ကွာလာလမ်ပူ၊ အံက်တဝ်ပါ ၁၀
သွက်ဂွံဆဵုဂဗသဳကၠဳအာကဵု က္ဍိုပ်သ္ကိုပ်အဆံၚ်လှုၚ် ဍုၚ်ဗမာတံ ဝန်ဇၞော်ပရေၚ်ဍုၚ်သ္အာၚ် မလေဝ်ယှာ ဒါတောတ်သဳရဳ မိုဟာမိတ် ဟာသာန် အာစိုပ်ဍုၚ်ဗမာ ဌာနဝန်ဇၞော်ပရေၚ်ဍုၚ်သ္အာၚ် မလေဝ်ယှာ လလောၚ်ပတိတ်လဝ်ရ။
ဆဵုဂဗအာကဵု သမ္မတယာယဳ ဂအုပ်သ္ကိုပ်ပၞာန်ဇၞော် မေန်အံၚ်လှိုၚ်၊ သ္ကိုပ်ဝန်ဇၞော် ဥူညိုဝ်သဝ်တံရောၚ် မိုဟာမိတ် ဟာသာန် ချူလဝ် ပ္ဍဲမုက်လိက်မဳဒဳယာ ပရေၚ်မၞိဟ်ရ။
နကဵုပရေၚ်ကမၠောန် လၟေၚ်တရဴပွိုၚ်မွဲတ္ၚဲဟေၚ် သွက်ဂွံဆဵုဂဗအာကဵု ဝန်ဇၞော်ပရေၚ်ဍုၚ်သ္အာၚ် ကဝ်မယှေန်ပၞာန် ဥူတာန်သွိုယ်ကီုရောၚ် မိုဟာမိတ် ဟာသာန် ဟီုလဝ်ရ။
ကၠာဟွံတိတ်အာ နေပျဳတဝ်ဂှ် နူကဵုသၞေဟ်ၜၚ်ကျာ တၠနန်မလေဝ်ယှာဂှ် တက်ပတိုန်လဝ်ဗီုရုပ်တုဲ စတိတ်အာလၟေၚ်တရဴနိဂီုဍုၚ်ဗမာ ညးတေံ လလောၚ်တြးလဝ်ရ။
နူကဵု သိပ်တမ်ပါ ၁၉ တေံရ စဳဇန်လဝ်သွက်ဂွံအာဍုၚ်ဗမာကီုလေဝ် လၟုဟ်မှ ဂွံစတိတ်လၟေၚ်တရဴရောၚ် ဌာနဝန်ဇၞော်ပရေၚ်ဍုၚ်သ္အာၚ် မလေဝ်ယှာ သ္ပဒတန်ရ။
မွဲကရောံကဵု မိုဟာမိတ် ဟာသာန်ကီု ညးစၞးအာသဳတၟေၚ်ဆေၚ်စပ်ကဵုဍုၚ်ဗမာ တာန်သဳရဳ အုက်မာန် ဟာယှေန်လဝ် ဗက်အာကီု ဂွံတီရ။
အခိၚ် ဆဵုဂဗသဳကၠဳကဵု က္ဍိုပ်သ္ကိုပ်ပၞာန်အဆံၚ်လှုၚ်ဗမာတံမ္ဂး သွက်ဂွံထမံက်အာရုပ်ရဴကဵု တၚ်ပရေၚ်တုပ်စိုတ်အာသဳယာန် ၅ တၚ်ဂှ် ဗတိုက်ဖအောဝ်ဏာရောၚ် မိုဟာမိတ် ဟာသာန် သ္ဂးလဝ်ရ။
ကိစ္စသွက်ဂွံသဳကၠဳအဓိကမ္ဂး ညံၚ်ဂွံဒေါအ်ထောံ ပွမပရေၚ်ပကီုပရာတ်တံကီု ညံၚ်သ္ဂောံဂွံအခေါၚ်အရာ ပရေၚ်ပလံၚ်ဗစိုပ်အထံက်ပၚ်ရီုဗၚ်ဗ္စာရဏာမၞိဟ်တံ ဗွဲမဗၠးၜးတံ ပါလုပ်ရောၚ် ဌာနဝန်ဇၞော်ပရေၚ်ဍုၚ်သ္အာၚ် မလေဝ်ယှာ လလောၚ်တြးလဝ်ရ။
သွက်ပရေၚ်ၜိုဟ်လလမ်ဍုၚ်ဗမာ ပေါဲသဳကၠဳဂကောံဆေၚ်စပ်သီုဖအိုတ်ပါလုပ်တံ ညံၚ်ဂွံမံက်တိုန်ကၠုၚ် ဝန်ဇၞော်ပရေၚ်ဍုၚ်သ္အာၚ် မလေဝ်ယှာ ဗတိုက်ဖအောဝ်ဏာရောၚ် သ္ဂးရ။
ပ္ဍဲအရာဂိုတ်ဂစာန် သောၚ်ကလးအာ ပြဿနာဍုၚ်ဗမာဂှ် နကဵုဍုၚ်မလေဝ်ယှာ ဆက်သဳကၠဳအာကု ဂကောံဆေၚ်စပ်သီုဖအိုတ်တံရောၚ် ပ္ဍဲလိက်လလောၚ်တြး ချူထမံက်လဝ်ရ။
Ref: Bernama