တနင်သဳ၊ အံက်တဝ်ပါ ၁၁
ပ္ဍဲရးတနၚ်သဳ ပွိုၚ်ဍုၚ်တနၚ်သဳ ကွာန်တကူဂှ် ၜၚ်ကျာဒပ်ကဝ်မယှေန်ပၞာန် ဟိုတ်နူကြဳဖျေံဗုမ်တုဲ ကောန်ၚာ်ဍောတ်မွဲတၠမပါလုပ် ကောန်ညးဍုၚ်ကွာန်ဟွံအောန်နူ ၁၀ တၠတံ ဒးလဝ်ဘဲဝပ်နွံ ညးဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
ပ္ဍဲအံက်တဝ်ပါ ၁၀ ၜိုတ်အခိၚ်နူဂယး ၉ နာဍဳကဝက်ဂှ် ပေါဲဗတိုက်ဟၟဲကီုလေဝ် ၜၚ်ကျာဗတိုက် ဒပ်ကဝ်မယှေန်ပၞာန် ကြဳဖျေံလဝ်ဗုမ် ၜါမဟွံက သီုကဵုလွဟ်သေနာတ်စက် ပန်ဏာလဝ်ကီုရ။
ဟိုတ်နူ ပရေၚ်ကြဳဖျေံလဝ်ဗုမ်ဏံ ရုၚ်ပလိုတ်ပၟတ်ကဵုကရပ်ဗ္ဒာဲဖျာ ကွာန်တကူ တူအာတုဲလီုလာ်အာရ ညးတြုံဒေသမွဲတၠ ဟီုကဵုဌာန်ပရိုၚ်သြၚ်လောန်တိုၚ်မ်ရ။
အပ္ဍဲကဵုရဲဒးလဝ်ဘဲဝပ်တံဂှ် ကောန်ၚာ်ကွးဘာမွဲတၠကဵု သ္ဂံၚ်ဗြဴလပါ်ဂကောံဇြဟတ်ပၠန်ဂတး ပါအာမွဲတၠတုဲ ရဲဒးဂွိၚ်ဂွာဲမံၚ်ကဵု အန္တရာဲလမျီုတံလေဝ်ပါလုပ်မံၚ်ရဂှ် ညးဆက်ဟီုရ။
အတိုၚ်ညးဒေသတံဟီုမ္ဂး ကွာန်တကူ ဒၞာဲဒပ်မယှေန်ပၞာန် ကြဳဖျေံလဝ်ဗုမ်ဏံဂှ် ပေါဲဗတိုက်အကြာၜါ်လပါ် ကေၚ်ဒှ်လဝ်ဟၟဲ ကီုလေဝ် ဖျေံကြဳဏာဗုမ်သက်က်ရောၚ် ညးဒေသတံ ဟီုဂးမံၚ်အိုတ်ရ။
ဗီုပရေၚ်တံဏံကီု ပ္ဍဲကဵုအံက်တဝ်ပါ ၁၀ နူဂယးကီု ပ္ဍဲပွိုၚ်ဍုၚ်ထဝါဲ ဒေသဂြိုပ်ဗၟံက် ကွာန်ထဳခဳဂှ်လေဝ် ဒပ်ကဝ်မယှေန်ပၞာန် ကြဳဖျေံဗုမ် နကဵုၜၚ်ကျာ Jet Fighter တုဲ သီုပန်လဝ်ကဵုသေနာတ်စက်ဂှ်ရ ညးဒေသတံဒးဂြိပ်ဒဴပါဲအာအိုတ်ရောၚ် KNU ခရိုၚ်ဗိက်-ထဝါဲ လလောၚ်ပတိတ်လဝ်ပရိုၚ်ရ။
ကြပ်ကၠုၚ်မံၚ်ကဵုအခိၚ်ပေါဲရုဲမာဲဟဍၚ် ဒပ်ကဝ်မယှေန်ပၞာန်ဂှ်တှ်ေ ပ္ဍဲကဵုရးတနၚ်သဳ ဒၞာဲဂကောံဇြဟတ်ပၠန်ဂတးတံ ထိၚ်ချုက်လဝ်ကွာန်တံသၟးဟွံက ဒၞာဲပေါဲဗတိုက်ဟွံကေၚ်ဒှ်လဝ်ဂှ်လေဝ် နကဵုဗုမ် ကြဳဖျေံမံၚ်စေက်က် ကၠောန်မံၚ်ရ။
ပရိုၚ်-သြၚ်လောန်တိုၚ်မ်
ဗီုရုပ် – CJ