဲဒမြိပ်ဂၠံၚ် ဗြဝတဳ-ဝဝ်လေဝ်ဂှ်လေဝ် ဆက်တုဲ ဘိုအ်ဂွံ ထပ်ထပက်ကၠုၚ်ကရောၚ်ပၞာန် နွံမာန်ပၠန်ရောၚ် ညးသ္ၚဳဂၠိပ် ပရေၚ်ပၞာန်တံ သ္ဂးရ။
ပရိုၚ်-သြၚ်လောန်တိုၚ်မ်
Photo – Social Media