ကျိုက်ထဝ်၊ အံက်တဝ်ပါ ၁၀
ပ္ဍဲကဵုတွဵုရးမန် ပွိုၚ်ဍုၚ်ကျာ်ထဝ်ဂှ် ရဲဒပ်ကဝ်မယှေန်ပၞာန်တံကဵုဒပ်ဗၠာဲသၟိၚ်တံ ကၠောန်စမံၚ်ပရေၚ်ရပ်မၞိဟ် အာတ်ဓရတ်သြန် ဂၠိုၚ်တိုန်ကၠုၚ်ရောၚ် ညးဒေသတံ ဟီုကဵုဌာန်ပရိုၚ် သြၚ်လောန်တိုင်မ်ရ။
စနူကဵု ဂိတုအံက်တဝ်ပါမံက်တုဲကၠုၚ်ဏံ ပ္ဍဲကဵုသ္ကုတ်ဂၠံၚ် ကျာ်ထဝ်-ကွာန်ကအ်ထေၚ်ကီု ဂၠံၚ်အရာပ်သၠုၚ်ကျာ-ကွာန်တိုၚ်ကဝ် ပ္ဍဲကဵုဂၠံၚ်ကွာန်ဆက်လဝ်တံ ရဲဒပ်ကဝ်မယှေန်ပၞာန်တံဏံ ကၠောန်စမံၚ်ပွမရပ်မၞိဟ် အာတ်ဓရတ်သြန် မဒှ်ရ။
ပ္ဍဲကဵုအရာ ရပ်ဓရတ်ဘပဠအာတ်သြန်ဂှ်တှ်ေ ညးတြုံၜါတၠ ဍိုက်ကၠုၚ်ကွဳလိုန်ဓါတ်မ္ဂး ဖံက်ပကဝ်အမိၚ်ဒေသန္တရ စောဲစပ်တုဲ စွံလဝ်ပွန်ကဵု လ္တူသၟတ်တံကၠောန်သ္ပမံၚ်ရ။
လ္တူညးမဒးဒုၚ်ရပ်ဏာမွဲမွဲတၠမ္ဂး နူကဵုသြန် ၁၀ ကိုတ် ဒဵုကဵု ၁၅၀ ကိုတ် အာတ်မိက်ဏာသြန်နွံတုဲ ရဲကဵုသြန်ဟွံမာန်မ္ဂး ဒးဒုၚ်ပကောံဏာ နကဵုကောန်ပၞာန်တၟိရောၚ် ပရေၚ်ဗီုတံဏံက္တဵုဒှ်မံၚ်ရ။
အတိုၚ်ညးဒေသတံဟီုမ္ဂး ပ္ဍဲအကြာတ္ၚဲတံဏံ နူကဵုကွာန်တိုၚ်ကဝ်၊ ခလောန်၊ ကျာ်ကတာကဵု ကအ်စမ်နိုၚ်၊အရာပ်သၠုၚ်ကျာတံ သၟတ်ကြပ် ၂၀ ဒးဒုၚ်ရပ်ဓရတ်ဘပဠ အာတ်ကေတ်လဝ်သြန်နွံရောၚ် ဂွံတီရ။ ပွမ ရပ်ဓရတ်ဘပဠတုဲ သြန်ဂွံလဝ်တံဂှ် ဒပ်ပၞာန်၊ ဗၠာဲသၟိၚ်ကဵု ရဲပရေၚ်ဂီုကၠီုပၞာန်တံ သွက်ညးကဵုညး ပါ်ပရအ်ကေတ်ဏာညဳညဳ သ္ဂးရ။
လောန်ကၠုၚ်ဂိတုသိပ်တမ်ပါတေံလေဝ် ပ္ဍဲကဵုပွိုၚ်ဍုၚ်ကျာ်ထဝ် ဒၞာဲကမၠောန်က္တိုၚ်ထဝ် နွံမံၚ်ကွာန်သၠဗြာတ်ဂှ် ဒပ်ကဝ်မယှေန်ပၞာန် လုပ်ဂြးတုဲ ရပ်ဂွံဏာမၞိဟ်ကရပ် ၅၀ တၠတုဲ မၞိဟ်ကဵုသြန်မာန်တံ ကလေၚ်ဗၠးတိတ်ကီုလေဝ် ဗွဲမဂၠိုၚ်တံ ဒးဒုၚ်ပလံၚ်ဏာ ဘာဗတောန် ကွတ်ပၞာန်ရဂှ် ဂွံလဝ်ပရိုၚ်ရ။
ပရိုၚ်-သြၚ်လောန်တိုၚ်မ်
Photo – CJ