ပေါဲပၞာန်ထပ်ကလေၚ်ဒှ်ကဵု အေန္ဒိယမာန်ရောၚ် ပါကေတ်သတာန်ကဵုသတိ

အိုရက်ဇြိုင်၊ အံက်တဝ်ပါ ၁၁

ဂကောံပကီုပရာတ် နူကဵုနယူဒေလဳ ထံက်ပၚ်လဝ်မွဲဂကောံ ဟိုတ်နူဗတိုက်တုဲ ကောန်ပၞာန်ချိုတ်အာလဝ် ၁၁ တၠတုဲ ပေါဲပၞာန်ထပ်ကလေၚ်ဒှ်ကဵု အေန္ဒိယမာန်ရောၚ် ပါကေတ်သတာန်ကဵုသတိရ။

ပ္ဍဲကဵုဒေသသ္ကုတ်သၟဝ်ကျာဍုၚ် အိုရက်ဇြိုၚ် ပရေၚ်ဗတိုက်ဏာ ပ္ဍဲအံက်တဝ်ပါ ၈ ဂှ် ညးတာလျိုၚ် ၂ တၠပါကောန်ပၞာန်ပါကေတ်သတာန် ၁၁ တၠ ချိုတ်အာလဝ်တုဲ အန္တရာယ်ပေါဲပၞာန် ဂွံကလေၚ်ထပ်ဒှ်ကဵု အေန္ဒိယ နွံကၠုၚ်မံၚ်ရောၚ် ဝန်ဇၞော်ပရေၚ်စဵုဒၞာ ပါကေတ်သတာန် ခါဝါဂျာ အာသေတ် ဟီုရ။

အခိၚ်ကၠောန်မံၚ်ပရေၚ်ထံၚ်ပရိုၚ် ဒပ်ကွဳစက်ပၞာန် ပါကေတ်သတာန်ရေၚ်ကၠုၚ်မံၚ်ဂှ် ဂကောံပါကေတ်သတာန် တာလဳဗာန်တံ ပန်ဗတိုက်လဝ် မဒှ်ရ။

ကောန်ဂကောံပကီုပရာတ် ကော်ခဴစ Tehreek-e-Taliban (တေဝ်ဟေတ် အဳ တာလဳဗာန်) ၁၉ တၠ ချိုတ်အာလဝ်နွံ ဒပ်ပၞာန်ပါကေတ်သတာန် ဟီုရ။

သၟာပါ်တိတ်နူကဵု တွဵုရး ဗာလူချဳသတာန်သၟးဟွံက အေန္ဒိယကဵုမံၚ်အထံက်ပၚ် သီုကဵု ဂကောံပါကေတ်သတာန် တာလဳဗာန်တံရောၚ် ပါကေတ်သတာန် စောဲစပ်ကၠုၚ်လဝ်လံရ။

ပေါဲဗတိုက်ဂိတုမေ အကြာၜါဍုၚ် လံပွိုၚ်ပန်တ္ၚဲတုဲ ဗွဲကြဴ ဟိုတ်နူပရေၚ် လဟီုလဂး ဝန်ဇၞော်ပရေၚ်စဵုဒၞာ အာသေတ် ဟီုဏာတံဂှ် ထပ်ကြံၚ်မ္ၚိုဟ်တိုန်မာန်ရ။

နကဵုဇကု ပရေၚ်ကြံၚ်မ္ၚိုဟ်ဟွံမိက်ဇၞော်တိုန်ကီုလေဝ် ပေါဲဗတိုက်ဂွံဒှ်မာန်ဂှ် အန္တရာယ်နွံမံၚ်ဍာံစၟတ်တုဲ ယဝ်ရပေါဲပၞာန် ဒှ်ကၠုၚ်မ္ဂး သွဟ်ညံၚ်ဂွံပဵုတိုန်ကၠုၚ် နူကဵုအခိၚ်ကၠာတေံဂှ် ကၠောန်အာရောၚ် အာသေတ် သ္ဂးလဝ်ရ။

ပၞောဝ်အာကဵု လောန်ကၠုၚ် ၆ ဂိတုတုဲတေံမ္ဂး မဟာမိတ် ထံက်ဂလာန် ပါကေတ်သတာန်တံ ပဵုနွံတိုန်ကၠုၚ်မံၚ် ညးဟီုရ။

ပေါဲပၞာန်ဂိတုမေတုဲ ပရေၚ်ထံက်ဂလာန်ဂၠးကဝ် သွက်အေန္ဒိယ ဆောံလေၚ်အာလဝ်နွံ ဝန်ဇၞော် အာသေတ်ဟီုရ။

ခြာဟွံလံ ပွမလဟီုသ္ဂး ရဲသၟာပရေၚ်ဍုၚ်ကွာန် ကဵု က္ဍိုပ်သ္ကိုပ်ပၞာန် အေန္ဒိယတံဂှ် နနဲပရေၚ်ဍုၚ်ကွာန် သွက်ဍေံတံ ညံၚ်သ္ဂောံပရေၚ်ထံက်ဂလာန် ဟီုဂးဏာလဝ်ရောၚ် ပါကေတ်သတာန် စောဲစပ်လဝ်ရ။ 

Ref:The Telegraph