မတ်မလီု ၊ အံက်တဝ်ပါ ၁၀
ပ္ဍဲကဵု မွဲဒမြိပ်ဝင် ၚုဟ်မးထဝ်ဂၠးကဝ်မ္ဂး ဒဵုကဵုၜက်ကၞောတ် မွဲအလန်မှဟွံကေၚ်စိုပ်လဝ် သၠုၚ်တိုန်အာလဝ်တုဲ အနှေန်ၚုဟ်ထဝ်အပ္ဍဲဍုၚ်လေဝ် အကြာပွိုၚ်ၜါတ္ၚဲဏံဓဝ် ဒဵုကဵု ၈၂ ကိုတ်ပြၚ် ၚုဟ်မးထပက်သၠုၚ်တိုန်အာရဂှ် ညးတၠကမၠောန်ထဝ်တံ ဟီုကဵုဌာန်ပရိုၚ် သြၚ်လောန်တိုင်မ်ရ။
ၚုဟ်မးထဝ်ဂၠးကဝ်ဝွံ တုဲကၠုၚ်အံက်တဝ်ပါ ၇ တေံ လျိုၚ်ထဝ်မွဲအံၚ်သမ္ဂး ပွဳပွူဒဝ်ဠာ အမေရိကာန် ၃၉၅၀ နွံကၠုၚ်ဂှ် ပ္ဍဲအံက်တဝ်ပါ ၉ ဏံ ဒှ်အာကြပ် ၄၀၄၀ ဒဝ်ဠာ ၜက်အာကၞောတ် သၠုၚ်တိုန်အာဟဂှ်ရ။
ဗီုကဵု အနှေန်ၚုဟ်မးထဝ်ဂၠးကဝ်သၠုၚ်တိုန်ကၠုၚ်ကီု အနှေန်ၚုဟ်ထဝ် အပ္ဍဲဍုၚ်လေဝ် ထဝ်ဒကောၚ်လျိုၚ်မွဲဒကေဝ်မ္ဂး နူကဵုဗ္ဒာဲ ၈၀ ကိုတ်ဒကေဝ်ဂှ် စိုပ်အာ ၈၂ ကိုတ်ပြၚ် ၚုဟ်သၠုၚ်တိုန်အာ မဒှ်ရ။
ဒဒှ်ရ အနှေန်ၚုဟ်ထဝ်အပ္ဍဲဍုၚ်သၠုၚ်တိုန်အာဏံဂှ် ဟွံဆေၚ်ကဵုပရေၚ်ဍုၚ်ဗမာ၊ ဟိုတ်နူ ဇြဟတ်မိက်ဂွံရာန်ထဝ်ဂၠးကဝ် သၠုၚ်တိုန်အာတုဲ မွဲဒမြိပ်ဝင် ၚုဟ်မးထဝ်ဂၠးကဝ် မွဲအလန်မှဟွံကေၚ်စိုပ် သၠုၚ်တိုန်အာဂှ်ရောၚ် ညးတၠကမၠောန်ထဝ်မွဲတၠ ဟီုကဵုဌာန်ပရိုၚ် သြၚ်လောန်တိုင်မ်ရ။
“အဓိက ဟိုတ်ပရူပရာ အနှေန်ထဝ်ဂွံတိုန်အာဂှ် ဟွံဆေၚ်ကဵု ပရေၚ်ဍုၚ်ဗမာပုဟ်၊ ဟိုတ်ပရူပရာ အနှေန်ထဝ်ဂၠးကဝ် ဂွံတိုန်အာဂှ်ပၠန် ဆက်စပ်မံၚ်ကဵု အကာဲအရာပရေၚ်ဍုၚ်ကွာန် ဂၠးကဝ်တုဲ ပၟိက်မိက်ဂွံရာန်ထဝ် မွဲအလန်ဓဝ် သၠုၚ်တိုန်အာဂှ် အနှေန်ထဝ်ဂၠးကဝ် မွဲအံၚ်သ ၄၀၃၇ ဟီုတှ်ေ ပ္ဍဲကဵုဝင်ထဝ်မွဲဒမြိပ် မွဲအလန်မှ ဟွံကေၚ်စိုပ်လဝ်ပုဟ်။ ဟိုတ်နူပရေၚ်တံဏံတုဲ အနှေန်ထဝ် ဒးတိုန်အာ” သာ်ဝွံ သ္ဂးရ။
အနှေန်ထဝ်တံ ဟိုတ်နူသၠုၚ်တိုန်ၜက်ကၞောတ်တုဲ ပရေၚ်သွံရာန်အပ္ဍဲကဵုဗွဝ်ဖျာ ဂံက်စှ်ေအာကီု လျိုၚ်မွဲဒကဝ်မ္ဂး ဒဵုကဵု ၅ ဠက် ၈ ဠက် ခြာလဝ်တုဲ ဆေၚ်ထဝ်လ္ၚဵုကၠောန်မံၚ်ပရေၚ်သွံရာန် လှာဲဂတးတံနွံမံၚ်ကီုရ။
မွဲလပါ်ပၠန် နူကဵုကဝ်မတဳ ခုတ်စၟတ်အနှေန်ၚုဟ်မးထဝ် သၟဝ်တဲကဝ်မယှေန်ပၞာန်ဂှ်တှ်ေ ပၞောဝ်ကဵုထဝ်ဍာ်ဒကေဝ်ပေၚ် လျိုၚ်မွဲဒကေဝ်မ္ဂး စွံလဝ် ၅,၉၉၀,၀၀၀ ကီုလေဝ် ၜတ်ကၞာတ်အာကဵု အနှေန်ၚုဟ်ထဝ်မ္ၚးတှ်ေ ခြာမံၚ် ၂၀ ကိုတ်ပြၚ်ရ။
ပရိုၚ်-သြၚ်လောန်တိုၚ်မ်
Photo – Social Media