နေပျဳတဝ်၊ အံက်တဝ်ပါ ၇
သွက်ပေါဲရုဲမာဲဟွံလုပ်ဗဗွဲသၞောဝ်ဂှ် ကဝ်မယှေန်ပၞာန် သၠုၚ်ဇြဟတ်ပလေဝ်ပလေတ်စမံၚ်တုဲ မွဲလပါ်ပၠန်ဂှ်လေဝ် လ္တူညးဍုၚ်ကွာန်တံဂှ် သၠုၚ်ထပဵုကၠောန်မံၚ်ပရေၚ်ပကီုပရာတ်ရောၚ် အလဵုအသဳညဳသၟဟ် ဂကူ NUG လလောၚ်ပတိတ်လဝ်တၚ်နၚ်ရ။
အတိုၚ်တၚ်လလောၚ်တြး ဌာနဝန်ဇၞော်အခေါၚ်အရာမၞိဟ် NUG ပ္ဍဲပထမသတ္တဟ ဂိတုအံက်တဝ်ပါ လလေၚ်ပတိတ်လဝ် ဒဵုစိုပ်သိပ်တမ်ပါ ၃၀ မ္ဂး ကြပ်တိုန်ပေါဲရုဲမာဲဟွံလုပ်သၞောဝ်ဟဍၚ် လ္တူညးဍုၚ်ကွာန်တံ ပွမၜက်ၜေတ်ကဝ်မယှေန်ပၞာန် လောန်ကာဲဂၠိုၚ်တိုန်ဟဍၚ် သ္ဂးလဝ်ရ။
လၟေၚ်ဒဒှ်ပရေၚ်ဖံက်ပကဝ်အခေါၚ်အရာမၞိဟ် လ္တူညးဍုၚ်ကွာန်တံဂှ်၊ ပရေၚ်ဂစိုတ်လဝ်မၞိဟ် နကဵုဂအုံဗွဝ်၊ ပွမဗတိုက်ကဵုပၞာန်ကျာကေုာံ ပ္ဍဲကဵုလၟေၚ်ကမၠောန်ပကောံကောန်ပၞာန်တၟိ အဓ္ဓမတံဂှ် အပ္ဍဲအကြာဂိတုဏံ နကဵုလၟိဟ်မဂၞန်သၠုၚ်တိုန်မံၚ်ရ။
လၟေၚ်ပရောဒဒှ် ပွမဗတိုက်ကဵုပၞာန်ကျာ လၟိဟ် ၃၇၄၄ ဝါနွံတုဲ မၞိဟ် ၄,၁၃၅ တၠ ချိုတ်အာလဝ်ဂှ် ကောန်ၚာ်သၟဝ်အယုက် ၁၈ သၞာံကြပ် ၅၆၀ ပါလုပ်မံၚ်ရ။
တုဲပၠန် ဟိုတ်နူပေါဲဗတိုက်ပၞာန်ကျာတံဂှ် ဘာဗတောန်လိက် ၃၇၄ ဘာ၊ ရုၚ်ဂဥုဲ၊ ခဒမ်ဂဥုဲ ၁၂၉ မကဵု ဒၞာဲစမြိုၚ်ပရေၚ်ဘာသာ ၅၇၆ မ လီုလာ်ဆောံလေၚ်အာလဝ်နွံရဂှ် ပ္ဍဲကဵုတၚ်နၚ် ဌာနဝန်ဇၞော် အခေါၚ်အရာမၞိဟ် NUG ထမံက်ထ္ၜးလဝ်ရ။
ပရေၚ်ဂစိုတ်လဝ်မၞိဟ် နကဵုဂအုံဗွဝ် ၄၅၂ အမှု ဆက်လုလောန်ၜက်ၜေတ်လဝ်နွံတုဲ ဒဵုကဵုအခိၚ်လၟုဟ်ဏံ ဟိုတ်နူဒပ်ပၞာန်ဂစိုတ်တုဲ မၞိဟ် ၄,၇၆၃ တံချိုတ်တုဲ၊ အပ္ဍဲကဵုဏံကောန်ၚာ်သၟဝ်အယုက် ၁၈သၞာံ ဂှ် ၅၃၈ တၠပါလုပ်တုဲ ညးဗြဴ ၈၂၉ တၠ ပါလုပ်ရ။
ပ္ဍဲကဵု လၟေၚ်ကမၠောန် ပကောံကောန်ပၞာန်တၟိအဓ္ဓမတံ နွံမံၚ်ဂှ် ၁,၆၁၈ ပရူပရာဂှ် ညးဒးဒုၚ်ပကောံနနဲအဓ္ဓမ ၃၀,၇၀၆ တၠ နွံမံၚ်ရောၚ် ပ္ဍဲကဵုတၚ်နၚ်ဌာနဝန်ဇၞော်အခေါၚ်အရာမၞိဟ် NUG ချူထမံက်ထ္ၜးလဝ်တုဲ ရးမာန္တလေဝ်ဂှ် ဒးဒုၚ်ပကောံကောန်ပၞာန် နနဲအဓ္ဓမဒှ်ဂၠိုၚ်အိုတ်ကီု ပ္ဍဲတွဵုရးရခေၚ်ဂှ်ဒုတိယဂၠိုၚ်အိုတ် ဒှ်မံၚ်သ္ဂးရ။
စပ်ကဵုပရေၚ်ဖံက်ပကဝ်အခေါၚ်အရာမၞိဟ် လၟေၚ်ဒဒှ် ၂၁,၅၀၃ ပရူ နွံလဝ်တုဲ ရးသကိုၚ်ဂှ်တှ်ေ ဒှ်ဂၠိုၚ်အိုတ်ရ။ အပ္ဍဲကဵုလၟေၚ်ဒဒှ် ပရေၚ်ဖံက်ပကဝ် အခေါၚ်အရာမၞိဟ်တံမ္ဂး ဂစိုတ်မၞိဟ်ဟၟဲကဵုဗဗွဲဓရ်ဂှ် ဒှ်ဂၠိုၚ်အိုတ်တုဲ၊ အမှု ၅,၀၁၆ အမှုနွံမံၚ်ရောၚ် ပ္ဍဲကဵုတၚ်နၚ် NUG ချူထမံက်ထ္ၜးလဝ်ရ။
နကဵုကဝ်မယှေန်ပၞာန်ဂှ် ပ္ဍဲကၞောတ်ဂိတုဒဳဇြမ်ပါဏံ အလုံဍုၚ်မွဲညံၚ်ဂွံစကၠောန်ဗ္ဒျ်အာ ပေါဲရုဲမာဲသ္ကုတ်ညးကဵုညးဂှ် ပလေဝ်ပလေတ်စ မံၚ်အိုတ်တုဲ ဒေသဒးဗလးလဝ်တဲတံဂှ် သွက်ဂွံကလေၚ်ထိၚ်ချုက်ဂွံမာန် သၠုၚ်အသိၚ်တုဲထပက်မံၚ်ပၞာန်ရ။
ပ္ဍဲအံက်တဝ်ပါ ၆ တ္ၚဲသဳဂိတုဝှ်ပေၚ် အခိၚ်နူဂယး၇ နာဍဳကဝက်ပြၚ်ဂှ် ပ္ဍဲကဵုဒေသတွဵုရးသေံသၟဝ်ကျာ ဒၞာဲဒပ်တအာၚ် TNLA ထိၚ်ချုက်လဝ် ဍုၚ်နမတူကဵုတဳပဝ်တံဂှ် နူကဵုပၞာန်ကျာဒပ်ကဝ်မယှေန်ပၞာန် ကြဳဗုမ် ဗတိုက်လဝ်ရ။
ဟိုတ်နူပရေၚ်ဗတိုက်လဝ်ဗီုဏံဂှ်တုဲ ကောန်ၚာ်အယုက်မွဲသၞာံကီု ညးဍုၚ်ကွာန်ပိတၠ ဒးအာလဝ်ဘဲဝပ်တုဲ သ္ၚိကောန်ညးဍုၚ်ကွာန် ဟွံအောန်နူ ၇ မ ဒးလဝ်ဗုမ်လီုလာ်အာလဝ်နွံရဂှ် နူကဵု TNLA လလောၚ်ပတိတ်လဝ်ပရိုၚ်ရ။
ပရိုၚ်-သြၚ်လောန်တိုၚ်မ်
Photo – Social Media