မတ်မလီု ၊ အံက်တဝ်ပါ ၈
ပ္ဍဲကဵုတွဵုရးမန် သွက်ပေါဲရုဲမာဲကဝ်မယှေန်ပၞာန် ကၠုၚ်ဗာန်စွံလဝ် စရၚ်မာဲတံဂှ် ညးကၠုၚ်ပလေဝ်စရၚ်မာဲမှာရာတံ စဵုကဵုကြပ်ဟၟဲအောန်လောန်ကွေံကွေံရောၚ် ညးဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
နူကဵုကဝ်မယှေန်ပေါဲရုဲမာဲ သၟဝ်တဲကဝ်မယှေန်ပၞာန်ဝွံ သွက်ပေါဲရုဲမာဲကၠောန်အာ ပ္ဍဲကဵုဒဳဇြမ်ပါ ၂၈ ဏံ စရၚ်ညးကဵုမာဲတံဂှ် နဒဒှ်အလန်ပထမ စနူကဵုသိပ်တမ်ပါ ၃၀ ဒဵုကဵုအံက်တဝ်ပါ ၁၃ တေံ ဗာန်စွံလဝ်ရောၚ် လလောၚ်တြးလဝ်ရ။
ပ္ဍဲကဵုစရၚ်မာဲကဝ်မယှေန်ပၞာန် ဗာန်စွံလဝ်ဒၞာဲဒေသတံဂှ် ညးချိုတ်အာလဝ်တံကီု၊ ညးဆုဲပြံၚ်အာဒၞာဲတံ ယၟုပါလုပ်မံၚ်တုဲ တၚ်နၚ်ဟွံဍာံစၟတ်မံၚ်ဟွံက ညးလ္ၚဵုပၠန်ယၟုလေဝ်ဟွံပါကၠုၚ်ရ။
ယၟုညးချိုတ်လဝ်တံဂှ်လေဝ် စုတ်လဝ်ပ္ဍဲကဵုစရၚ်မာဲ ကဝ်မယှေန်ပၞာန်တံဂှ်ကီု ယၟုမၞိဟ်ဟွံပါကၠုၚ်တံစုတ်လဝ်ယၟုမၞိဟ် အပဵုတံဂွံဆဵုမံၚ်တုဲ စရၚ်မာဲၜိုန်ရမှာကီုလေဝ် ဟိုတ်နူ ပရေၚ်စိုတ်လုပ်စဟၟဲအိုတ်ဂှ် ဟွံအာပလေဝ်လဝ်ပုဟ် ညးလ္တူဍုၚ်မတ်မလီုမွဲတၠ ဟီုကဵုဌာန်ပရိုၚ်သြၚ်လောန်တိုၚ်မ်ရ။
“ပ္ဍဲစရၚ်သ္ၚိ ယၟုလ္ၚဵုပါမံၚ်၊ ညးလ္ၚဵုယၟုဟွံပါပုဟ်။ လၟိဟ်မၞိဟ်နွံမံၚ်ပ္ဍဲသ္ၚိကဵု စရၚ်ညးတံစုတ်လဝ်မၞိဟ် ပဵုမံၚ်၊ ပ္ဍဲသ္ၚိနွံမၞိဟ် ၄ ဂှ် ညးတံစုတ်လဝ်စရၚ် မၞိဟ်နွံမံၚ် ၆၊ ပ္ဍဲမွဲသ္ၚိဂှ် နွံမၞိဟ် ၃ ၊ ချိုတ်အာလဝ် ၂ ၊ ၂ ဂှ်လေဝ် ကလေၚ်စုတ်လဝ်စရၚ်ကဵုမာဲပၠန်၊ စရၚ်မာဲမှာတှ်ေလေဝ် ဟွံအာပလေဝ်အိုတ်ပုဟ်၊ ညးမွဲလေဝ် ဟွံအာရံၚ်ပုဟ်” သာ်ဝွံ သ္ဂးရ။
တုဲပၠန် ကၠောန်လဝ်စရၚ်မာဲညံၚ်ဂွံချိုတ်ပၠိုတ်ရောၚ် ကဝ်မယှေန်ပၞာန်သီအဝဵုဟီုကီုလေဝ် ပ္ဍဲဗလးတိမ္ဂး တၚ်နၚ်စရၚ်မာဲပရေၚ်ဗၠေတ်မှာရာ ဗွဲမဂၠိုၚ်နွံတုဲ ပရေအ်မံၚ်နူကဵုစရၚ်မာဲ ကၠောန်လဝ်ပေါဲရုဲမာဲ နူကၠာတေံဏီ ညးတေံဆက်ဟီုရ။
စရၚ်မာဲကဝ်မယှေန်ပၞာန် လၟုဟ်ဏံဂှ်ဗၠေတ်ဂၠိုၚ်ပဵုပရေအ် နူကဵု ပေါဲရုဲမာဲ ၂၀၂၀ တေံတုဲ လ္တူတၚ်နၚ် ဗၠေတ်ဗၠေၚ်မှာရာမံၚ်တံဏံဂှ် ညးဍုၚ်ကွာန်တံ သွက်ဂွံအာပလေဝ်တၚ်နၚ်ဂှ်လ္ပဟီုဏီ ညိလေဝ်ညးတံ ဟွံဒှ်ကျောဝ်ဗဵု အာရံၚ်လဝ်ဏီပုဟ် ညးဒေသၜဳလေၚ်မွဲတၠ ဟီုကဵုဌာန်ပရိုၚ်သြၚ်လောန်တိုၚ်မ်ရ။
“လပါ်စြေက်ဏံလေဝ် တင်နၚ်မှာရာမံၚ်အိုတ်စောန်။ ပရေအ်နူကဵု တင်နၚ်စရၚ်မာဲ ပေါဲရုဲမာဲ ၂၀၂၀ တေံဗွဲမလောန်။ ဆလဆလ မၞိဟ်ထပ်မံၚ်။ ညးချိုတ်အာလဝ်တံ ယၟုကလေၚ်ပါကၠုၚ်။ လဆောဝ်လဆောဝ် မၞိဟ်မွဲဓဝ် ပါမံၚ် ၆ ဒၞာဲ။ ကၠုၚ်ရံၚ်ညိ ဗဵုအိုတ်ညိ မှာမံၚ်တှ်ေ ဂွံကလေၚ်ပလေဝ် ဍေံတံ ကညၚ်မံၚ်။ ဆဂး ပိုဲဂှ် ဘိုအ်ဂွံပလေဝ်လ္ပဟီုဏီ၊ အာကျောဝ်ဗဵုလဝ်မၞိဟ်မွဲလေဝ်ဟၟဲပုဟ်” သာ်ဝွံ သ္ဂးရ။
နူကဵုကဝ်မယှေန်ပေါဲရုဲမာဲ ကဝ်မယှေန်ပၞာန်ဂှ်တှ်ေ ဗာန်စွံကဵုလဝ်စရၚ်မာဲအလန်ပထမ ပွိုၚ် ၁၄ တ္ၚဲဏံဂှ် သွက်ဂွံအာရံၚ် ဒၞာဲရုၚ်ပါ်ကဝ်မယှေန်ပေါဲရုဲမာဲ အရာပ်/ဂကောံကွာန်မဆေၚ်စပ်တံတုဲ ဟိုတ်နူနာနာသာ် ယဝ်ရဗါန်စွံကဵုလဝ် ဒၞာဲ အရာပ်/ဂကောံကွာန်တံဟွံမာန်မ္ဂး မ္ဒးအာရံၚ် ဒၞာဲရုၚ်ကဝ်မယှေန်ပါ် ပွိုၚ်ဍုၚ်မဆေၚ်စပ် တံရောၚ် လလောၚ်တြးလဝ်ရ။
တုဲပၠန် ကၠုၚ်ရံၚ်စရၚ်မာဲတုဲ ယဝ်ရယၟုဇကုဟွံပါလုပ်မ္ဂး နကဵုတၞးလိက် ဗီုပြၚ် ၃ အာတ်မိက် သွက်ဂွံစုတ်ကဵုယၟုကီု၊ ညးပါလုပ်ဟွံထေက်တံ ယၟုပါလုပ်မံၚ်မ္ဂး နကဵုတၞးလိက်ဗီုပြၚ် ၄ သ္ပစောဒကမာန်တုဲ တၚ်နၚ်မှာရာမံၚ်တံဂှ် နကဵုတၞးလိက်ဗီုပြၚ် ၄-ဂ ဂှ် ကလေၚ်ပတိုန် တၞးလိက်ဂမြၚ်ဗတီမာန်ရောၚ် သ္ဂးရ။
စပ်ကဵုစရၚ်မာဲလၟုဟ်ဏံတုဲ ထပ်ဗပေၚ်၊ ပလီုပလှ်ပတိတ်၊ ပွမပလေဝ်ပလေတ်တံ ရေၚ်တၠုၚ်တုဲမ္ဂး နဒဒှ်အလန်ဗွဲကြဴအိုတ် ပ္ဍဲဂိတုနဝ်ဝမ်ပါတေံ ကလေၚ်ဗါန်စွံအာကဵု စရၚ်မာဲမွဲဝါပၠန်ရောၚ်မဒှ်တုဲ ဗီုနွံပၟိက် အာတ်မိက်၊ ပလေဝ်ပလေတ်၊ ပတိုန်စောဒကတံဂှ် ထပ်ရေၚ်တၠုၚ်ဖန်ဖက်အာမာန်ပၠန် သ္ဂးလဝ်ရ။
ပ္ဍဲကဵုတွဵုရးမန် လ္တူပေါဲရုဲမာဲကဝ်မယှေန်ပၞာန် ကၠောန်အာဏံ ဟိုတ်နူပရေၚ်စိုတ်လုပ်စဟၟဲတုဲ ဒၟာနူရဲကၠုၚ်ရံၚ်စရၚ်မာဲ အောန်မံၚ်ဂှ်ရ ညးဒေသတံ ညံၚ်ဂွံကၠုၚ်ရံၚ်အာ စရၚ်မာဲအိုတ်ညိဂှ် ဗက်ဆဝ်ဗ္ၚုဟ်မံၚ်ကဵု စက်သၠဲရမျှာၚ်ကီု ရဲဂကောံပရေၚ်အုပ်ဓုပ် အရာပ်/ကွာန်တံ တိုန်မွဲသ္ၚိစှ်ေမွဲသ္ၚိဗက်ဟီုဂးမံၚ်ကီု ကဵုဇြဟတ်ဟရိုဟ်နာနာနွံမံၚ်ရောၚ် ညးဒေသတံဟီုရ။
ပရိုၚ်-သြန်လောန်တိုၚ်မ်
Photo – MOI