မတ်မလီု ၊ အံက်တဝ်ပါ ၁၁
ပ္ဍဲကဵုတွဵုရးမန် ဒပ်ကဝ်မယှေန်ပၞာန် ကၠောန်အာပေါဲရုဲမာဲဏံ ညးဍုၚ်ကွာန်တံညံၚ်ဂွံအာကဵုမာဲဂှ် နဲကဲစုၚ်ၚ် ပဵုတုဲဆဝ်ဗ္ၚုဟ်စန်ဒက်မံၚ်ရောၚ် ညးဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
စိုပ်ဂိတုဒဳဇြမ်ပါ ၂၈ မ္ဂး ကဝ်မယှေန်ပၞာန် သွက်ဂွံကၠောန်အာပေါဲရုဲမာဲဏံ ညးဍုၚ်ကွာန်တံညံၚ်ဂွံအာကဵုမာဲဂှ် ညံၚ်ဂွံကၠုၚ်ရံၚ်စရၚ်မာဲကီု ဗစူဗတဵုမုက်တုဲ ဗက်ဆဝ်ဗ္ၚုဟ်မံၚ်ကဵု စက်သၠဲရမျှာၚ်နာနာတံရ။
လောန်ကၠုၚ်အံက်တဝ်ပါ ၉ ဂှ်လေဝ် ကဝ်မယှေန်ပၞာန်ခါန်ကၞက် သ္ကိုပ်ဝန်ဇၞော်တွဵုရးမန် ဥူအံၚ်ကျဳတိၚ် က္ဍိုက်ပ်တုဲ ညးဍုၚ်ကွာန်တံညံၚ်ဂွံအာကဵုမာဲ ပ္ဍဲကဵုပေါဲရုဲမာဲဂှ် ဗစူပဝ်သတာ ကၠောန်လဝ်ပရေၚ်ဆဝ်ဗ္ၚုဟ်တံ ပ္ဍဲကဵုဍုၚ်မတ်မလီုကီု သီုကဵုပွိုၚ်ဍုၚ်တၞဟ်တံကီုရ။
သွက်ဂွံအာကဵုမာဲ ပ္ဍဲကဵုပေါဲရုဲမာဲဂှ် ကဝ်မယှေန်ပၞာန် ၜိုန်ရဆဝ်ဗ္ၚုဟ်ကီုလေဝ် ဂလာန်ပတှ်ေဟၟဲတုဲ စနူကဵုစရၚ်မာဲလေဝ် အာရံၚ်ဟွံစှ်ေကီု စရၚ်မာဲဗၠေတ်မံၚ်တံဂှ်လေဝ် ညးအာပလေဝ်ဟၟဲပုဟ် ညးဒေသ တွဵုရးမန်မွဲတၠ ဟီုရ။
“ပရေၚ်မၞိဟ်တံစိုတ်လုပ်စ အောန်ဟာဟွံတီ။ မၞိဟ်အာရံၚ်ဗဵု ဟွံဆဵုကွေံပုဟ်။ ဂလာန်ပတှ်ေညးဍုၚ်ကွာန်တံ ၜိုတ်လဵုနွံရောဟီုတှ်ေ ညးတံလေဝ်ဟွံအာကျောဝ်ရံၚ် စရၚ်မာဲပုဟ်။ ပလေဝ်လေဝ် ဟွံပလေဝ်ပုဟ်။ တုဲပၠန် ညးဍုၚ်ကွာန်တံ ဟီုမံၚ်အရေဝ်နွံမွဲ ဒဵုကဵုတ္ၚဲဏံဗာန်လဝ်စရၚ်မာဲဂှ် အာပလေဝ်လ္ပဟီုဏီ ရံၚ်လဝ်ဟွံအာရံၚ်ပုဟ်” သာ်ဝွံသ္ဂးရ။
တုဲပၠန် ပေါဲရုဲမာဲကဝ်မယှေန်ပၞာန်ကၠောန်ဏံဂှ် ဒှ်ပၞော်တိတ်ဍေံတံ သၟးဟွံက ပေါဲရုဲမာဲတုဲမ္ဂးဍေံတံပၠန်ရ ဆက်အုပ်ဓုပ်အာဒှ်မံၚ်တုဲ ပရေၚ်အာစုတ်မာဲဏံ ၜိုတ်လဵုဆဝ်ဗ္ၚုဟ်မံၚ်ကီုလေဝ် ညးဍုၚ်ကွာန်တံ စိုတ်ဟွံလုပ်စပုဟ် ညးဆက်ဟီုရ။
မွဲလပါ်ပၠန် နူကဵုကဝ်မယှေန်ပေါဲရုဲမာဲကၟိန်ဍုၚ် ကဝ်မယှေန်ပၞာန်ဂှ်တှ်ေ ပ္ဍဲကဵုပေါဲရုဲမာဲဏံ ညံၚ်ဂွံကဵုအာမာဲမာန်ဂှ် နဒဒှ်အလန်ပထမ ဗာန်စွံကဵုလဝ်စရၚ်မာဲ စနူကဵု သိပ်တမ်ပါ ၃၀ ဒဵုကဵုအံက်တဝ်ပါ ၁၃ ရောၚ် လလောၚ်တြးလဝ်တုဲ ဟိုတ်နူမၞိဟ်အာကျောဝ်ဗဵုဟၟဲတုဲ ထပ်ဟပဵုဗာန်စွံလဝ် ပွိုၚ်မွဲသတ္တဟပၠန်ရောၚ် ဂွံတီရ။
ပ္ဍဲကဵုတွဵုရးမန် ဒပ်ကဝ်မယှေန်ပၞာန် ကၠောန်အာပေါဲရုဲမာဲဏံ ညံၚ်ဂွံအာကဵုမာဲနဲကဲစုၚ်ၚ် ဆဝ်ဗ္ၚုဟ်မံၚ်ကီုလေဝ် ညးဍုၚ်ကွာန်တံ ပရေၚ်စိုတ်လုပ်စအောန်မံၚ်၊ စနူကဵုစရၚ်မာဲကီု မၞိဟ်အာကျောဝ်ဗဵု ဟၟဲကီုတုဲ ဒးဗက်ဆဝ်ဗ္ၚုဟ်မံၚ်ကဵုစက်သၠဲရမျှာၚ်ကီု ဍိုပ်အရာပ်တံ တိုန်မွဲသ္ၚိစှ်ေမွဲသ္ၚိ ဗက်ကဵုမံၚ်ဇြဟတ်ဟရိုဟ်နာနာသာ် နွံမံၚ်ရ။
ပရိုၚ်-သြၚ်လောန်တိုၚ်မ်
Photo – MOI