ဗိက်၊ အံက်တဝ်ပါ ၁၁
ပ္ဍဲကဵုဒၞာဲတိဍာ် ဗော်သွးကောန်ဂကူကရေၚ် KNU ဖျေံလဝ် ပရေၚ်အုပ်ဓုပ်တံဂှ် အကြာတ္ၚဲတံဏံ နူကဵုဒပ်ကဝ်မယှေန်ပၞာန် သၠုၚ်အသိၚ်ဗတိုက်မံၚ်ပၞာန်ကျာဂှ်ရ ညးဍုၚ်ကွာန်တံ ဒးဘဲဒဏ်ချိုတ်လဝ်နွံရဂှ် ဂွံတီနူ လိက်လလောၚ်တြး KNU ရ။
ဒၞာဲတိဍာ်ခရိုၚ်ဗိက်-ထဝါဲ KNU တံဂှ် နူကဵုဒပ်ကဝ်မယှေန်ပၞာန် စနူအံက်တဝ်ပါ ၆ ဒဵုကဵု ၁၀ နကဵုပၞာန်ကျာ ဗတိုက်လဝ် ဟွံအောန်နူကဵု ၆ ဝါ နွံကၠုၚ်မံၚ်ရ။
ပ္ဍဲကဵု ဒပ်ကဝ်မယှေန်ပၞာန် ဗတိုက်ဏာပၞာန်ကျာဏံဂှ် ကောန်ညးဍုၚ်ကွာန် ဟွံအောန်နူ ၁၄ တၠ ဒးလဝ်ဘဲဝပ်တုဲ ညးဒေသ ၃၅၀ ပြၚ် ဒးထောံလဝ်သ္ၚိဌာန်အိုတ်တုဲ ဂြိပ်ဒဴအာအိုတ်ရ။
တုဲပၠန် ပ္ဍဲကဵုအံက်တဝ်ပါ ၉ အခိၚ်ဗတမ်ဂှ်လေဝ် ဒၞာဲတိဍာ်ခရိုင်သဓီု KNU ပွိုၚ်ဍုၚ်ၜဳလေၚ် ကွာန်သၞေဟ်ဟနဳ ဟိုတ်နူဒးဒုၚ်ဗတိုက်ကဵု ၜၚ်ကျာပၞာန်တုဲ ကောန်ၚာ် ၅ တၠချိုတ်အာ ၁၂ တၠ ဒးအာဘဲဝပ်နွံရ။
လောန်ကၠုၚ်အံက်တဝ်ပါ ၆ တေံလေဝ် ခရိုၚ်ဘာပန် KNU ပ္ဍဲကဵုတိဍာ် မဟာဒပ် ၅ ဂှ် ဒပ်ကဝ်မယှေန်ပၞာန် ကြဳဖျေံဗုမ်တုဲ ကွးဘာသၟတ်ဗြဴ ၂ တၠ ဒးအာလဝ်ဝပ်နွံ KNU ခရိုၚ်ဘာပန် ပတိတ်လဝ် လိက်လလောၚ်တြးရ။
ပွမပရေၚ်ကမၠောန် ဒပ်ကဝ်မယှေန်ပၞာန် ကၠောန်သ္ပဏာဗီုဏံဂှ် ဖံက်ပကဝ်ဏာဥပဒေ ပရေၚ်ထံက်ပၚ်ရီုဗၚ်ဗ္စာရဏာမၞိဟ်တံ ထေၚ်ၚ်လဵုလဵုရဂှ် ညးအခေါင်ဟီုဂးနွံ ဂကောံဇာဖိုၚ်ရီုဗၚ် ပရေၚ်ၜိုဟ်လလမ် ကရေၚ် KPSN နဝ်ချေဝ်ရဳ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
ဒပ်ကဝ်မယှေန်ပၞာန် နနဲအဓ္ဓမ ဂစာန်ကၠောန်မံၚ်ပေါဲရုဲမာဲတုဲ ညးဍုၚ်ကွာန်နွံမံၚ် အပ္ဍဲကဵုဒေသကဝ်မယှေန်ပၞာန် ဒးဗလးလဝ်တဲတံဂှ် ဓရ်ဖေက်ညံၚ်ဂွံက္တဵုဒှ်မံၚ်လၟိုန် ရန်တၟံနွံနွံ နူကဵုဗလးကျာ ကြဳဖျေံဗုမ်ဗတိုက်မံၚ်ရောၚ် KNU တိဍာ်ခရိုၚ်ဗိက်-ထဝါဲ မဟာဒပ် ၄ ဟီုပတိတ်လဝ်ရ။
ပြဟ်ဟ်ဏံ အပ္ဍဲကဵုတိဍာ်ဒေသပရေၚ်အုပ်ဓုပ် KNU ၇ ဒၞာဲဂှ် ဟိုတ်နူ ပေါဲဗတိုက်တံဒှ်မံၚ်တုဲ သွက်ညးဒးပါဲမံၚ်ပၞာန် လၟိဟ် ၁ ပြကောတိကိုတ်ပြၚ်နွံမံၚ်တံဂှ်လေဝ် ပရေၚ်အရီုဗၚ်ထံက်ပၚ်ဓရ်ဗ္စာရဏာမၞိဟ် ဆက်နွံမံၚ်ပၟိက်ရောၚ် လိက်ဒုၚ်စဳရေၚ် KPSN ချူထ္မံက်လဝ်ရ။
ပရိုၚ်-သြၚ်လောန်တိုၚ်မ်
Photo – Social Media