ရေဝ်၊ အံက်တဝ်ပါ ၁၃
တွဵုရးမန် ပ္ဍဲပွိုၚ်ဍုၚ်ရေဝ် ကွာန်ပိကွာန်ဂှ် အကြာဒပ် ကဝ်မယှေန်ပၞာန်ကဵု ဂကောံဒပ်မဟာမိတ်ပၠန်ဂတးပံၚ်တောဲတံ ဒှ်မံၚ်ပေါဲဗတိုက်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
စနူကဵုအံက်တဝ်ပါ ၁၀ အခိၚ်နူဂယးဂှ် ပ္ဍဲကဵုကွာန်စဳပျး(စံပြ)၊ ကွာန်ကၞေၚ်တၟအ်ကဵု အံၚ်သာယာ ဒပ်ကဝ်မယှေန်ပၞာန် ဟိုတ်နူ ထပက်ကၠုၚ်ကရောၚ်ပၞာန်တုဲ အကြာၜါ်လပါ် ပေါဲဗတိုက်ဒှ်မံၚ်ရ။
ဟိုတ်နူ ဒှ်မံၚ်ပေါဲဗတိုက်အကြာၜါဏံဂှ်ရ သၟာကမၠောန်ကၠအ် ဗွဲမဂၠိုၚ် ဒးဂြိပ်ပါဲအာအိုတ်တုဲ ယြဴညးလဵုမွဲမှ ဟွံဂံၚ်အာကၠအ် အကာဲအရာ စိုပ်မံၚ်ရောၚ် ညးဒေသတံ ဟီုရ။
ပ္ဍဲအံက်တဝ်ပါ ၁၁ အခိၚ်နူဂယးပၠန် ကရောၚ်ပၞာန် ဒပ်ကဝ်မယှေန်ပၞာန် ဆက်နွံမံၚ်အကြာကၠအ်ရာဘာ ဗ္ဒာဲကရပ် ကွာန်နှေဟ်ခြေၚ်ကီုလေဝ် အကြာၜါလပါ် ပေါဲဗတိုက် ဟွံဆက်ဒှ်လဝ်ဏီ သ္ဂးရ။
စပ်ကဵုပရေၚ်ပေါဲဗတိုက် ပွိုၚ်ဍုၚ်ရေဝ်ဏံတုဲ နကဵုသြၚ်လောန်တိုၚ်မ် ကေတ်မံၚ်အဆက်ကဵု ဂကောံမဟာမိတ်ပၠန်ဂတး ဒပ်ပံၚ်တောဲတံ ကီုလေဝ် ဟွံကလေၚ်ကၠုၚ်ပရိုၚ်ဏီ။
ပ္ဍဲပွိုၚ်ဍုၚ်ရေဝ် ကြပ်ကၠုၚ်မံၚ်ကဵုအခိၚ်ပေါဲရုဲမာဲဟဍၚ် ဒပ်ကဝ်မယှေန်ပၞာန်တံ ထပက်ကၠုၚ်ကရောၚ်ပၞာန် ဇရေၚ်ဒေသ ဒပ်ပၠန်ဂတးတံထိၚ်ချုက်လဝ်ဂှ်တုဲ ပေါဲဗတိုက်ကလေၚ်ဒှ်ကၠုၚ် စေက်က်ရ။
ပရိုၚ်-သြၚ်လောန်တိုၚ်မ်
Photo – Social Media