ကအ်ကြိက်၊ အံက်တဝ်ပါ ၈
ပ္ဍဲတွဵုရးကရေၚ်သၟဝ်ကျာကအ်ကြိက် ကွာန်နွံမံၚ်မွဲဒမြိပ်သ္ကုတ်ဂၠံၚ် နဗူ-ဒဒန်ပိုတ်(ကအ်ကြိုက်)တံဂှ် ဒပ်ပၞာန်ကလေၚ်ထိၚ်ချုက်မာန်အာရဂှ် တမ်ရိုဟ်ကၞက်ပရိုၚ်ညးဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
ကွာန်သ္ကုတ်ဂၠံၚ် နဗူ-ဒဒန်ပိုတ်(ကအ်ကြိုက်) မပ္တံ နာန်ကဝ်တေ၊ နံၚ်ထာတ်ပံၚ်၊ လာန်ခိုဗိုၚ်၊ မျပတိုၚ်တံဂှ် နူကဵုဒပ်ကဝ်မယှေန်ပၞာန် ၝောံဒပ် ၄၄ ပ္ဍဲအံက်တဝ်ပါ ၆ ဂှ် ကလေၚ်ထိၚ်ချုက်မာန်အာရ။
နူကဵုဒပ်ကဝ်မယှေန်ပၞာန် ကလေၚ်ထိၚ်ချုက်ဂွံအာလဝ် ကွာန်သ္ကုတ် ဂၠံၚ် နဗူ-ဒဒန်ပိုတ်(ကအ်ကြိုက်)တံဂှ် ပလီုပလာ်ဏာသ္ၚိဌာန် ဗွဲမဂၠိုၚ်တုဲ ကေတ်ဏာကပေါတ်ၚုဟ်မးနွံတံကီုရောၚ် ညးဒေသတံသ္ဂးရ။
အခိၚ်ကရေၚ်ပၞာန်ဒပ်ကဝ်မယှေန်ပၞာန် ထပက်လုပ်ကၠုၚ်ကွာန်မျပတိုၚ် သ္ကုတ်ဂၠံၚ် နဗူ-ဒဒန်ပိုတ်(ကအ်ကြိုက်) ဂှ် ရပ်စၟဳစၟတ်သၟာန်သၟုက်မံၚ်ညးဒေသတံတုဲ ဗွဲကြဴကလေၚ်ဗလးကဵုလဝ်ရဂှ် တမ်ရိုဟ်ကၞက်ပရိုၚ်ညးဒေသမွဲတၠ သ္ဂးရ။
ဒပ်ကဝ်မယှေန်ပၞာန်ဂှ် နူကဵုတိဍာ်ဒပ်နဗူမွဲအဆံၚ် ထပက်ကၠုၚ်ကရောၚ်ပၞာန်နွံဂှ်ကီု မွဲလပါ်ပၠန်ဂှ်လေဝ် နူကဵုဒဵုကြုၚ်ဗိုၚ်ကရပ်ကြုၚ်ဒဵုမွဲအဆံၚ် အတိုၚ်ဂၠံၚ်ဂြိပ်ထပက်ကၠုၚ်ကရောၚ်ပၞာန် လပါ်ဗဒိုပ်ဒဵုသြိုဟ်ပါ် မျပတိုၚ်နွံရဂှ် ညးဒေသတံဟီုရ။
ပ္ဍဲဗဒိုပ်ဒဵုသြိုဟ်ပါ် သ္ကုတ်ဂၠံၚ် နဗူ-ဒဒန်ပိုတ်(ကအ်ကြိုက်)ဂှ် အကြာဒပ်ကဝ်မယှေန်ပၞာန်ကဵု ဂကောံဇြဟတ်ပၠန်ဂတးတံ လောန်ကၠုၚ်ဂိတုအေဗရဴတေံဒှ်ပေါဲဗတိုက်တုဲ ဒၞာဲကုန်ဗဒိုပ်ဒဵုသြိုဟ်ပါ်ဂှ် ဒပ်ပံၚ်တောဲဂကောံဇြဟတ်ပၠန်ဂတးတံသီဂွံဏာဂှ်ကီု သီုကဵုထိၚ်ချုက်ဂွံလဝ် သ္ကုတ်ဂၠံၚ်ကြုၚ်ဒဵု-နဗူ ကေုာံ နဗူ-ဒဒန်ပိုတ်(ကအ်ကြိုက်) တံကီုရ။
ဒပ်ကဝ်မယှေန်ပၞာန်ဝွံ အခိၚ်ကၠာဟွံစိုပ်ပေါဲရုဲမာဲဏံ ပ္ဍဲတွဵုရးကရေၚ်နကဵုဇြဟတ်ဗွဲမဂၠိုၚ် ထပက်ပၞာန်ဗတိုက်ကၠုၚ်လဝ်ဂှ် သီဂွံဏာလဝ် ဂၠံၚ်ကြုၚ်ဒဵု-ကအ်ကြိက်၊ ဂၠံၚ်အာယှ၊ တေန်ဂါန်ညဳနံၚ်ကဵု ဍုၚ်ဗြဝတဳတံပေၚ်ၚ်တုဲ ဍုၚ်လေဝ်ကေကဝ် ကြပ်ကဝက်ဂှ်လေဝ်ကလေၚ်သီဂွံလဝ်တုဲရ။
ပရိုၚ်-သြန်လောန်တိုၚ်မ်
Photo – Social Media