မတ်မလီု၊ အံက်တဝ်ပါ ၁၀
သွက်ဂွံပတုဲအာ ပွမသီလဝ်အဝဵုဟွံအံၚ်ဇၞးဏံ နကဵုဖျေံစွံလဝ်ဗီုပြၚ် ဗွဲမချိုတ်ပၠိုတ် ကဝ်မယှေန်ပၞာန် ကၠောန်ပေါဲရုဲမာဲလောန်ၜက်အာတုဲ အပြံၚ်အလှာဲသၠာဲၜးကယျိုၚ်ပၞာန်ဟေၚ် ဘိုအ်ဂွံဆဵုညာတ်အာရ နွံမာန်ရောၚ် BNI Myanmar Peace Monitor သ္ၚဳဂၠိပ်လဝ်ရ။
ပ္ဍဲကဵု လိက်ဒုၚ်စဳရေၚ်လၟေၚ်သတ္တဟ ပတိတ်ကၠုၚ်လဝ် အံက်တဝ်ပါ ၈ “ပေါဲရုဲမာဲလောန်ၜက်အာတုဲ အပြံၚ်အလှာဲ သၠာဲၜးကယျိုၚ်ပၞာန်ဟေၚ်” ဏံမ္ဂး ဗီုပြၚ်ကဝ်မယှေန်ပၞာန် လးစွံလဝ် ကၠာဲဟွံစိုပ်ပေါဲရုဲမာဲကဵု ကာလၜက်အာတေံဂှ် ချူထမံက်လဝ်ရ။
နကဵုတၚ်နၚ် ကဝ်မယှေန်ပေါဲရုဲမာဲကၟိန်ဍုၚ်မ္ဂး ပ္ဍဲကဵုပေါဲရုဲမာဲ ဂိတုဒဳဇြမ်ပါဏံ သွက်ဂွံလုပ်ပြိုၚ်အာဂှ် ညးစၞး ၅၀၂၀ ပြၚ်တံ ပတိုန်လဝ်စရၚ်ညးစၞး အလံၚ်အမာတ်တံ နွံရ။
အပ္ဍဲဏံ ဗော်စန်ဒက်အာအလုံဍုၚ်ဂှ် နွံမံၚ် ၆ ဗော်ကဵု ဗော် ၅၁ ဗော်ဂှ် စန်ဒက်အပ္ဍဲရးဒေသဇၞော်၊ တွဵုရးတံတုဲ အမာတ်ပုဂ္ဂလမွဲဓဝ်တံလေဝ် လုပ်ပြိုၚ်အိုတ်ရောၚ်။
ဗော်ပျဳခိုၚ်ဖျို USDP ကဵု ဗော်ပရေၚ်စန်ပကောံကောန်ဍုၚ်အရၚ် (တစည) ရဲပြံၚ်လှာဲကၠုၚ်လဝ် နူဒပ်ပၞာန်ဗမာ ခေတ်အဆက်က်တံဂှ်ပတိုန်လဝ်စရၚ် လၟိဟ်အလံၚ်ညးစၞးအမာတ် ဂၠိုၚ်အိုတ်ဒှ်မံၚ်ရ။
ညးတာလျိုၚ်ပၞာန်ဒေါအ်ဇူလဝ်တံလုပ်ပြိုၚ်အာ နူကဵုဗော်စန်ဒက် အလုံဍုၚ် USDP ဂှ် အလံၚ်အမာတ် ၁၀၄၈ နွံရ။
နကဵုပရေၚ်ဒဒှ်တၟေၚ်မွဲမ္ဂး နကဵုအမိၚ် က္ဍိုက်သ္ကိုပ်ပၞာန်သီအဝဵု ဂအုပ်သ္ကိုပ်ပၞာန်ဇၞော် မေန်အံၚ်လှိုၚ် ၜးသၠောတ်ကယျိုၚ်ပၞာန်တုဲ ပြံၚ်လုပ်ကၠုၚ်ဗော် USDP ကြပ် ၄၉၀ တၠနွံ၊ အပ္ဍဲဏံ နကဵုအဆံၚ်ပၞာန်မ္ဂး သ္ကိုပ်ပၞာန်ဇၞော်၊ ဒုသ္ကိုပ်ပၞာန်ဇၞော်တံပါလုပ်တုဲ ဒဵုစိုပ်အဆံၚ် ဂအုပ်ရုၚ်ဌာန်ဂအုပ်ပၞာန် တခဳအကြာပ်ဒပ်ဇၞော်တံကဵု အဆံၚ်တၞဟ်ဟ်တံလေဝ် ပါလုပ်မံၚ်သ္ဂးရ။
တုဲပၠန် ပြဟ်ဟ်ဏံ ညးတာလျိုၚ်နွံအဆံၚ်သ္ကိုပ်ဗိုလ်၊ ဒုသ္ကိုပ်ဗိုလ်ဇၞော် ၜိုတ် ၁၀ တၠတံဂှ်လေဝ် ကဵုအခေါၚ်ဇူတိတ် နူကဵုဒပ်ပၞာန်တုဲ နူကဵု ဗော်တစည မွဲအဆံၚ် သွက်ဂွံကဵုလုပ်ပြိုၚ်အာနွံရောၚ် BNI Myanmar Peace Monitor ပ္ဍဲကဵုသ္ၚဳဂၠိပ်ဂှ် ချူလဝ်ရ။
နဒဒှ်ပေါဲရုဲမာဲသ္ကုတ် ၁ ပ္ဍဲဒဳဇြမ်ပါ ၂၈ ဂှ် ဒၞာဲကဵု ၁၀၂ ပွိုၚ်ဍုၚ် သွက်ဂွံကၠောန်အာ နူကဵုကဝ်မယှေန်ပေါဲရုဲမာဲ ကၟိန်ဍုၚ် သၟဝ်တဲကဝ်မယှေန်ပၞာန် လလောၚ်တြးလဝ်ရ။
ဟိုတ်ဂှ်ရ ပ္ဍဲကဵုပေါဲရုဲမာဲသ္ကုတ် ၁ ၜက်အာတုဲ နကဵုကဝ်မယှေန်ပၞာန် ယဝ်ရကော်အာကောံဓရီုဇၞော် စၠတ်ထဝ်ကၟိန်ဍုၚ်မ္ဂး အလံၚ်ညးစၞးဒုၚ်ရုဲစှ် ၁၁၅ တၠကဵု ညးစၞးဒပ်ပၞာန် ၁၆၆ တၠတံ စိုပ်ကၠုၚ် ပ္ဍဲကဵုစၠတ်ထဝ်ကၟိန်ဍုၚ်ရောၚ် တော်ဆကေတ်မာန်ရ။
သွက်ဗော်ပရေၚ်ဍုၚ်ကွာန်ကဵု အလံၚ်ညးစၞးလုပ်ပြိုၚ်အာ ပ္ဍဲကဵုပေါဲရုဲမာဲဏံ ပရေၚ်စက်ကဵုမာဲ ကဝ်မယှေန်ပၞာန်တံဟေၚ် ဂွံလဝ်အခေါၚ်ထိၚ်ချုက်လဝ်တံဂှ် ဒးဆက်မၚ်ရံၚ်ပၠန်ရောၚ် BNI Myanmar Peace Monitor ထံက်ထ္ၜးလဝ်ရ။
နကဵုအလံၚ်ညးစၞး ဗော် USDP ဒဵုကဵုကြပ် ၅၀၀ တၠ ၜးသၠောတ်ကယျိုၚ်ပၞာန်တုဲ ဗလးနၚ်လဝ်တံဂှ် ယဝ်ရရံၚ်အာ ပရေၚ်ကမၠောန် က္ဍိုပ်သ္ကိုပ်သီအဝဵုပၞာန်မ္ဂး ပေါဲရုဲမာဲဏံ ဗော် USDP ဂွံဇၞးမာန်အာချိုတ်ပၠိုတ်ရောၚ် ဒးတော်ဆကေတ်မာန်ရ။
မွဲလပါ်ပၠန် ဗလးတိဍာ်ကၠောန်ဗ္ဒျ်ပေါဲရုဲမာဲ ညံၚ်ဂွံသၠဲလးအာအလုံဍုၚ်မွဲ နကဵုပၞာန်ကျာ သၠုၚ်အသိၚ်တုဲဗတိုက်မံၚ်၊ ဗွဲတၟေၚ် ဒၞာဲဍုၚ်၊ ကွာန်၊ ဗဒိုပ် တိဍာ်ဒးဗလးကၠုၚ်လဝ်တဲတံဂှ် စွံလဝ်ပွန်တုဲ နူကဵုဒပ်ပၞာန်ကျာ ဗတိုက်မံၚ်ရ။
သွက်ပေါဲရုဲမာဲ ရန်တၟံတုဲ ကဝ်မယှေန်ပၞာန်ကၠောန်သ္ပမံၚ် ပွသာ်တံဏံဂှ် ပတဝ်လဝ်ကဍိုပ် သွက်ပရေၚ်ဟွံညိၚ်ဝပ်တံကဵု ပဋိပက္ခပၞာန်တံ ပဵုတုဲဘိုအ်ဂွံသၠဲလးတိုန်ရ BNI Myanmar Peace Monitor သ္ၚဳဂၠိပ်လဝ်ရ။
ပရိုၚ်-သြၚ်လောန်တိုၚ်မ်
Photo – MOI